هر عاشقون که عمری گئچوب اِنتظاریله
اَحوالیمی بولر او منیم بیر نَظاریله
عاشق جَمالی آئینهٔ دل نمادی چون
نقشِ نگاری گوستری رَنگِ عذاریله
یوخ بیر نفر نگارِ وفاداریمه دِیسون
کسمه اَماندی لطفوی بو بیقراریله
مدّتدی روحیمون قوشنا تَنگ اولوب قَفس
گوندوز گوزیمده بیردی مَنیم شامِ تاریله
جانیم ضَعیف، لیک قَوی پَنجه دور فَراق
آیا قالوم نه وقته کیمی بو فشاریله
يوخ قدرتیم خلاص یمه مُهلک بو دَردیمون
وار دور عَلاجی سَنده اولان اِقتداریله
من کَسموشم عَلاقه می خلقِ زَمانه دَن
فَقر اِختیار اِیلموشم اِختياريله
کشکولِ اَهل فَقری سَخی طَبع لر هاچان
بوش قیتروله بیر کرمِ بی شماریله
اولموب رِضا تَجَرّده یتمش ایکی یارا
اُلفت اِیدوبدی بیر بو دلِ داغداریله
گیتمور اورکدن هیچ بیری یالقوز قالان زَمان
گویا عَلاقه باغليوب عاشق، نِگاریله
بیر گون بو یاره لر صاغالور، دل صفا تاپار
مین اِیل غلاف اِیچینده یاتان ذُوالفقاریله
خامه آلاندا من اَله بولمم نه سِرّدور
وا اَصغرا صَداسی گلور آه و زاريله
یا صاحب الزمان اوزون اِمداد اِیله منه
شَرح اِیلیوم شَهادت ینی اِعتذاريله
راوی دیر گَلنده حسین خیمگاهدن
یا قصد حَملِ نَعشیله یا کار زاريله
میداندا گورمدیم اونی اولسون فِسرده حال
گوردوم تمام صَبریله، چوخ بُرد باریله
آثارِ اِنكسار گورون موور او شاهیده
رُخساری لاله گون گورونور اِفتخاریله
گیتدوقجا یار و یاوری قَلبی تاپور صَفا
صَبر اَهلین حِیرته سالوری اِصطباريله
مطلق گورن دیردی شهِ لافتادی بو
لشکرگهه گلوردی اِیله بیر وقاریله
بیرده باخوب نه گوردوم اِیله صَبر صاحبی
میدانه دلشکسته گلور اِنکساریله
پوزقوندی حالی رَنگی سولوب گوزلری دولوب
اِیلور گوزی مقابله اَبرِ بَهاریله
صَفلر قباقینه يتوب آلدی اَل اُوستنه
بير سُود اَمر که مُشرفیدی اِحتضاریله
کافر باخاندا حالینه رَحم اِیلوری اونون
اِسلامیان اوتانموری بو نَنگ و عاريله
از بَس سالوب شَرارِ عَطش جانینه شَرر
غنچه دوداقلاری قوريوب دور شَراريله
باشی آخوب، آتا قُولی اُوستونده ضَعف اِیدوب
کیم تاب اِیدر سوسوزلقا سِنّ صَغاريله
گوستردی تا او طفلی سِپاهه شهِ حِجاز
دل آچدی نطقه گلدی لَبِ دُر نَثاریله
سَسلندی اِی جَماعت اولور اوچ گون اوچ گئجه
عَطشان قالوب بو طفلِ صَغير اِنزجاریله
من یاغیم یَزیده، گناهی نَدور بونون
بو نه مُخالفت اِیلیوب شَهریاریله
نه بیر گناه اِیدوبدی نه بِیعَت بولور نَدور
نه واردی جِنگه قدرتی جِسمِ نَزاریله
زَهرا آنامدی، حِیدر آتام، مُصطفا بابام
وار نسبتیم رَسولِ حقّ کردگاریله
وار دور ایچوزده چوخ تانیانلار سئوال اِیدون
تا باور اِیلسون سوزیمی اِعتباریله
بیر شَربه سو ویرون سوسوزوندان یانور بالام
اَجری سو ویرماقین اولی پَروردگاریله
از بَس یانیقلی دل دئدی یاندیردی دللری
آغلاتدی لشکر اَهلینی بو وضعِ کاریله
پِیغمبر اوغلنون اِیله پژمرده حالینه
آتلاردا یـاندی آغلادی حَتّی سَواریله
فرماندهِ سِپاهِ سِتم پیشه تا گوروب
بو شورشی، او قوم شَقاوت شُعاریله
قالمور او قَدر اولا هامی زَحمَتلری هَدر
لَشكر دونوکلوق اِیلیه اُول تاجداریله
بیر باخدی اوخ آتانلارا تا نَحس گوزلری
ناگه ساتاش دی حَرمَليه بير نظاریله
سویلوب نَدن دوروب باخوسان گورموسن مگر
اَفواجی می پوزور بو هَم هَمهء بی شماریله
چوخ سَخت بیر مَقامه يتوب اَمر چاره سی
اولسا اولور سَنون کیمی بیر نامداریله
ساکت اِیله حسینی یاخوندی ریاسَتیم
رَخنه تاپا بو خُسروِ گردون مَداریله
مَقصودِ اِبن سَعدی بولوب تا او سَخت دل
اوچ شعبه لی اوخ آلدی اَله اِفتخاریله
سویلوب حسينون اَصغرینی قویمارام سوسوز
ویرم سو، نوکِ ناوکِ زَهر آبداريله
تا وصل اِیدوب کَمانه او اوچ شعبه لی اوخی
اوچ دل دوتوب شَراره هَمان اِستناریله
جَتّنده قَلبِ فاطمه مِیداندا شاهدين
قَلبِ رُباب خِیمده یاندی بو ناریله
اوچ قلبی یاندیروب بیر اوخ هم ووردی اوچ نشان
عَرض اِیلرم نَشانه لرین اِختصاریله
حلقِ علی اصغر و بازوی شاهدين
گئچدى يتشدی قَلبِ رَسوله گذاریله
بولمم او اوخ نه حاله سالوب شاهزاده نی
مَقتَلده شَرحی کشف اولونوب اِختباريله
سیزدن ولی بو بیر سوزی من اِیلورم سئوال
گُل بَرگی نون نه نسبتی وار نُوکِ خاريله؟
گُلدن او خاری خارج اِیدوب باغبانِ دین
هم ناله اولدی باغِ وفاده هَزاریله
قان اوخ یریندن آخدی دوتوب سَپدی گوگلره
ثارالله اِیتدی عَرشی مُزیّن او ثاریله
عَرض اِیتدی لطف اوزیله اِلهی قَبول اِیله
بو جان سِپاریمی او هامی جان سِپاریله
یاتما نَجف ده یا على دور کَربلایه گَل
گور نورِ عِینون حالتِ دل نا گُواریله
اَصغر جَنازه سی اَلی اوسته فِسرده حال
صاق و صولا باخور هَوسِ اِنت صاريله
نه واردی بیر نَفر آلا اَلدن جَنازه سین
نه بیرجه غَم گسار او بی غم گساریله
شَرم اِیلوری خیامه آپارسون بالاسینی
گورمور روا بو خَجلتی اُول شَرمساریله
هر قَدر فکر اِیدوب داخی گوردی عَلاجی یوخ
چاره کَسوب عَلاقه سین اُول غَم دچاریله
آهسته گلدی زِینبی سَسلوبدی تا دِیسون
دردِ دلين او فاطمیه یادگاریله
دیشره چیخوب خیامدن عُلیا مُکرّمه
اولسون اَنیسِ مُحنَت اِمامِ کُباریله
بولمم نه گوردی سَسلدی جان اِی عزیزِ دِل
گورسون باجون سَنی نِجه بو روزگاریله
سالما باشون اَشاقه بِیله توكمه گوز یاشون
یاندیرما قَلبِ زاریمی بو حالِ زاريله
من غَم شَریکیم سَنه ویر اَصغرون منه
غم اُلفت ایلیوبدی منِ اَشک باریله
اوخلی بالانی آلدی آتاسیندان عَمّه سی
گَتدی آناسینا ویره قَلبِ فِگاریله
قُونداقی قانلی یوز گوزی قانلی بُوغاز یارا
ممکندی گور بو مَطلَب اولا اِست تاریله
من بولمورم آناسی نه حاله قالوب ولی
آنلار او که عَلاقه سی وار شیرخواریله
آلدى قوجاقینه دِئدی پَربَسته بُلبُلوم
کَسدون نه تئز عَلاقه وی بو لاله زاریله
کیم اوخلادی بوغازوی دیوانِ حَشرده
دیوانیوی خدا اِیده قومِ شَراریله
سَن اِیچمدون سُو کسدون عَلاقه فَراتدن
مَنده گرک عَلاقه کسم جُوی باریله
گهواره دن آتاندا ئوزون سَن، من آنلادیم
باشوندا شُوریوی هَوسِ وصلِ یاریله
ویرسه اگر اِجازه بابان ترک اِئیلرم
جاهِ جهانی اَمرِ اِمامِ فخاریله
دیوانه لر کیمی گزرم چوللری مُدام
درد دل ائیلرم گئجه لر کوه ساريله
قنداقوى ئولنجه دولاندیرام آغلارام
آغوشی مادرون نَدی فَرقی مَزاریله؟
(شأنی) بو شاهزادهٔ باب الحَوائجه
اولموش دَخیل بیر دلِ اُمید واریله
- پنج شنبه
- 11
- شهریور
- 1400
- ساعت
- 13:30
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه