حسین سنیله گیچن روزگاره حیف اولسون
او روزگاره که گلمز دوباره حیف اولسون
بو آیریلیق نه یامان دردیمیش آدی باتسین
تاپانمادیم بو آغیر درده چاره حیف اولسون
اجل تری دوزولوب آلنیما گوزوندن ایراق
نفس لریمده دوشوبدی شماره حیف اولسون
ئوز اللریمله گرک باغلیام آخان گوزومی
یارالی اللریمه، چشم تاره حیف اولسون
اجازه ویر قوی آچوم خاطرات دفترینی
دیرسن اوندا: بو چشم انتظاره حیف اولسون
وداعیدن دانیشوم یا که قتلگاهوندن
بو ایکی منظره جان شکاره حیف اولسون
یوماندا گوزلریمی قتلگاهیوی گورورم
گون ایستی سینده تن زخمداره حیف اولسون
ایلیکه حمله ور اولدی سنه پیاده نظام
توکولدی خیمیه اون مین سواره حیف اولسون
یانوردی خیمه ده سجاد آتش ظلمه
دچار اولموشودی نور، ناره حیف اولسون
سنه ئورک ویرنون آشیانی اوتدا یانار
اودور یانوردی خیامون شراره حیف اولسون
آلیشدی اول قاچاقاچدا رقیه دامانی
امام امر ایلمیشدی فراره حیف اولسون
قوتاردی صبح شهادت یتیشدی شام عزا
رسول گللری توش اولدی خاره حیف اولسون
بو رسمیدی آنانون ئولسه اوغلی دعواده
دیر بالامداکی شان و وقاره حیف اولسون
ایاقینی قویا هیهات قاتلین ایوینه
ولی بو رسم و بو قول و قراره حیف اولسون
فقط سنه یتیشنده بو ایش برعکس اولدی
مناظر او شب ناگواره حیف اولسون
گزوردی قاتل ایوین خانواده مقتول
دالونجا عترت بی اختیاره حیف اولسون
زبس دولاندی آنام عاقبت یرون تاپدی
ولی نه فایده، فرجام کاره حیف اولسون
تنورین ایستی سی یاندیرمیشیدی صورتیوی
دیدی:کول اوسته یاتان گلعذاره حیف اولسون
تنور خولیده قویدی بتول سنگ تمام
او ناتمام قالان آه و زاره حیف اولسون
حسین سه ساله قیزیندان سنه نه عرض ایلیوم
یتیشمدی او گلون دورت بهاره حیف اولسون
خجالتم منه تاپشوردوقون امانتدن
آلانمادیم قیزیوا گوشواره حیف اولسون
او شام و کوفه، اودا کربلا، مدینیه باخ
دینن باجی او پریشان قطاره حیف اولسون
مدینه ده ایویمیز کربلایه بنزردی
هر ایوده دوتموشودوخ سوگواره حیف اولسون
بیری دیردی عمود آلتدا جان ویرن بالا وای
بیری دیردی سوسوز شیرخواره حیف اولسون
باشیم قاریشدی هاچان بیلمدیم رباب ئولدی
دیدیم الهی اوشب زنده داره حیف اولسون
قرا گین گلینی بوکدولر بیر آغ کفنه
بقیعده قویدولا جسمین مزاره حیف اولسون
گونوم سنیدون، آی عباس، اولدوزوم اکبر
نه آی قالوب نه گونوم نه ستاره حیف اولسون
نئیم واریدی گیدوب قالدی قانلی کوینک، اودا
اولوب قباله کیمی پاره پاره حیف اولسون
(منادیا) بو گجه لیله الرغائبدی
اویاق قالوب، دی او چشم خماره حیف اولسون
طناب دار هر عاشق فراقیدن توخونوب
او پای داره گیدن پایداره حیف اولسون
- دوشنبه
- 8
- شهریور
- 1400
- ساعت
- 22:30
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه