مام عَصمَتدن تاپوب فیض وِلادت مجتبی
بیت زَهرانی اِیدوب دور رَشک جَنّت مجتبی
آچدی ذّات کبریا عالم لره باب کرم
نور وحدّتدن یاراتدی بیر مَقام محترم
محفل عشق و ولاده قویدی دنیایه قدم
ایلدی اُول محفلی کانون عزّت مجتبی
ایلیوب دور نور حقّ بیت ولایتدن ظهور
خاک درگاهی اولوبدور توتیای چشم حور
شهر پیغمبر سراسر غرق نور و وجد و شور
خلق ایدوب دور یر یوزونده اوزگه حالت مجتبی
آلدی خورشید جهان نور جمال یندن ضیا
تاپدی قرص ماه گردون فیض حسنیندن جلا
پایه ی عزّتده اولدی یر یوزی رَشک سَما
مُلک دنیایه ویروب گور نه شَرافت مجتبی
عطر گیسوسی جهانه نَشر اِیدوب عطر سمن
نکهت جانبخش وحدّتدن دولوب صَحن چمن
هر گله بلبل دیردی مژده که گلدی حسن
گلشن و گلزاری ایتدی باطراوت مجتبی
قویدی دنیایه قدم بَند دل طاها بو گون
باغلادی تکریم ینه بِل موسی و عیسی بو گون
اولدی دنیایه مباهی حضرت زهرا بو گون
تا ویروب دور سینهء زهرایه زینت مجتبی
آلدی آغوشه آناسی فاطمه دُردانه سین
ایتدی نور مَشعل جان گوهر دُردانه سین
ایتدی نورانی او گوهر فاطمه کاشانه سین
ایلدی مَهد ولانی باب حاجت مجتبی
مَظهر جود علی اولدی بو مه سیمای عشق
اوغلونی آغوشه آلدی دُرّ تک دریای عشق
رمزیله تعلیم ایدوب دل بندینه سودای عشق
تا اولا سوداگر بازار وحدت مجتبی
گوز آچان دَم حَمد ایدوب خلّاقینه اُول مه جبین
باشلیوب تفسیر قرآنه ایدوب تبلیغ دین
حق ایدوب فیض ولادن سرور اهل یقین
اَهل ایمانه اولوب نور هدایت مجتبی
برج عصمتده اولوب بیر نجم رخشان آشکار
تا اولا روشن فروغ یندن جمال روزگار
نور حسنیندن اولوب خورشید عالم شرم سار
سالدی دنیایه او دم تا نور عصمت مجتبی
مقدم یندن غرق اَنعام اولدی ذرّات جهان
دین ایوین آباد ایدوب دور تاپدی شیعه تازه جان
مه بط انوار حق اولدی هامی کون و مکان
عالم امکانه آرتوردی جلالت مجتبی
ماه رحمتدی (بلوری) ماه پر فیض صیام
هر عمل اِجراسینه مین اَجر وار یوم قیام
چنگ وور دامان مولایه بو آی هر صبح و شام
تا ایده شامل سنه اِحسان و رَحمت مجتبی
- پنج شنبه
- 11
- شهریور
- 1400
- ساعت
- 14:17
- نوشته شده توسط
- یوسف اکبری
- شاعر:
-
استاد محمد علی بلوری
ارسال دیدگاه