قوریوب دُشوم سُویا یوخ گمان بالام آغلاما گلوم آغلاما
بو قدر کباب ایلمه آنان بالام آغلاما گلوم آغلاما
گورورم دوزنمی سن آجلیقا عطش ایلیوب سنه چوخ اثر
قالا آج سوسوز سُوداَمر بالا داشا بو مصیبت ایدر اثر
بیر آنا که ایچمیه سو اوزی سینه سینده سود دولانور مگر
آنان اولسون ایلمه چوخ فغان بالام آغلاما گلوم آغلاما
بُلورم علاجینی دردیوین نِدوم الده چاره یوخ آغلارام
اثر شرارهء آهیمه یانارام بو سینه می داغلارام
گورورم خراش ایدوسن یوزون الیوی قماطی ده باغلارام
هانی عقدهء دلیمی آچان بالام آغلاما گلوم آغلاما
ساتاشاندا گوزلریوه گوزوم گوزومون یاشین الرم بالا
آنالیق محبّتی جوش ایدر اوره گیم یانار ملرم بالا
داخی اوزگه چاره تاپانمارام بلگون آچوب بَلَرم بالا
ایدرم گوزوم یاشینی روان بالام آغلاما گلوم آغلاما
گورورم که ابر بهار تک بالا گوزیاشیله گوزون دولوب
اوره گون بو اودلی دلیم کیمی شرر عطشله کباب اولوب
قورویوبدی غُنچه دوداقلارون گل عارضون سارالوب سولوب
بو سولان جماله فدا آنان بالام آغلاما گلوم آغلاما
آلورام قوجاقی مه جان کیمی ایدم اوز علاقه می آشکار
بالالار کیمی سینه می دوتوب یاتاسان بیر آز اولاسان خمار
گورورم سینم یانور اود ویرور ایدوسن دوداقلاریوی کنار
یانوسان سیزیلدی سان آغلوسان بالام آغلاما گلوم آغلاما
دولانوب خیامی تاپانمادیم بیر ایچیم سو ای سودامر بالام
قورویان دوداقلارون اِیس لادام جگرون حرارتینی آلام
من اگر بو دردیله اُلمیم بو جَهاندا عُمر ایلیم قالام
یانارام بو نسگله هر زمان بالام آغلاما گلوم آغلاما
نیه گوزلرون چوخورا دوشوب نیه صورتون سارالوب بیله
نیه گَلمور آغلاماقا سسون منی آز کباب ایله صبر ایله
هامونون باشی قاریشوب علی گَله گر بو حالی آتان بُله
سو تاپار سنه بُلورم آتان بالام آغلاما گلوم آغلاما
بو گئجه کِشیکدی گَلنمیوب سنی گورماقا بالا اکبریم
من اونوندا چوخ نگرانیم نگران باخور یولا گوزلریم
دیورم گَلیدی گوریدی بیر نجه جان ویرور سوسوز اصغریم
سنه سو تاپِیدی او مهربان بالام آغلاما گلوم آغلاما
دیورم گیدوم عَمووا دیوم بالامی نفس دن عطش سالوب
ایدورم حَیا بُله یوخ سُودوم بو دور عِلتی آنان آج قالوب
هامی چاره یوللاری باغلانوب هامینون قرارین عطش آلوب
اوجالوبدی گوگلره الامان بالام آغلاما گلوم آغلاما
گینه ای (حسینی) نه دلدی بو که ایدور دینده یارا دلی
بیله دل دیماقدان اوتور خدا سنه ایلیوبدی عَطا دلی
دیمه ساده چخدی بو سوزلریم اولی ساده رَسماً آنا دلی
آنالار بالایه ایدر بیان بالام آغلاما گلوم آغلاما
- چهارشنبه
- 17
- شهریور
- 1400
- ساعت
- 23:35
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه