اشقیا آیری سالیب یارینی اوز یاریندن
الینی اوزدی علی محرم اسراریندن
اسدی طوفان بلا سولدی گلستان وفا
گلی گلشندن ائدییب بلبلی گلزاریندن
او نه طوفان اونه تاراج گئدیب سنده سوروش
او ائوین قانه بویانمیش در و دیواریندن
قاپی یاندی بالا الدی او بویوک فاجعه ده
خبر آل اول قاپینین زحمت مسماریندن
آفت باد خزان دئیدی گل یاسمنه
چهره سی اولدی کبود شدت اضراریندن
گل وجودی یارالاندی دلی خونبار اولدی
بیلدی کی آیری دوشور یار وفاداریندان
نئجه دوزسون بو چتین آیریلیغا آل علی
اهل بیت ئوپدی او لحظه آنا رخساریندان
بو مصیبت نه علی، عالمی آغلار قویدی
همدمی اولدی شهیده یارا آثاریندان
حیدرین بوکدی بئلین فاطمه نین آیرلیقی
کیم بولور چکدی نه لر فرقت دلداریندان
تکجه بیر تاری بولور گوردی نه لر شیر خدا
اورگی قانه دونوب قنفذون آزاریندان
کیمدی عالمده علی تک اولا مظلوم جهان
بیر بولن کیمسه بولور تاریخین اقرایندان
دنیا تحسین ائلیر حیدر کراری مدام
عالمی بهت آپاریر جمله اظهاریندان
فخر ائدر فاطمییه حضرت طاها و علی
مین کتاب یازماق اولار عفت و کرداریندان
درس آلیب زینب کبری آناسی فاطمه دن
ائتدیگی تربیت و طاعت و رفتاریندان
بیر بئله حب ولا جمله سی ایمان گوجودور
تا دم مرگ الین چکمدی ایلقاریندان
گرچه (یاور) سوزون آز اولدی بو ماتمده ولی
چاتاسان اجریوه محشرده بو گفتاریندان
یا علی منده مقدس قاپیوین سائلیم
بهرمند ایله منی دولت سرشاریندان
دردمندم منیده ایسته گلیم درگهیوه
اوندا صحت تاپارام دعوت دینداریندان
- جمعه
- 12
- شهریور
- 1400
- ساعت
- 23:2
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه