اگر مشرف اولا لطف بو ترابیله
ایدر مقابله هر ذرّه آفتابیله
او ذرّه ده که اولا لطف بوتراپ پدید
او ذرّه دن یری وار کسبِ نور ایده خورشید
باشیمدا شور ولایت دلیمده شور جلی
بو دور خیالیم اوزی گر توجه ایتسه علی
جهانه طیب ویرم عنبر خطائیله
مناقب اسدالله مرتضی ئیله
دوزم مدیحه زهراده لؤلؤ منشور
بو مجلسه آپارا غبطه خلد عَدْنده حور
سوزون اوقدر دوزم رشته سینده دُرّ ِ ثَمین
بو دُرّ دَن اولا جنتده عِقدِ حورُالْعین
او قدر نوک قلم دن توکم صحیفه گل
دوباره گتمیه بیر گلستانه بیر بلبل
بهشت تک بزیَم سوز گُلیله دنیانی
یازام مفاخرهء مرتضی و زهرانی
علاقه مندیدی هر کسی علی اعلایه
توجه ایلسون عرضیمده لفظ و معنایه
محبّ دور اولاری که بتول عذرایه
درست ملتفت اولسون لا قول زهرایه
بوسوز که شیعه لره چوخ بیوک بشارت دور
زبانحال دگور معتبر روایت دور
يازار صحیفه قرخ بش ده مجمعُ النّورِین
ویرر مُحب لره سورِ قلب قرّةالْعین
مقام فخرده بیرگون علی ولیِّ خدا
مخاطب ایتدی بتولی بویوردی یازهرا
مگر یوخوندی خبر؟ بو سوزی ایشیت مندن
آتان رسولِ اَمین چوخ سُوَر منی سندن
دوتوب عم اوغلوسونا یوز خطاب ایدوب زهرا
بو سوز نه سوزدی دیورسن عم اوغلی واعَجَبا
نجه اولور بو؟ آتام چوخ سُوه سنی مندن
آتام پیمبره من که یاخون راقام سندن
رسول اکرم ین عالمده میوه دلی یم
بير عضو عضولریندن، او شاهه سوگلیم
او گلستاندا آتام مشک بوی وَرْدی منم
او سرورین وَلَدِ منحصر به فردی منم
دینده بو سوزی زهرا علی اعلایه
جواب ویردی شه بی مثال زهرایه
اینان موسان سوزیمی ای عزیزه عالم
حضور حضرت طاهایه گل گیداخ با هم
گوراخ کیمین سوزی مقبول اولور و یا مطرود
قضاوت ایتسون آرامی زدا احمد محمود
دوروب ولی خدائیله فاطمه خُرَّم
حضور احمد محموده گلدیلر توأم
تَقَدُّم ایلدی زهرا او بُرجِ عصمته ماه
کمال نازیله عرض ایتدی یا رسول الله
سنون یانوندا عم اوغلوم اَحَبّ دور يا من؟
بویور صریح ینی سّرِّ ضمیری قیل روشن
بیوردی ختم رُسل پادشاه مُلک حجیز
اَحَبّ سن منه سن، مرتضى ده سندن عزيز
على بو يرده بيوردى اَلَمْ اَقُل زهرا؟
منه ديلّله بو عالمده وُلْدِ ذات تُقى
ایشتدی بو سوزی سسلندی حضرت زهرا
عم اوغلی جان اَنا بنتِ خديجةِ الكبرى
يوزين بتوله دوتوب تاجدار مُلك وفا
خطاب قيلدى كه يا فاطمه اَنا بْنُ صَفا
جواب ویردی تفاخرله عصمت کبری
آتام دى سِدْرَةُ المنتهى شه بطحا
على بيوردى كه فَخْرُالِّلوى منم زهرا
جواب ويردى شه دينه عصمت عُليا
منيم آتام دى ره مُستقيم دينه سَراج
ايدن دنى فَتَدَلّى مقامينه معراج
منيم آتام دى ويرن افتخار كونينه
او شهدن اوزگه یتن کیمدی قاب قُوسینه
بیوردی شیر خدا وُلْدِ محصِنات منم
جواب ویردی خانم بنت صالِحات منم
خطاب ایتدی بتوله ولیِّ رَبَّ جليل
منيم قاپومدا ایدر فخر خدمته جِبريل
خانم ديدى منيله صحبت ايليوب راحيل
گویون ملک لری دور خادمیم قبیل قبیل
خطاب ایلدی زهرایه شاه مُلك ولا
منه محلّ ولادت اولوبدى بيت خدا
جواب ويردى خانم رتبه ده مَنَم اعلا
مَنَم او كيمسه كه زُوِّجْتُّ في اسَّماءِ الْعُلى
خطاب ایتدی علی حامِلُ الّلوایم من
جواب ویردی خانم بنتِ مُصطفایم من
علی ديدی که منم شیر شرزه آجام
مَنَم مُرَوِّجِ احکام و پرچم اسلام
دینده بو سوزی کهف الأرامِل و اَيْتام
گلوب تکلّمه اُمّ المصائب و آلام
منیم آتام دی سبب خلق آبیله خاکه
منیم آتام دی او کس گیتدی سیر اَفلاکه
علی بيوردی که مؤمنلره منم صالح
دانان ولایتیمی اهل ناری دور طالح
خانم دیدی منم اول کس که مُصطفادی آتام
حَبیب ذّات خدا خَتم اَنبیادی آتام
علی بیوردی اَنَاالضّارِبُ على التَّاویل
من اولماسام کیم ایدر حقّ کلامینه تجلیل
منیم الیمده اگر اولماسا بو تیغ دو سر
موحِّد اولماز، اولار یر یوزی بوتون کافر
منیم الیمده اگر اولماسیدی بو شمشیر
آتان پیمبرین اولمازدی دینی عالم گیر
خانم بویوردی که دُرج رسالته گُهرم
هامی بلالره تأویل اوسته من سِپرم
اوزون که ضارِب تأویل ایلوسن ثمثیل
مَنَم عم اوغلی بو عالمده جِنَّةُ التَّأويل
علی بیوردی که من طوریده اولان شَجَرم
جواب ویردی خانم من او نخله ده ثَمَرم
مَنَم بو عالم امكان آرا همان شَجره
كه سود بخشدى تا حشر جِنّيله بَشره
بيوردى حضرت زهرايه شاهِ عرشْ وقار
منيم ولايتی مه اَژدها اِیدوب اِقرار
خانم بویوردی منم منزلتده سندن عَظیم
منیم آتام دی غِياثُ الْوَرى، نبىِّ کریم
علی بیوردی منم بیر نَبَأ که حَیِّ قدیم
سایوب منی اوزی قرآن مُنْزَلنده عَظیم
خانم بویوردی آتام دور منيم او شخص کریم
که خُلقينى سایوب الله مُصْحَف نده عظیم
علی بویوردی منم کردگاره حَبْلِ متین
بو حَبْلَه چنگ ورانلار تاپار نجات یقین
خانم بویوردی منیم ده بابام رَسول اَمین
امان خَلقیدی، صادق مَلاذِ اهل زمین
علی بیوردی منم بو جهاندا لیثِ حُروب
من ایتمیشم هامی شَجْعان عالمی مَغلوب
خانم بویوردی اَنأ بنت مَنْ هُوَ الْمحبوب
بَغش لنر او شَفاعت اِیدنده جمله ذُنُوب
علی بیوردی تانور فاطمه منی عالم
نَماز اُوسته مَنَم سايله وِیرن خاتم
خانم بویوردی که سندن منم علی اکرم
منیم آتام دی بو عالمده سیّد عالم
علی بویوردی بنی هاشم ین امیری منم
تمام جنگلرین تیز چنگ شیری منم
خانم بیوردی منیم ده آتام محمد دور
او مُصطفادی که گویلرده آدی اَحمد دور
علی بویوردی که من سیّد الوصَییِنَم
آتان دی مُنْذِر اگر، مَن ده هادی دینَم
خانم بویوردی که من نُور چِشم ياسينم
سرور جان و دل سیّد النَّبیی نم
علی ديدی منیم آدیم شُجاع مَکّی دور
خانم ديدی آتام احمد، نَبىِّ اُمّى دور
نَبیَّ اُمىَّ و مَكى نُور چشمی منم
ریاض عصمته مَستوره بیر گُل سَمنم
علی بیوردی آدیم پَهلوانِ اَورع دور
خانم بيوردى آتام شافع و مُشفع دور
على ديدى مَنَم آخَر قَسيم جَنّت و نار
خانم بيوردى اَنَا بنت اَحمد المُختار
بيوردى شيرِ خداوند قاتل الجانّم
خانم بيوردى كه دُخت رَسول دَيّانم
منم بيوردى شه دين خِيْرةُ الرَّحمن
خانم ديدى اَنَا ايضاً خِيَرَةِ النِّسْوان
على ديدى مَنم اَعلى خدا جواری نده
دانشديران مَنم اَصحاب كَهفى غاری نده
خانم بيورى مَنيم ده آتام دى اَصل نَعيم
نَبىَّ رَحمت و مُؤمن لره رَؤف و رَحيم
على بيوردى كه من نَفس اَحمدم زَهرا
گواه دور بونا قُرآن دا لَفظ اَنْفُسَنا
خانم بیوردی که قُرآن دا خالق رَحمن
خبر ویروب مَنی، لَفظ نِساءُنا، بُرهان
على بيوردى او نَخلَم كه واردى چُوخ ثَمریم
اُولولّا عِلميم يله بَهرمَند شعیه لریم
خانم دیدی اَنَا بَحْرٌ بِعِلْمی يَغْتَرِفُون
ایدوب دی عِصمت و عِفّت دُرى مَنى مَشحون
علی دیدی منه اوز آدینی قویوب دی خدا
منم مُخاطب اِسمِ عَلى او دور اَعلا
خانم بيوردى اَنَا الَفاطمهْ هُوَ الَفاطِر
منى ده آدّا سنه مثل ايدوب حقِّ غافِر
على بيوردى منم جمله عارف ينه حَيات
خانم ديدى كه منم راغبی نه فُلكِ نَجات
علی بیوردی مَنَم ذِکرده اولّان حامیم
خانم بیوردی مَنی طس سایوب خدای کریم
علی بیوردی منم بو حهاندا کَنز غَنى
خانم بیوردی اَنَا ايْضاً كَلِمَةُ الحسنى
علی بیوردی من اُولدوم وسیلهء اَعظم
گذشت اُولوندی اَزل گون خَطیئهء آدم
خانم بیوردی مَنَم الله یانندا چُوخ اَکرم
مَنَم وسیله، قَبول اُولدی تُوبهء آدم
علی بیوردی که من جِسم عالمه رُوحم
بو عالم ایچره مِثال سَفینهء نُوحَ م
همان سَفینه که اَهلی نَجی دور عالمده
تخلُّف اِيلين اُوندان غَریق اولار یَم ده
خانم بیوردی که مَنده شَریک دعوتیم
سَفینه صاحبی نون مُعجزِ نُبوَّتيم
على بيوردى منم بَحر عِلم ده طُوفان
خانم بیوردی او دریاده منده کَشتی بان
علی بیوردی او فُلكه اَزلده مِعمارم
خانم بیوردی اونون سینه سینده مِسمارم
علی بیوردی منم حِفظ فُلكه نَسيم
خانم بيوردى منم نَهر كُوثر و تَسنيم
على بيوردى منم عَلم اَنبياى سَلَف
خانم بیوردی منم بِنت سِیدالاَشرف
منم على ديدى قرآندا بِئر و قَصر مَشيد
خانم بیوردی منم مادر حسین شَهید
اگر دیه لّه سنه خلق آرا ابُوالحسنین
من اَمَّم اول حسنينه، رَسُوله قُرَّةُ الِعين
علی دیدی مَنَم اُول مِهر یانیم دا جُفت قَمر
خانم بیوردی مَنَم مادر شُبَير و، شَبَر
على بيوردی که بعد الرَسول فی الدارین
منم به اَمر خداوند سید الثَقَلِین
خانم بیوردی منم بِرَّةُ الزَّكيه كه حقّ
نِساء عالم ايچنده مَنی سِچوب مُطلق
بو یرده نِطقه گلوب دور رَسول عالمیان
دیدی دانشما قیزیم چون علیدی ذُوالبُرهان
گلوب تکلُّمه زهرا ایدوب دی عرض آتا جان
منم او کس آتاما گوندروب خدا قُرآن
علی بیوردی منم الامینُ الْاَصْلَع
خانم بيوردى اَنَا الْكُوكب الَّذى يَلْمَعْ
يرى گوئى يارادان دان خدای کُون و مَکان
گورونمیوب دی منیم تک سِتارهء رَخشان
آچوب دوباره لب دُرفشاننى طاها
گلوب تَکلمه فَرمایش اِیتدی یا زَهرا
منیم عَم اوغلوم علی مَنبع جَلالت دور
اولّاندا روز جَزا صاحب شَفاعت دور
اولوب جوابه دوباره بتول آماده
دیدی شَفیعه مَنَم عَرصه گاه عُقباده
حِمایت ایتمه عَم اوغلوندان ای رَسول اَنام
اونیله قُوی من اِیدوم اوز کلام یمی اِتمام
علی بیوردی اَنَا مِن مُحمدٍ لَحمَة
مثال نَفسم اونا اِنَّ بَيْنَنا قُرْبَة
خانم ديدى آتامين وارث فَضيلت يم
سرور سينه سى جِسمنده قانيَم اَتيَم
على ديدى صُحُفَم دُرّ ِ دانِشه صَدفَم
خانم بيوردى كه من لَعل مَعدن شَرفَمْ
خطاب ایتدی علی من ولیّ ِ زُلْفايَم
خانم بيوردى كه منده بَتول عُذرايم
خانم دوباره بيان ايلدى اَنَا الخَمْساء
مِنَ الْكِساءِ_و رَبّ السماء اَنَا الحُسنى
على بیوردی منم بو جهاندا نُور وَری
خانم بیوردی بَسیم دور بو فَخر اَنَا الزّهرا
بو سوزلری ایشیدنده رَسول عالمیان
گلوب تکلّمه آچدی دوباره دُرج دهان
بیوردی ای دل غم دیده مین سروری قیزیم
ایشقلی گوزلری مون بو جهاندا نُوری قیزیم
ایاقه دور بالا اولما مَلول و دلخسته
باشندان اوپ عمون اوغلی علیدن عِذر ایسته
بو دور یانیمدا دوروب جَبرئيل و ميكائيل
علاوه قابض الاَرواح برده اِسرافيل
گلوب اولاریله دُورت مین مَلَک بو مأوایه
ایدولّه جمله حِمايت علىِّ اعلايه
اويان طرفده رَوائيل و قارداشيم راحيل
دوروب ادبله یانین جا ملک قبیل قبیل
اولاردا عدّده دُورت مین دور ای یگانه گُهَر
سنون عم اوغلون علی دن حِمایت ایلوللّر
خانم دوروبدی علی دن چوخ اِعتذار ایتدی
باشیندان اوپدی لبین دن گُهَر نِثار ایتدی
دیدی بغشله منی یا اَبا الحسن سندن
چوخ اعتذار ایدورم اولما دل غمین مندن
بلنمورم ندی مفهومی بو مُعمّانين
الندن اوپدی علی ده بَتول عُذرانین
یازیلمیوب دی روایتده اوپماقا علّت
ولی خیاله گلور بوردا واردی بر حِکمت
سایوب خدا اوز اَلی شاه لافتی الینی
گرک اوپه هامی عالم ده مُرتضی اَلینی
على اَلى ايكى دنياده ذُوالجَلال اَلى دور
على اَلى شه بی مثل و لايزال اَلى دور
علی دى حامىِ كلِّ عَوالم اِمكان
علی دى دادرَس خلق كائناً ما كان
نه تك حِمايت ايدوب دور رسول آگاهه
او اَلدى مُشكل آچان جِمله ماسَواللّهه
تمام خَلقه حِمايت ايدوب دى دست على
اونا حِمايت ايدن اَلدى تك بَتولين اَلى
على بُلوردى همان اَل نه خدمت ايليه جاق
وَصىِّ مُطلقه بر گون حِمایت ایلیه جاق
او اَلدى قويمادى چکسونله بِیعته شاهی
که اوپ مدی اَسَدالله دست رُوباهی
دوتان همان اَليدى دامن يَداللّهى
چکوب سالان یوزی اوسته فَریق گُمراهی
اَيا امام زمان يا بَقِيَّة الرّحْمن
بو عَرضيمه اِيدورم من اُوزوندن اِستيذانّ
دینمورم او اَله نه بُیوک جَفا یتدی
علی اوپُن اَلی قُنفُذ وروب شکست ایتدی
او الده تا واریدی اِستطاعت و قُدرت
رَعیّت ایلیه بلمزدی شاهنه جُرأت
همینکه دوشدی او ال طاقت و توانادن
اوزولدی دامن مَقصود، دست زَهرادن
یتوردی بیر یره ظُلمین او قُوم کینه مآب
سالندی گردن حُبل المَتینِ دینه طَناب
دفاعه قالمادى خِيرالنّسانين اِمکانی
علینی چِکدی یوزی اُوسته مَسجده ثانی
بلنمورم که نه حاله قالوب او فَخر رِجال
بو قَدر وار که امام اولدی چُوخ پَریشان حال
لباس لر یقوشوب بوینونا فشاره دوشوب
ولی لَم یَزلی حال اِحتضاره دوشوب
او وقت اولوب آیلوب حال غشوه دن زَهرا
گوروب نه وار او جماعت نه شاه بی هَمتا
بیوردی فضّيه دُخت حَبیب لَم یَزلی
بیان ایله گوروم بَس هانی عَم اوغلوم علی
جواب ویردی که ای دُختر رَسول اَمین
آپاردی بِیعته مُولانی اَمّت بی دين
خانم سالوب حسنینی یانین جا پژمرده
کمال ضَعف یله بیر تازه گُل تَک اَفسرده
گوزون ده خون جگر دلده نالهء جانکاه
گلوب دی مسجده رِیحانهء رَسول اَلله
قیام ایدوب یدِ مَبسوطِ حقْ اِعانت ينه
تمام عالمه حامى على حِمايت ينه
گُورنده قُولّارى باغلى علىِّ عُمرانى
گتوردی ناله سی فریاده کُون و اِمکانی
اوجا سسیله بیوردی او غم کش دُوران
حَیا ایدون اوتانون اَل چَکون عَم اوغلوم دان
مگر بو فکرده سوز ای تَوابعِ طاغُوت؟
قالا یتیم حسنینیم سُولا گل لاهُوت
هَله منیم آتامون خشک اولمیوب کَفَنی
چخوب سوزوندن اونون سالموسوز بو حاله منی
منیم جَلالتیمه بیر دلیل دور اِنّى
آتام بيانى كه زَهراءُ بَضْعَةٌ مِنّی
رِضای ذات خدا دور رِضاسی زَهرا نون
گلر او اینجیه قَهره خداسی زَهرا نون
دیدیق جا آخدی جگر قانی چِهر اَنورینه
پوزولدی حالی دوتوب غِیظ اَل آتدی مَعجری نه
یتوردی مَعجره اَل تا حَبیبهء باری
گلوب تَلاطمه دریای قَهر قَهّاری
گورون دی عالم امکاندا قَهردن آثار
هوانی چُولقالادی رَعد و بَرق و گرد و غبار
یر ایتدی زَلزَله قاخدی گویه در و دیوار
یره دوشه یاخون اُولدی بو گُنبد دَوّار
او قدّر قالمادی قَهار لایَزال و وَدُود
تمام عالم ایجادی ایلیه نابود
دوشوب له وحشته یکسر مَهاجر و اَنصار
علینی بوشلادی لار مُلْحِدينِ کَینه شعار
گوروب یاخوندی خراب اُولسون عالم اِمکان
وَصیِّ مُطلقِ طاها بيوردى يا سلمان
اوزون یتور شَرف دُودمان یاسینه
اَماندی قُویما دل آچشون بَتول، نَفرینه
اوزون یتوردی حَضُور بَتُوله تا سلمان
دیدی آتام آنام اُولسُون خانم سَنه قُربان
