آه او ساعتدن یتیشدی قتلگاهه دل ملول
معدن صبر و تحمل، مام غم، دخت بتول
عصمت کبری قیزی، شیر خدایه نور عین
زلفی یوزده، اللری باشدا، دلنده شور و شین
گه گیدردی، گه دیردی این انت یاحسین؟
حالی پژمرده، گوگل قارداش سراغنده عجول
بیر خانم که گون اونون بی پرده گورمزدی یوزین
ایله بیر احواله قالمشدی ایتورمشدی اوزین
نه دوتوردی دل، دیسون تا دلده کی گزلین سوزین
نه قویوردی مقصده یتماقلیقا قوم جهول
بیر طرفدن غارت اولموشدی لباس و معجری
بیر طرفدن دور و برده شام و کوفه لشگری
بیر طرفدن هاشمیه قیزلارین شیونلری
فکرین اشغال ایلمشدی، کامه تاپموردی حصول
نه ویرن بیر تسلیت نه بیر نفر داده یتن
نه سسینه سس ویرن، نه بیر نفر رحم ایلین
نه دیوم نه حالدیدی اول کمکسیز شیرزن
حالینی درک ایتماقا عاجزدی اوهام و عقول
بیر طرفدن واریدی اهل جفادن وحشتی
بیر طرفدن وصل شاه تشنه کامه سرعتی
بیر طرفدن قاچماقا مانع اولوردی عصمتی
گه قاچاردی، گه دوراردی، حال حیرتده ملول
نه قویوردی گوز یاشی گورسون یولی زهرا قیزی
نه اولوردی طپش دل ساکت، گلوردی نه دیزی
تاپدی آخر خیمه لردن، قتلگاهه قان ریزی
مشی ایدوب اول خطیله مقصود دل اولدی وصول
ووردی ارکان وجودین پنجه غم بیربیره
جسمین ایتدی احاطه چون محیط دایره
گوردی اوخ نیزه قلج داش، چوخ توکوبلر بیر یره
آفتاب عمری آز قالدی تاپا حال اُفول
بیر چوخور یردور ولی قان موج ایدور دریا کیمی
جلوه گردور نور او یردن وادی سینا کیمی
نور نور اللّهه محو اولدی خانم موسی کیمی
دلده اَرنی قالدی حیران دختر فحل الفحول
گوردی ناگه سس گلور گل زینب ایتمه آه زار
باجی تا قارداش سسین آلدی اولوب بی اختیار
اگلشوب آلات حربی ایلدی بیربیر کنار
اولدی ظاهر پیکر مقتول اشرار ضلول
گوردی قان ایچره یوزی اوستنده بیر پیکر یاتوب
جسمینه بسکه خدنگ و نیزه و خنجر باتوب
گوئیا طاق ظفردور، باش باشا اوخلار چاتوب
نازنین اعضاسنین نقشین پوزوب سم خیول
اشقیا اوراق ایدوبلر جدینون قرآنی تک
جسمینی یکسر سویوبلار بیر منا قربانی تک
هر یارا بیر جلوه ده، چرخین مه رخشانی تک
گوئیا بیر آسمان اولدوز ایدوب گویدن نزول
صبره باخ چخموب اوزیندن عصمت پروردگار
یوز دولاندوردی سپهره، اَلده زلف مشکبار
عرض ایدوب یاذالمنن یا جاعل اللیل و نهار
آل هاشمدن اوزون ایله بو قربانی قبول
بو منیم روحیمدی یارب؟ قانینه غلطان اولوب؟
یا که بیر دسته قزل گلدور بیله خندان اولوب
نیزه لر تابوتی، شیبی قطنی، غسلی قان اولوب
مصرعندن قان آخور صحرایه مانند سیول
یثربه اوندان صورا یوز دوتدی، دلده آه و وا
شوریله سسلندی یا جدا بابا یا مصطفی
بو حسینوندور باتوبدور قانه مسلوب الرّدا
جسمنون ابعادینه مرئیدی نه عرض و نه طول
قارداشین عشقی ز بس شور آرتوربدور باشنه
قلبنون قانی آخوب گوزدن یوزه اوز باشنه
دوندی مشغول اولدی قان ایچره یاتان قارداشنه
سسلدی یا نائم المکبوب، قم یابن الرّسول
خاک و خون اولدی یارالی نعشوه قارداش فراش
شمع غمده قیزلارون یاندوردی دشمن چون فراش
ایلدی اعراب وحشی بیر جفا بو چولده فاش
ایلمز مثلین یقین اشرار خون ریز مغول
حفظ دین اوسته اوزین آماج شمشیر ایلدون
آیه آیه قانیله قرآنی تفسیر ایلدون
خانه ویرانه ایمانی تعمیر ایلدون
حشره تک تغییر تاپماز بیرده بو محکم اصول
قارداشی آخر وداعنده دیمشدی صبر ایله
ایله صبر ایتدی دایاندی امتحان مشکله
قوت قلبندن آخر صبر اوزی ایتدی گله
هر بلا اولدی حواله، ایتمدی اصلا نکول
ایتمه غم (سعدی) عملده وار قصورون بی شمار
چون (حسینی) سن، سنه جدون حسینون لطفی وار
عالم محشرده بسدور بو شرف بو افتخار
سن آنا عرض ایلسن، سسلر سنه زهرا اوغول
- پنج شنبه
- 11
- شهریور
- 1400
- ساعت
- 13:35
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه