ساقی گینه قوی باشیمه میخانه دولانسون
میخانه ده الدن اله پیمانه دولانسون
مسجدلیق ایشیم یوخ، منی دَنگ ایلمه زاهد
بسدور بو قدر حیله و رنگ ایلمه زاهد
عاشقلریله بیر بیله جنگ ایلمه زاهد
عاشق اودی گوندوز گیجه میخانه دولانسون
میخانه بیزه کعبهء مقصودیدی، مقصود
گَل فاش دییم جنّتِ مُوعودیدی، مُوعود
عاشقلره میر، کوثرِ معهودیدی، معهود
قوی مِیکده ده، عاشق رندانه دولانسون
بیز وار یوخی خرج ایلمشوق بادهء صافه
میخانیه چوخ گلمیشوق ای شیخ، طوافه
آز کعبه نی تعریف ایله گَل ایتمه کَلافه
عادت دی گَرک شُعلیه پروانه دولانسون
مجنون ایلموب عقلینی یر سیز یره مصرف
مین فنّیله لیلایه ایدوب عشقی مُکلّف
بازارِ جنونه چکه عاقل لری صَف صَف
بوینوندا گرک سلسه ، دیوانه دولانسون
جام و مِی و میخانه غرض اولدی بهانه
بو طرزیله تا شور سالام کون و مکانه
اظهار ایدم اُوز عشقیمی سلطانِ جهانه
تا سُوز صفتِ مدحتِ سلطانه دولانسون
هو حقّ مدد اُوز بندوه امداد ایله یا ربّ
گر مصلحت اولسا، اوره گین شاد ایله یا ربّ
شاگردیدی امّا اُوزون استاد ایله یا ربّ
مدحه قلمی لوحده جانانه دولانسون
بیز بنده یوق عالمده بیزه شاهیدی مهدی
شاهِ مَلک انصار و فَلک جاهیدی مهدی
هر حُسنده چون مظهر آللّهیدی مهدی
یِر گُوی یِری وار عشقینه مستانه دولانسون
گُل طَلعَتی هر حُسنده ، پیغمبره بَنزیر
صولتده، صلابتده خودِ حیدره بَنزیر
باخ هاشمی خالی آقامون گوهره بَنزیر
باعث دی او خال، عالَمِ امکانه، دولانسون
سلطانلارا، سلطان بودی بو ماه شمایل
حاتم لر اولوب درگهِ احسانینه سایل
هر کیمسه اُولا حُبّ تَولّاسینه قایل
عالمده گرک فَخریله مَردانه دولانسون
منظور دعادن بودی هر مقصد و مقصود
تعجیلِ ظهوروندا عنایت ایده معبود
دَجّال خروج ایلیوب ای مهدی موعود
گَل قُویما آغزلاردا بو افسانه دولانسون
گَلسون آقا جان، وضعِ جهان بیله قاریشماز
عاشقلروین قانینه هر کیمسه داریشماز
حَشر اولسادا، دشمنلریله، شیعه باریشماز
دشمن گرک عالمده ذلیلانه دولانسون
گَل آل قاباغین، ایشلری تزویره چکیرلر
آزاده لری، ظلمیله زنجیره چکیرلر
حقّ حقّ دانشان عاشقی شمشیره چکیرلر
یوخ صبر داهی، خَصم، دلیرانه دولانسون
ای شیعه لرون دَهریده اُمّید و رَجاسی
هجروندا چخوب اُمَّتوین عرشه نواسی
سنسیز بیزه غربتدی جهان، یوخدی وفاسی
آخر نه قدَر شیعه غریبانه دولانسون
بو مملکتِ شیعه سَنون مملکتوندی
محتاج عطا و کَرم و مَغفَرتوندی
شامل بیزه هر دم نظرِ مرحمتوندی
گَل باشیوه بو ملّت فرزانه دولانسون
(شبخیز) بو طَبعین سنون الطافِ اَزَلدور
(واحد) یازان اشعار ولی گُور نه گُوزلدور
بو مصرعی تکلیقدا اوزی شاه غزلدور
قویما بو حَرمخانیه بیگانه دولانسون
- چهارشنبه
- 10
- شهریور
- 1400
- ساعت
- 14:28
- نوشته شده توسط
- یوسف اکبری
ارسال دیدگاه