آتان پِیمبر رَحمت دور ای گُل یاسین
دایان آتان کیمی هر ظَلمه، اِیلمه نَفرین
جَواب ویردی خانم بو نه سُوزدی یا سَلمان؟
نِجه اُولور من اِیدم بو جَفایه تاب و تَوان
دوشوب بو فکره بو بی رَحم و بی وفا اُمّت
ولیَّ حقّ دن آلسون لا جَبْریله بِيعت
دایانسا ایتمسه بِیعت علی، بو قُوم لَئيم
مَنیم بالالاری می اِیلسونله خوار و یَتیم
قلج اَلنده باشی اُوسته زادهء خَطّاب
علی قانندان ایده تیغ ین اِیستوری سیراب
بر آیری مَسئله وار برده بُوردا یا سلمان
مُهمّ مَسئله دور اَمر ايدوب خداى جَهان
یتنده صدمه وجود اِمامه دنیاده
گرگدی نُصرته مأموم اُولسون آماده
بو دور وَظیفهء شَرعی هامی مسلمانه
که قویماسین یته صَدمه ولیِّ سُبحانه
اوزين رَعيّت اِمامه گَرک فَدا اِیتسون
اِمام نَفسینی هر وَرطه دن رَها اِیتسون
منیم عم اوغلوم علی حُجّت اِلهی دور
امامِ مردمِ ما بینِ ماه و ماهی دور
اولوب جَری گورورم فاضله بو گون مَفضُول
دایان سام اِیلیه جاقلار عم اوغلومی مَقتول
گوروب دی زادهء خطاب تا بو فاجِعه نی
علی دن ال گوتوروب دور او بی حَیای دَنی
قِیتدّی لر ایوه پَژمرده حال آلعبا
آنا دان آلدی بو سَر مشقی زِینب کُبرى
علی قیزی آنادان اورگنوب بو مَسئله نى
اولار اِمامه رَعیّت کمک لقی عَلنی
برینده اولسا تکالیف دینه آگاهی
نجه دُوزر گوره قان ایچره حُجة اللّهى
بتول مَکتب نون با شَرف مُحَصِّلَه سى
گوروب که رَزم گهی دول دوروب غَریو سسی
دیولّه کوفه لیلر اُلدورون اوغُول سوزدى
اُلوب کمک لری یوخ داد خواهی یالقوزدی
شُجاعت یله شَهامت نمونه سی زِینب
او سَس لری اِیشیدنده بُولوب نَدور مَطلب
گوروب وظیفهء شَرعیدی ایلسون نُصرت
خیام طاهره دن چخدی مَعدن عِصمت
عقیلة العرَب اُمّ المصائب دوران
الى باشندا اوزی وا مُحمّدا گویان
دُرِ يگانهء دریای عِزّ و مَجد و شَرف
کمال سرعتیله قاچدی قَتلگاهه طرف
یتیشدی گوردی دُوروب اَشقیای کوفه و شام
امام قتل ینه آماده اَلده تیغ و حِسام
دوتوب لا دور و بَرین کوفیان بَد آئين
یارالی قان آراسندا دُوشوب اِمام مُبین
النده خَنجر خون خوار شِمر بی ایمان
دوتوب دی قان گوزینی متّصل دیور قان قان
دل عَنودی زِ بَس بُغض و کینه ائيله دولوب
امام قتل نه اول بی حيا مُباشِر اولوب
امام سینه سی اوستنده اگلشوب او دنی
یاخون دی اُلدوره آرام جانِ فاطمه نی
قویوبدی خَنجر خُونریزی شاه حَنجَری نه
ویرور دَمادَم او بی شرم زور خَنجَری نه
باجی گورنده که قاتل اَلنده دور قارداش
کسیل دی چاره سی گوزدن توکوب یوزه قان یاش
باخوب اویان بویانا دُخت حِیدر کَرار
گوروب آت اُوسته دُوروب ابن سَعد کینه شُعار
پوزول دی حالی گلوب شُوره چَکدی بیر فَریاد
یُوزین او کافَره دُوتدی بِقصدِ اِستمداد
دِیدی سِتمله بو آفاقی یاندروب یا خوسان
