من بو سودادن علی اَل چَکن اَصلا دَگلم
گزمَسم چُوللّری مَجنون کیمی لیلا دَگلم
گل خیالیله گرک دالدالانام خاره گِیدم
گل کیمی باشدان آتوب پرده نی بازاره گِیدم
گه گزوب چوللّری گه مَجلس اَغیاره گِیدم
گُوره‌لر عِشقده ثابت قَدمم یا دَگلم
چوخ خوش عالمدی وار اوز عالمیمه شُکریم علی
قِید عالمدن عَجب فارغ اولوب فکریم علی
صُحبتیم وردیم علی فکریم علی ذِکریم علی
اوزگه بیر صُحبته بیر کلمیه گویا دَگلم
اَشگیله مَخزن اولوب لؤلؤ مَشحونه گوزوم
دوندروب دامَنیمی دِجلۀ جِیحونه گوزوم
قویمادی پرده چَکم نکتۀ مَکنونه گوزوم
یوخسا اُز سرّیمی من بولدورن اَصلا دَگلم
گوروم قانلو باشون نیزه ده هر آن گورونور
مَه یوزین گاه نَمایان گهی پِنهان گورونور
تِل‌لرونده دوزولوب شَدّۀ مرجان گورونور
یا گوزوم یاشیدی من مَطلبه دارا دَگلم
باخوب آغلار گوزیمه اَشگیله طوفان گورورم
اَُودی دل مُلکی تَک عالم لری ویران گورورم
یا پَریشاندی خیالیم که پَریشان گورورم
تابع زُلف پَریشانوام آیا دَگلم
وَصلِ اُمّیده ورار عِشقده عُشاق قَدم
من که قَطعاً بولورم وَصلوی عالمده عَدم
اِیستیرم عالمه بو نکته نی من واضح اِیدم
که بو تَصمیم یله من اَهل تَمنّا دَگلم
گر بو تَصمیم یله تَحصیلِ مَرام اِیلمه سَم
عِشق عَوالیمینی تَسخیر تمام اِیلمه سَم
اُز گونوم تَک هامویه گونلری شام اِیلمه سَم
بول که لیلا آدینا اِسمی مُسمّا دَگلم
من بَلا طالبیم صدقیله عَن قَلب سَلیم
بو دلیلیم دی اَنیسیم غم اولوب ناله نَدیم
گلمه سم آهیم یله نالیه با عَظم رَمیم
عالم عِشقوه بولسُونله مَسیحا دَگلم
فکریله جلوه لنُور صُورتون آغلار گوزومه
دانشوب صحبته گللم سَنیله اُز اُزیمه
گورورم گلمدی بیر کلمه جَوابون سُوزومه
اُوندا بیللّم بو مَقاماته مُهیّا دَگلم
دوزدی لیلا اُزینی مَحو علی اَکبر اِیدوب
(ذهنیده) قصّه سینی زینَتِ خوش دَفتر اِیدوب
چوخ سالوب ذِهنینه اوّل کی سوزون ازبَر اِیدوب
من بو سودادن علی اَل چَکن اَصلا دَگلم
- پنج شنبه
- 11
- شهریور
- 1400
- ساعت
- 13:54
- نوشته شده توسط
- یوسف اکبری
ارسال دیدگاه