شهریار عالمین ای جان جانان یا حسین
ای قویان عالملری عشقینده حیران یا حسین
ای گوزل آدی اولان هر چاره سیز درده دوا
سن حبیب لم یزل سن شافع روز جزا
کشتی امید سن عشاقه مصباح الهدا
بحر عشقین ائیلوب دیللرده طوفان یا حسین
كیم گلیب درگاهیوه تاپدی جلال و اعتبار
كوی عشقیندن گدالر اخذ ائدر عز و وقار
سفره جودونده اولموش اهل عرفان ریزه خوار
درگهین دارالکرم دی کوی احسان یا حسین
اولماسا گر عشق یول تاپماز سنه عقل و خرد
کوکب اجلالیوی خامه ائده بیلمز رصد
قالمیشام حیران الیمدن دوت اوزون ایله مدد
مكتبونده اولموشام طفل دبستان یا حسین
سن طریق عشقده هر سالکین منهاجی سن
تاج خلقتسن قویوبسان باشه قاندان تاجی سن
روز محشرده اولارسان اهل عشقه ناجی سن
قویماسان قالسونلا محشرده پریشان یا حسین
آدم و حوانی چكدین ساحیله بحرانیدن
جان عیسانی قوتاردین فتنه دونانیدن
كشتی نوحی آپاردین مقصده طوفانیدن
سن خلیله ائیلدین ناری گلستان یا حسین
بحر صبرین داشمادی هر قدر موج ائتدی بلا
عهدیوه ائتدین وفا چون البلاء للولا
ائیلدین کرب و بلا توپراقینی خاك شفا
تربت پاکوندی هر بیر درده درمان یاحسین
حق یولوندا ائیلدین ایثار، ثارالله سن
سن حقیقت اهلینه هم رهنما هم راه سن
کایناته حکم ائدن یالقیز یارالی شاه سن
تحت امریندور سنون بو کون و امکان یا حسین
قتلگهده ائیلدون معبودیله راز و نیاز
قانلی محراب ایچره قیلدین شوقیله قانلی نماز
سن شفاعت امرینه آلدون چوخور یئرده جواز
بلکه سوزان ائتمسین عشاقی نیران یاحسین
نیزیه چیخدی باشین حق اهلینه یول گوستره
باشلادی قرآن یارالی دیللره تسكین وئره
ویردی تاریخه ندا ذلت یاراشماز بیز لره
آخدی قان ناحقّه چکدی خط بطلان یا حسین
بیلمیرم محشر نمایان اولمادی آیا ندن
اوندا کی کسدی جفاییله باشین قوم فتن
قالدی اوچ گون پیکرین توپراق لار اوسته بی کفن
تاپمادی زینب او چولده بیر مسلمان یا حسین
اون بیرماه محرم گلدی زینب مقتله
گوردی نعشین یئرده دی باشیین دوشوب الدن اله
آز قالیب دی خرمن صبرین خانیم وئرسین یئله
سسلدی جانیم اولا بو جانه قوربان یا حسین
جان زینب دین یولوندا تشنه قانه باتمیسان
باش و جانیندن گئچیب الحق مرامه چاتمیسان
وای منه گونلر قباقینده نه راحت یاتمیسان
وار یئری ائتسم اولونجه داد و افغان یا حسین
اولموشام (مدهوش) شاها عشق پاکیندن مدام
فخر قیلام شاهلارا اولسام بو درگهده غلام
دوت الیمدن قیل کرم ای پادشاه ذوالکرام
سائیله سیزدن اولار لطف فراوان یا حسین
ای شفاعت ائیلیین قنداق ایچینده فطرسی
قورتاران ظلمات دریادن جناب یونسی
بیر اشاره یله قوتار محشر گونی بو بیکسی
منده هر آن اولموشام عشقونده نالان یا حسین
- یکشنبه
- 14
- شهریور
- 1400
- ساعت
- 13:5
- نوشته شده توسط
- یوسف اکبری
- شاعر:
-
محمد هوشمند
ارسال دیدگاه