گچر بو عمر عزیزیم اماندی ایلمه غفلت
اوُزیوه کسب ایله بیر آبرو و فضل و شرافت
اورک گوزیله نظر سال وفاسیز عالمه بیر باخ
مباد تولاناسان بو جهانه ایتگله دقت
بوراخ بو خلقی دوت آل محمدین اتگیندن
ذخیره اخذ ایله عقبایه قویما فوت اولا فرصت
حسینه آغلاماقین اجری وار مصائبون ده قلم ویر
حسیندی روز قیامت ایدن بو خلقه شفاعت
دوشور خیاله أو ساعت که بزم ابن زیاده
گیدوب حرملری گوز یاشلی دلده بیم اسارت
بیله خیال ایلمه مجلس عبید زیاده
گلن تمام رجال شریفدی او جماعت
نه بلکه جمله اراذل جماعتی او ستم گر
او گون او مجلسه ائتمشدی بیر خیالیله دعوت
تصور ایله نحاله قالوب بنات پیمبر
قدم او بزمه قویاندا گورنده خلقی او ساعت
او دور حرم لر ایچینده اوزینی ایلدی پنهان
بلا خزینه سی زینب او مرتضایه شباهت
دولاندوروب گوزین ابن زیاد ناکس و بی دین
بلالی زینبی گوردی سوروشدی کیم دی او عورت
جواب گلمدی اوّل سوالین ایلدی تکرار
جواب ویردیله زینب دی کان عفت و عصمت
ایشیتدی زینب آدین شاد اولوب او کافرِ مطلق
او لال اولان دلین آچدی به قصد طعن و شماتت
دیدی که حمد اولا حقّه سیزی جهاندا ایدوب خوار
حسینی ئولدوروب اما یزیده ویردی ریاست
یالان خبرلروزی ظاهر ایتدی خالق عالم
یتیشمه دی سیزه دنیاده افتخار خلافت
بو گفتگو گتوروب درده زینبی دوروب اول دم
جواب ویردی او ملعونه دخت شاه ولایت
بیوردی حمد ایدرم خالقه که دار فناده
بیز اهلبیتی ایدوب صاحبِ مقام و فضلیت
پیمبریله ویروبدور بیزه جهاندا تفضل
که بیزده واردی نبوت یتوب مقامِ امامت
بو خانواده مبرّادی جمله رَجس و خطادن
گور ای لعینِ خطا دیده کیمده وار بو لیاقت
یالانچی سن سن ازلدن سنون آتاندی آناندی
دیمز یالان مگر عالمده نانجیب اهل شقاوت
آتاسی شیرِ خدا تک ایله یتوردی بیانین
زیادین اوغلونی غیظه گتوردی حرف حقیقت
ایاقه دوردی او عُلیاجَنابه حمله ور اولدی
خیالی واریدی ایتسون او بی پناهه جسارت
او نانجیب شقى قصد ایدنده زینب زاری
خانمدا دوردی ایاقه دوتوبدی مجلسی وحشت
دوراندا زینب ایاقه ایاقه دوردی خانملار
تمام خلقده دوردی ظهوره گلدی قیامت
اوشاقلارین گویه واعمَّتا صداسی اوجالدی
قارشدی بیر بیره عورت اوشاق پوزولدی جماعت
گلوردی زینبی ئولدورسون اول ستم گر بی دین
دوتوردی دامن زینبدن اهلبیت رسالت
علی اکبر آناسی گوزونده گوز یاشی اوُل دم
باخوبدی رأسِ علی اکبره دیردی اول حضرت
اوغول على سنی بو یِرده آرزو ایدیرم من
گوریدون عمّه وی جلاد الینده ای گل جنت
او قدری قالموری عالمده عمّه سیز قالا قزلار
امان بو ظلمدن ایتدی جهانی غرق مصیبت
باخاندا رأس علمداره اوُل دم حضرت کلثوم
دیردی گل ایله قارداش بو گون باجوندان حمایت
سنون گوزوندن ایراق ئولدورولّه زینبی قارداش
گروه کینه ده یوخدی بو گونده رحم و مروت
بیری بیری نه قارشمشدی بانوانِ مکرّم
باخاردی دوره دن امّا یوخیدی کیمسه ده جرأت
گوروب بو حالی حریث اوغلی عمر دوردی ایاقه
زیادین اوغلونا هی ووردی ای امیر سیاست
بو بیر اسیریدی قارداشلاری گیدوبدی الندن
حوادثات جهانی گوروبدی ائتمه مذمّت
خطا گَل ایلیه عورتدى اَل گوتور داخی بوندان
اسیره دور اوزی ائتمه بونا بو قدر اذیّت
دوباره تختنن اوُسته اوتوردی اوُل سگِ هاری
حسین باشین اَله آلدى یوزونده حال منیّت
شماتتیله دیدی رأسِ شاهِ تشنه لبانه
حسین قوجالمشیدون ائتمدون ندن منه بیعت
باش اگمدون باشوی قویموشام برابره ایندی
اسیر دور حرمین قولاریندا قید مذلّت
کُومکلرون هانی عباس و اکبره نه گلوبدی
هانی گلوب گوره لر مجلسمده وار نه جلالت
اوتانمادی او زنا زاده بیر دم آل علی دن
او که شماتتیدی ایلدی او یرده نهایت
یورولدی ظلم اَلین آچدی گوتوردی تیغِ فناری
او گل دوداقلارا ویردی واریدی بس که قساوت
خیاله سالمادی روز جزای موقف حشری
ولو گوروردی که یوخدی او باشدا جای سلامت
او قدر ظلم ایلدی گوردی ناگهان او ستم گر
بلا اوُدی بوریوب قصری وار نشان هلاکت
دوروب ایاقه که قاچسون گلوبدی نطقه کسوک باش
دیدی هارا قاچوسان وار دلنده دودهء غفلت
نه اضطرابه دوشوبسن بو عالمین اوُدی دور
دیمورسن آخر ئولوم واردی اهلِ جوره عقوبت
زِ بس که کفر و عداوت بناسی محکمیدی چوخ
آیلمادی ابداً گوردی تا علاوه چوخ آیت
همان او حالده بیهوش اولوبدی حاله گلنده
دوباره آلدى اَله رأس شاهی ایتدی اِهانت
بو غم تمامه یتشمز (علومی) یازما اَماندی
گتوردی نالیه اَهلِ دلی بو غملی روایت
- پنج شنبه
- 18
- شهریور
- 1400
- ساعت
- 20:16
- نوشته شده توسط
- یوسف اکبری
- شاعر:
-
علومی تبریزی
ارسال دیدگاه