من عاشق حسینم اَیا لشکر ظلام
خیبر شکن علیدی شه لافتی آتام
عباس نامدارم و طومار عشقیده
روز ازلده ایلمیشم منده ثبت نام
عشق حسینیله من آنامدان سود ام میشم
ذکرحسینیله منه لایلای دیوب آنام
سقا قویوبدی آدیمی سلطان تشنه لب
بو فخر دور منه زیبنده دور بو نام
بیرمشک سو آپارماقا مامور ایدوب منی
من نوکرم بو نوعیله امر ایلیوب آقام
مطلوب یدور اطاعت مولا غلامیدن
مولا حسینی دور من اونا اولموشام غلام
جنگ ایتماقا اجازه یوخوم دور امامیدن
اما فراتی آلماقا رخصت ویروب امام
من حیدر اوغلیام آنام ام البنینی دور
آلّام فراتی گر اولا هر قیمته تمام
ال قویموشام گوزاسته حسینین اطاعتین
واجب ایدوب عمومه خداوند لاینام
من وعده ویرموشم آپارام خیمگاهه سو
ایفای عهدیمه نقدر وار نفس وارام
فتح شریعه جنگیله مشکل دگل منه
قصدیم دگل ولیک اله تیغ تیز آلام
شرمنده ام بلیمده کی شمشیری دن اوزوم
پیکاره بسکه رَغبتی وار دور علی الدوّام
چوخ مایلم بوگون سیزیله جنگ ایدم ولی
بو اختیاری حیف منه ویرمیوب امام
صف چکموسوز بو نوعی نظامیله دور موسوز
وار قدرتیم نظاموزی بیر حمله ده پوزام
بیرجنگ ایدم جهاندا نظیری گورونمیوب
شمشیریمی چکوب اِیلیم قصد قتل عام
بو لشکری قیرام داغودام یول آچام گیدم
ابن زیادی ذلتیلن تختیدن سالام
وحش و طیور ایچور بو فراتین سویون ولی
پیغمبرین اوشاقلارینا ایتموسوز حرام
ایمدی گلون اوزوز منه بیر مشک سو ویرون
مجبور ایتمیون الیمه من آلام حسام
سیزلرده کوردللره اثر ایتمور نصیحتیم
شیطان سیزه مسلط اولوب اولموسوز لَئام
- شنبه
- 13
- شهریور
- 1400
- ساعت
- 12:15
- نوشته شده توسط
- یوسف اکبری
- شاعر:
-
حاج مجید اشکی تبریزی
ارسال دیدگاه