آچ بیر قولاق گوزوم بوفغان و نوایه باخ
هر صُبح و شامیدن اوجالانمش صَدایه باخ
وصل اِیسته سَن باشون بدنوندن جدا گرک
سِرمَشقدور حسین باشی نُوک جِدایه باخ
قرآن اُوخور حِجاز هَواسی له شامیده
الله هَواسی واردی باشندا هَوایه باخ
گر اِیستَه سَن قَرائت قُرانی پَرده سیز
بی پَرده اَهل بِیت رَسول خدایه باخ
چون شَرمسیز چخوبلا تَماشایه اَهل شام
چَنگ و نِی و چُغانه دَف و ساز و نایه باخ
اوینالا های هُوئیله اَهل دَغانی گور
آغلالا های هائیله اَهل دُعایه باخ
سَر مَشقّ دور بَلای دِمشق اَهل عِشق ایچون
اول بَلا چَکن لره وانگه بَلایه باخ
ویرانده وئروبله قوری یِئر قوناقلارا
نه فرش و نه چراغ نه سُفره، حَیایه باخ
دَربان اولوب خرابیه دَربان کِبریا
دَربانه باخ، خَرابیه باخ، کِبریایه باخ
زَنجیره باغلیوب لا یدالله اَللَرین
سن جُرأت قَضایه رضا بیر قَضایه باخ
مؤمن اُولوب یَزید آدی سَجاد خارجی
بیگانه نی یگانه اِئدن آشنایه باخ
ویرانه دَن گویه دایانوب یاعلی سَسی
راحت یاتان نَجفده شه لافتایه باخ
باشی آچوخ خَرابده مُدتدی قالمیشوق
صَبر و تَحمل حَرم مُصطفایه باخ
ویران بِناده یاخشی بِنانی اوتور دولار
سینمش بنالی یئرده بو مُحکم بنایه باخ
شامه چَکوب سَکینه نی صوت درائیله
بیهوده سویلین داش اُورک لی دُرایه باخ
اِی گوز یاشیندان اوتری وئرن جانینی حسین
حاصل اولوبدی مَطلبون اَهل عَزایه باخ
وار شامیده یَتیم و پَریشان زیارتی
جمعیت اِیسته سن حَرم کربلایه باخ
مَقبل اولوبدی تُرک لقبده سنه (دخیل)
اَی شاه مُحتشم بو مُحقر گدایه باخ
- چهارشنبه
- 10
- شهریور
- 1400
- ساعت
- 15:21
- نوشته شده توسط
- یوسف اکبری
ارسال دیدگاه