ای حسینیم سویله سن بو شورش و غوغا ندور
دَمبدم بو آه و بو فریاد واویلا ندور؟
بو کلام غم فزا هر دم که ایلورسن بیان
آرتورور غم غصّه می ایلور منی چوخ ناتوان
چون بیله معلوم اولور یوخدور حیاتوندن گمان
زینبه سندن صورا دنیا و مافیها ندور
گر چه زینب دور آدیم دُخت بَتول اَطهرم
خواهر غم دیده وَم زهرا آناما مَظهرم
منده قارداش سن کیمی مطیع اَمر داورم
جلوه گاه عِشقده اَدنا ندور اَعلا ندور
فُرقهء اَشراریده یوخ اِعتبار و اِعتقاد
گوز تیکوب دور قتلیو هر ظلمه بو قوم عناد
بیله ظلم اُولماز بو اَهل کوفه دن فریاد و داد
من اُولوم قربان سنه هر دم بو اِستغنا ندور
چون مُقدّر دور گرک چَکسون جَفا آلِ رَسول
اُولمارام هرگز جفای اَشقیادن دل ملول
گر چه چوخ مُشکل دی هِجرانون ولی قیلّام قبول
عاشق دل دادیه راحت ندور ایذا ندور
ناره وورماقدان اوزون اولماز حَذر پَروانه ده
قولّاری باغلی دولاِنام مجلس بیگانه ده
نچه گون قالّام یولوندا گوشهء ویرانه ده
بلمرم مَسکن ندور مَنزل ندور مَاوا ندور
چون بو صَحراده یتوب دور قتل یوه فرمان سنه
حیف که ممکن دگل جانی ایدم قربان سنه
منده ویرّم بو ایکی طفلی بو گون قربان سنه
حقّه قربان اولماقا صُغرا ندور کُبرا ندور
گر چکم بو دشتیده یوز مین غم و درد و بلا
بی محابا صَبر قیلّام تا دم روز جَزا
قانلی عمامه ن اَلیمده حَشره گلّم یا اَخا
بلمرم مَحشر ندور کُوثر ندور طُوبا ندور
عرض قیلّام بار اللِها کو حسین کو کربلا؟
کو یزید بی حیا کو خُولی و شِمر دَغا
مَحشره بیر شُور سالّام تتّرسین عَرش خدا
بِلمِسُون لر شیعه حُول مَحشر کُبرا ندور
چون اولوب بو عالمه ذَرّات عالم دل حَزین
(شاکی) دِلخَسته ام اولّام عَزا دار و غَمین
اِیله دُوشموش باشیمه شُوقیله چون شُور حسین
بلمورم طَبعیم ده بو اِملا ندور اِنشا ندور
- شنبه
- 13
- شهریور
- 1400
- ساعت
- 13:8
- نوشته شده توسط
- یوسف اکبری
- شاعر:
-
ملا خلیل شاکی ابدالی
ارسال دیدگاه