بو جوان کیمدور الهی یکّه و تنها گلور
مـرد مردانـه بیلـه میدانه بی پروا گلور
حاش‌لِلّه اولمیوب اولمـاز بشـرده بوجمال
محو اولور نور جمالیندن بونون عقل و خیال
گوستروب خلقه بونیله اوز جلالین ذوالجلال
آیـۀ حُسـن المـآبه احسـن و طوبی گلور
اوج ایدر عرشه یوزوندن لَمعه لَمعه نور حق
آیـۀ نــوره حقیقتـده بـو دور منظور حق
یـا گلـوب واد مقدّسده ظهوره طور حق
طور سینایه مناجاته چخوب موسی گلور
بیز بوگون دوتدوخ حسینه عرصه نی بیر نوع تنگ
ایلـدوخ کـرب و بلا دشتین قزل قانیله رنگ
مطلقا دوردومجی گُویدن ایلیوبدور عزم جنگ
ایتماقا نصرت حسینه حضرت عیسی گلور
یا ایدوب رجعت بوگـون دنیایه ختم الانبیا
ایلیــه اوغلـی حسینـه کربـلاده جـان فدا
تاج سبحانَ الّذی اَسری باشندا مصطفی
آیۀ اجری ایده تفسیر ذی القربی گلور
هاشمیلرده اگر چه حُسن چوخ تکمیل دور
بیـر بـه بیــر انـوار حقّـه مرکز تأویل دور
بو جوان آیا یوز اون دورت سوریه تنزیل دور
قلــب قــرآن مُبیـن یاسینیلـه طاها گلور
مصحف خطّنده قرآن خط بخط تحریر دور
کاف ها یـا عین صاده مصدر تفسیـر دور
میــن دلیلیلــه وجـودی آیــۀ تطهیـر دور
سورۀ #والشَّمسه تحت اللّفظده معنی گلور
گوردی سعد اوغلی قوشوندا وار بیر اؤزگه انقلاب
رعشیه دوشدی وجودی قلبی دوتدی اضطراب
ایلـدی اول بی‌حیـا قومـه بـو نوعیله خطاب
ایمدی ایش ایشدن گچوب عقبا گیدوب دنیا گلور
اشتباهـه دوشمیـون ای قـوم بی موسی دگل
گلمیوب دوردومجی گؤیدن حضرت عیسی دگل
شبــه دور پیغمبــره یاسینیلــه طاهــا دگل
وارث رَفـرَف ســوار لَیلَۀ الاسـری گلور
ایجمـاعت نـورچشـم مصطفـی اکبردی بو
حُسن صورتده رسول اللهه چوخ بنزردی بو
خَلقــده هـم خُلقـده منطقـده پیغمبردی بو
تشنه‌لب اوغلی حسینون عزم ایدوب دعوا گلور
سیزده دعوایه آچون اَل ایلیون جنگِ عظیم
اُمَّهـاتِ اربعــه اولسـون بـو دعوایه عقیم
پاره پاره دوغریـون جسمین اَیا قوم جَهیم
باش آچوب زینب دیسون لیلایه واویلا گلور
قـامت مــوزونی بنـزر آهـه لفظ عامیله
آهـی تشبیـه ایلیــو حـرف اِلاهـه لامیله
لام عبـارت ذوالفقـاری ننـدی بیله نامیله
باشدا تشدید اولسا عین‌الله اولور پیدا گلور
- سه شنبه
- 9
- شهریور
- 1400
- ساعت
- 19:11
- نوشته شده توسط
- یوسف اکبری
- شاعر:
-
مرحوم استاد طوری تبریزی
ارسال دیدگاه