مَنیم حسینمی شِمر اُلدورور دوروب با خوسان
ایدوب دی حُبّ ریاست سَنی ایله مَغرور
که بُلموسن نِجه زَهرا قیزی اولوب مَجبور
ایله عَلاجنی دشمن کَسوب دی هر یان دان
که اِستعانت ایدور تابِ عان سُفیان دان
یوخون دی واهمه گیرم جَزا و عُقبادن
اوتان حَیا ایله بیر لا مَحاله زَهرادن
باشین سالوب اَشاقا دینمدی او بی ناموس
او بی حَیادن اُولاندا عَلی قیزی مأیوس
عَلاج تاپمادی مَضطرّ قالدی دُخت بَتول
دولان دیروب یوزینی لشکره حَزین و مَلول
دیدی بو قَدّر جَماعتده دین و ایمان یوخ؟
سیزون ایچوزده مَگر بیر نفر مسلمان یوخ؟
بو امر خیریله اعمالینه قِصاص اِیلسون
حسینى شِمرین اَلندن گلوب خِلاص اِیلسون
گوروب تَرحُّم ایدن اولمادی او لشکردن
یوگوردی مُضطَربُ الْحال دوتدی خَنجَردن
خِطاب ایلدی شِمره نَدور بو ظُلم و عِناد
مَنیم حسینمی اُل دورمه ای ایوی بر باد
ندور بو کینه و بو بُغض ای جَفا کانی
یارالی قارداشمون آز قالور چخا جانی
چکیل کناره گلوم بر یارالارین دان اُوپُوم
ایدوبدی ضعف سرشگیله آنّينا سُو سَپوم
چکیل کناره گیدوم خوردا قیزلارین گتوروم
دُولاندُیروم باشنا آرزوسی نه یتوروم
چکیل کناره اُلور ایمدی که دُویون جا گوروم
گوزی آخور یوزینی قبله سَمتی نه چُووروم
چکیل کناره چُوخ اینج تمه جسمین ای نا کس
کسورسن ایمدی که ظالم مَنيم ده باشمی کس
بُلن مُورم نه یِره ایش دایاندی یا زَهرا
یِره یخلدی یُوزی اُوسته زِینب کُبری
ُ#حسینی اِیلدی رُوحُ الْقُدُس سَنه اِلهام
چَكلدی رِشتهء نَظمه بُو نَظم تاپدی نِظام
جَزا گُونی اُولاجاق دور اَلونده بو طُغری
شَفاعت اِیلیه جاق دور سَنه آنان زَهرا
چخات ما اُوندا یادون دان هامی اَحِبّانی
خُصوصاً اُولدی او کس که بو مَطلبه بانی
بو آستانه ده نوكردی پاک نیّتى وار
مُحِبّ ِ آل عبادور حسینه نِسبتی وار
اونون رَفاقتی صُوری دَگول اُصولی دور
آدی غُلام رضا شَهرتی رَسولی دور
ریا و عِیب دن عاریدی واردی چوخ ادبی
بو خلق ایچنده اونون خُشگبار دور لَقَبی
اونیله با هم ایده لطف خالق یکتا
نَصیب اولا حَرم پاک سِّيّدالشَهدا
او یرده شُعلهء آهیله سینه داغلیا سوز
صدا صدایه ویروب بیر دویون جا آغلیا سوز
خدای لَم یَزَل ای قُدرت و کَرم کانی
بو روسیاهه عَطا ایله عُمر طُولانی
موفق ایله وارام تا حسینه خدمت اِیدوم
بو خدمتی اوزومه تُوشهء قیامت اِیدوم
گیچن گونوم که گچوب عُمریمه حساب ایلمه
کتاب عُمری اوزات آخِرِ کتاب اِیلمه
ایدوم صَحیح رَوایاتی اِنتخاب یازوم
حسین مصائبنه آیری بیر کتاب یازوم
سَنی وَليّون علی لُطف بی حِساب اِیله
دِعامی اِیلمه مَردود، مُستجاب اِیله
- دوشنبه
- 15
- شهریور
- 1400
- ساعت
- 23:0
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه