هر چند دشت کرب و بلا چوخ بلالیدی
امّا بلالی زینبه بزم وصالیدی
شامه گیدنده قارداشین عریان قویوب گیدوب
قولباغلی دفن و کفن ایلمکچون محاایدی
تاپشوردی گل جنازه نی چادر نشین لره
تز دفن ایدون بو خسته بدن چوخ یارالیدی
آخر او گون که شامیدن آزاد اولوب گلوب
بیر آلتی گوشه قبر گوروب نقشی عالیدی
عرشه چخوردی جابر انصارینون سسی
بیلدی همان صحابیِ صاحب جلالیدی
دوردی ایاقه، آلجاق اودا زینبون سسین
درس رواندی شهر ولایتده والیدی
فوراً گیدوب عطیّه غلامیله،بیر یانا
قارداش غمینده بیلدی باجیلار عزالیدی
زینب او قبرون اوسته یا پشدیردی سینه سین
روحی پر آچدی قصدی فقط ارتحالیدی
عمری قالوردی، چوخ چالشوب جانی چخمادی
قلبنده سانکه عارضی بیر اِختلالیدی
سسلندی قبروه الى بوش گلمشم حسین
بیر تحفه وار سینمده ولی چوخ بهالیدی
قبر اوستونه سالاللا حسین، عالی ترمه شال
ئوز کهنه کوینگون باجوین ترمه شالیدی
آچدی او قبرون اوسته سالوب قانلی کوینگی
عرض ایلدی باغشلا باجون دست خالیدی
قبرون گورنده جای تعجبدي ئولمدیم
ئولمز باجون بو قدری که باشی بلالیدی
ئولسیدی باش یاراندا ئولردی او کوفه ده
عشق عالمينده گرچه او ئولمک حلالیدی
ساکت دوروب منه گوره دینمور حرملرون
دیندیر، حرملرونده باجون تک وفالیدی
هئچ کیم ربابی شامه کیمین دیندیر نمیوب
حالین سوروش ثوابیدی قلبی یارالیدی
نه بیر هارای چکور نه ده بیر وای اوغول ديور
اشگی آخور ولی ئوزی غرق خیالیدی
کیم دیندیرور باخور یوزینه گوز یاشین توکور
چوخدور سوزی ولی ایله بيل نطقي لالیدی
گوردوم یانان چادردا اونی من اوّل گجه
گوز يولدا ال اورکده چوخ افسرده حالیدی
هي دوشلرین اوؤشدیروب ایلردی آه و زار
دردین دیمزدی مانع اولان انفعالیدی
بیلدیم دولوب صوديله دوشی صودامر گزور
عيناً بالاسی اوخلانان آهو مثالیدی
قصدیم بو اولدی خلوت ایدوب دوشلرین ساغا
شرم حضور مانعیدی چوخ حيالیدی
ایتدیم اشاره دور بو چادردان کناره چخ
باخ گويده بير آی اولدوزا گور نه صفالیدی
چوخ دیزلرون قوجاقلاما قلبیم یانور سنه
دور، گز، دولان، بو دوره ده عالی مجالیدی
صبح اولسا باغلانار قولون عاجز ایدر سنی
دشمن گزوب دولانماقا قويماز، جفالیدی
عرض ایلدی ننوعی باخوم من آی اولدوزا
اولدوزلاروندا سیری منه بیر ملالیدی
اولدوز آخاندا یادیمه بخت اولدوزوم دوشور
بو مسئله توزی منه جای سئوالیدی
آخدی نه دن جهاندا منیم بختیم اولدوزی
کوسدی نه سمته گیتدی که مندن آرالیدی
یول گوزلورم اَموب یاتا چون آج سوسوز گیدوب
فکر ایتمیون که اصغر آناسی خیالیدی
او خلانماقین ایشیتمشم اما اینانمورام
ششماهه بیر اوشاق مگر اهل قتالیدی
چکدی رباب محنتی هاردان هارا سوزی
بیلمم بو نه گریز بو نه اتصالیدی
بیر شمّه سیدی بیر گجه نون بیله داستان
وقت اولسا طول صحبتمز ماه و سالیدی
هشتاد اسیر دن بیرینون بیر غمیدی بو
اوندان علاوه بیر بلوک اهل و عیالیدی
گور کوفه دن باشیم نه چکوب شامه جن حسین
آل اللهون مُراقبی، قوم ضلالیدی
ابن زیاده اولمادی بیر اعتراض ایدن
باخديم او شهر کوفيه قحط الرجالیدی
مرجانه اوغلی شامه بیزی گوندرن زمان
ئورلدورمگیدی قصدی آدی انتقالیدی
ئولدی دیریلدی نازلی رقیون دمشقه جن
سالم يتشدی، مرحمت ذوالجلالیدی
ویران سرایه چاتدی یوزین قویدی تپراقا
بو یر دیدی رقییه بزم وصالیدی
گرچه خرابه دور ولی شاد ایتدی گوگلومی
خلوت یر ایستورم بورا بی قیل و قالیدی
چون عهد ایدوب بابام منی ویرانه ده گوره
مژده ویرور منه بو مكان نیک فالیدی
گلدی یارالی باشون، او قز دوشدی بیر حالا
بیلدیم همان گجه که رقیّم هارالیدی
بنذردی فاطمه آناما چوخ جهاتیدن
سوز یوخ که چوخ رویه ده زهرا خصالیدی
اما شباهتنده بیری چوخ مهمیدی
قبره گیدن گونه کیمی نیلی جمالیدی
شام اهلی بوش گوروب یرین آغلاردی حالنه
سسلردیلر که حیف اولا چوخ با کمالیدی
قزلار دردی بیربیره صد حیف او گوزلره
کیم باغلادی او گوزلری، عیناً مارالیدی
بعضی دیردی چوخ خبر آلدوق بیلنمدوک
بو قز مدینه اهلیدی یا کربلالیدی
بعضی دیردی صحبتی دوزلیدی، دیل شیرین
هر کیمدی هر یر اهلیدی شیرین مقاليدی
غسّاله غسل ویرمیوب امّا دوزون دیوب
حتمیدی الده ئولمگی نه احتمالیدی
غساله گلممش ولی غسلی تمامیدی
چون غسل ایدن گوزومده کی اشگ زلالیدی
دفن ایلینده چوخ اگلوب ئوپمشم یوزین
قدیم او وقتیدن ایله، کامل هلالیدی
بش مینجی جلد (منزویه) یادگاریدی
قصدين خدا بیلور که نه مال و منالیدی
بش گونلیک عمره یوخدی او اندازه اعتبار
قلبينده قصد و نیتی حُسن مآلیدی
- یکشنبه
- 7
- شهریور
- 1400
- ساعت
- 23:42
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه