حقیقت اهلی اولان جاه و عزّت آختارماز
مَجاز اهلی جهاندا، حقیقت آختارماز
حقیقتین اوزی عزّتدی شوکت و اجلال
تاپان حقیقتی اجلال و شوکت آختارماز
حسین امامِ مبین، نورِ چشمِ عترت دور
حسینون عشقینی هر پَست فطرت آختارماز
حسینه عاشق اولان، ناکسه بویون اگمز
رهینِ منّت اولوب، استطاعت آختارماز
حسینه عاشق اولان ال چکر تَکبُّردن
شکسته نفس اولی، جاه و ریاست آختارماز
حسین مکتبینون درسی دین و قرآن دور
اولان بو مکتبه شاگرد، نِخوت آختارماز
خرابه لرده یاتار توپراق اوسته پژمرده
سولار خزان زده گُل تک، طروات آختارماز
یتیمه قیز، اوزی محزون، باخیش یتیمانه
دوزر مصیبته، لفظِ شکایت آختارماز
دییر خرابه ده اولدوز کیمی یاخوندی باتام
سبب ندور منی شمسِ امامت آختارماز
بابام فراقی منی غصّه مرگ ایدر بولورم
ئولومدن اوزگه گوگل بیر بشارت آختارماز
آتا قوجاقینه عادت ایدن صغیره اوشاق
مگر آتاسین ایدر تَرکِ عادت، آختارماز؟
منی ایاقدان علی اکبرین فراقی سالوب
ندور سبب منی اول ماه طلعت آختارماز
گوزیمده جلوه لنور سرو قامتِ اکبر
گورن او قامتی هرگز قیامت آختارماز
اولان منیم کیمی خسته، مریضِ دردِ فراق
وصالِ یاردن اوزگه طبابت آختارماز
قانادی باغلی قوشام گوشهء خرابده من
قانادی باغلی اولان قوش، سیاحت آختارماز
قوری یر اوسته یوخوم گلمیری یاتام راحت
مگر یتیمه اوشاق خوابِ راحت آختارماز
اگر بو درد و غمیله ئولم سعادتدور
مگر اسیر، ئولومیله سعادت آختارماز
بو سیلِ اشگیله کاخِ یزیدی من یخارام
جهانه عبرت اولار اوزگه عبرت آختارماز
ایله خرابه نی آباد ایدر گوزوم یاشی
گورن مزاریمی عالی عمارت آختارماز
بنی امیّه نین اولسون گوروم عذابی شدید
که آلِ هاشمه بیر استراحت آختارماز
یزیدین آب و گِلی، ظلمیله مُخمّر اولوب
اولان خباثتی ذاتی، عدالت آختارماز
آپاردی عترتِ اطهاری شُرب مجلسینه
دَنیّ طبع، به غیر از دنائت آختارماز
او بزمین عترتِ اطهاره نه تناسبی وار
شراب خوارِ ستمگر، دیانت آختارماز
رسالت اجری بیزیم حُبّمیزدی قرآندا
دانان پیمبری اجرِ رسالت آختارماز
دیمه(حسینی) که من سیّدم، یریمدی بهشت
عبادت آختارار الله، سیادت آختارماز
گناهکار شفاعتچی آختارار دائم
گناهی اولمویان اصلاً شفاعت آختارماز
- شنبه
- 13
- شهریور
- 1400
- ساعت
- 12:10
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه