اِستعانَت اِیلَرم من قادرِ قَهّاردَن
ذِکر اِیدم حالاتِ دُختِ حِیدرِ کرّاردَن
شیرِ یَزدانین قزی مَعنادَه امّا شیر زَن
شیرِ اَمُوب صَدرِ شَهامَتدَن اُولان سَرشاردَن
سُود نه سُود، سینه نه سینه، یَعنی زَهرا سینه سی
حِیف أو سینه یاره اُولمُوش ضَربَتِ مِسماردَن
سُوز سُوزی گَتدی یاخوندور سُوز مَسیروندَن چخا
اِی قَلم یازما گِچاق بُو غَمفَزا گُفتاردَن
شَرحِ وَصفِ زِینبِ کُبرادی مَنظورِ نَظر
سُوز آچاق شَخصیّتِ بانوی با مِقداردَن
ئوز آدی زِینب وَلی مَشهور زِینِ اَب ائولان
گِیت سُراغ اِئت سال اَلَه مَدرک گُوزَل اَخباردَن
ئوز آدی زِینبدی قَلبیندَه صَفای مُصطفا
اِرث آلوب صِدق و صَفانی اَحمدِ مُختاردَن
ئوز آدی زِینب یُوزوندَه وار حَیای فاطمی
اَخذ اِیدوب دَرسِ حَیانی مادرِ اَخیاردَن
ئوز آدی زِینب وَلی صَبرِ حسن داراسی دور
صَبردَه سِبقَت تاپوب اَیّوب تَک صَبّاردَن
ئوز آدی زِینب وَلی مِهر و وَفا دریاسی دور
بَهره مَند اُولمُوش وَفا بُو قُلزمِ زَخّاردَن
بُو او زِینب دور چوخ اِیستَردی حسین قارداشینی
آیریلانمازدی بیر آن اُول سَروَرِ اَبراردَن
قارداشیلَه تِز تِز اِیلردی او دید و بازدید
دَردِ دِل اِیلوب آلاردی دَردِ دِل دِلداردَن
بیر حسینی گورماقی بیر یانه دنیا بیر یانا
اَلدَه میزانِ عَیارِ مِهری بُو مِعیاردَن
گَلمیوب دنیایه گَلمَز بِیلَه بیر قارداش باجی
نه دِیوم من بُو اِیکی مِهر و وَفالی یاردَن
سُوز غَلط دُوشمَز دِیسم قارداش باجی بیر رُوحیدی
بیر بیریندَن هِچ أولار دویمازدیلار دیداردَن
چَکدی حَتی بُو عَلاقه کَربلا صَحراسینه
چوخ مُصیبت گُوردی صَحرای مُصیبت باردَن
سُوی شاماتَه گِیدندَه نیزه دَه قارداش باشی
آلماقا ئوز اِنتقامین قاتِلِ خون خواردَن
کَربلادَه باشینَه یغدی گُل ئوزلی قزلاری
دوشدی آردنجا، گُوتورمُوب گُوز او گُل رُخساردَن
خَلقه آندیردی بُو رَمزیلَه که یارِ با وَفا
هرگز آیریلماز یامان گُوندَه وَفالی یاردَن
دَست بَستَه زار و خَستَه ناقهء عُریان دَه
گُوردی چُوخ طَعن و شَماتَت فُرقهء اَشرار دَن
مَجلسِ اِبنِ زیادَه چَکدیلَر بی اِختیار
سِیر اِیدوب مَجلس نِجَه مَجلس دُولی اَغیاردَن
ئوز وِقارین حِفظ اِیدوب هرگز ئوزون سندیرمادی
زَهرِ چِشم آلدى او اُستاندارِ اِستکباردَن
زادهء مَرجانه ناراحت دُونوب آلدى خَبر
کیمدی ہُو عُورَت منی آگاه اِیدون اَسراردَن
بیر اَسیر عُورت بُو اَندازه تَكبّر بُو وِقار
فَرق گُورمُور مَنلَه هرگز نَقش بَر دِیواردَن
بیر نَفر آندیردی زِینب دور خانم زَهرا قزی
اَخذ اِیدوب دَرسِ شَهامَت حِیدرِ کَرّاردَن
دوندروب یُوز زِینبِ کُبرایه کِبر و غِیظیلَه
دِیل یاراسی وُوردی بیر رَفتارِ ناهنجاردَن
نَه دِیلیلَه باشلیوب سُوز، نَه دِیدی من یازمارام
شَرم قیلّام نا مُناسب هر سُوزه تِکراردَن
شیرِ یَزدانین قزی بیردَن قزیشدی شیر تَک
باشلادی اُود یاغدیران گُفتارِ آتَشباردَن
دُختِ زَهرا خُطبهء زَهرانی تَجدید اِیلدی
دُر نَثار اِئتدی بُو نُوعی لَعلِ گُوهر باردَن
حَمدِلله حَقّ پِیمبرلَه بیزی اِیلوب عَزیز
مُحترم بیز اَهلِ بِیتوخ جُملهء اَشراردَن
شأنیمیزدَه آیهء تَطهیر نازل دور بیزیم
بیزدُه یُوخدور رِجسِ اِعراض اِیلروخ فَجّاردَن
فِطرتاً بیزدَه نَجابَت وار حَیا وار شَرم وار
لِیک آیریلماز خَباثَت سَن کیمی بی عاردَن
یابنَ مَرجانه مَنم دُختِ عُلىّ المُرتَضی
هَل اَتى حَقیندَه گَلمُوش جانِبِ داداردَن
کس سَسُون، فاسِق ئوزون سَن هم اَمیرون دور سَنون
ساکت اُول اِی بَد خَلف مَرجانهء بَد کاردَن
بِیلَه فِکر اِئتمه اَسیرَم بیکُسَم قارداش سیزام
اُولمُوشام خَسته جَفای قُومِ بَد رَفتاردَن
قارداشیم اَلدَن گِیدوب امّا، اِرادَم سینمَیُوب
قارداشیم تَک چَکمَرم اَل، مَعنوی پِیکاردَن
گَلمیشَم قارداشیمُون حقّ اُولماقین اِثبات اِیدَم
آلِ سفیان کُفرینَه اَقرار آلام اَفکاردَن
دین یُولوندا قارداشیم باشدان گِچوب جاندان گِچوب
مَندَه اِلهام آلمُوشام اُول سَروَرِ بیداردَن
قارداشیم باشی گَلوب بُو بَزمَه مَندَه گَلمُوشَم
تا حِمایت اِیلیَم اُول قافله سالاردَن
گَلموشَم بُو مَجلسِ مِی شُومَه قُوللاردا طَناب
خَلقی آگاه اِیلیَم کِیفیَتِ اَحراردَن
سَن کیمی بیر کُورِ باطن عُنصُری رُسوا اِیدَم
سَلبِ گُفتار اِیلیَم سَن کُور دل غَدّاردَن
گَلمیشَم اِئتماقلیقا من حَقّى باطلدَن جُدا
راهِ هَموار آیریلا تا راهِ ناهَمواردَن
وار نِچه نازلی یَتیمه قز، نِچه اُوغلى ئولن
نِچه قارداش سیز سپاهیم عِترَتِ اَطهاردَن
اَل اَلَه وِئروخ گِیدوب شاماتی تَسخیر اِیلیوب
قدرَتی صَلب اِیلروخ هر جانی و جَبّاردَن
گَلمُوشَم غَفلتلَه یاتمُوش مِلتی بیدار اِیدوب
خَلقی هُشیار اِیلیَم هُشیار اِیدَن هُشداردَن
مَستِ صَهبای ریاسَت اُولما بِیلَه، هُوشَه گَل
سانما بُت هِند اُوغلونی قُورخ قادرِ قَهاردَن
مَعدِلَت دیوانی وار روزِ جَزا پاداشی وار
قیل مُجَسّم مَحشَری یاد اِئت أو گیر و داردَن
قارداشیم دین اُوسته ئولمُوش زندهء جاوید دور
توکمُوسَن ثاراللّهی بی خُوف صاحِب ثاردَن
الله ئولدورسُون سَنی قالسُون سُنون آغلار آنان
یابنَ مَرجانه اُولان اِی بی حَیا
جَمّاردَن
اِیلدی رُسوا زیاد اُوغلون بَیانِ زِینبی
اُودلادی قَلبَ شَرورین آتَشین گُفتاردَن
غِیظیلَه دوردی یِریندَن قَصد اِیدوب زَهرا قزین
با قَساوَت قَلبی دولمُوش کینهء اَخیاریدَن
زِینبِ كُبرانی اِیستَردی او ظالِم ئولدوره
ذرّه جَه باک اِئتمه دی زِینب او بَد کِرداردَن
دوردی قَصد اِئتدی اُودا مَرجانه اُوغلون روبرو
وِئردی آگاهی او گُمراهه غَلط پِنداردَن
یُوز دوتوب اِبنِ زیادِ شُومَه عُمرو اِبنِ حُرَیث
سُویلدی بیر صَحنَه گُوردوم قانلُو بُو دَرباردَن
بُولمورم وار بُو باشیلَه زِینبون نَه اُلفتَی
گُوز گُوتورمَز اَصلاً أول خاتونِ دِل اَفگاردَن
سَن اُونی قَصد اِیلیندَه آچدی قانلُو گُوزلَرین
باخدى قانیاش توکدی دُولمُوش دیدهء خُونباردَن
بیر خانم دَی اُوغلی قارداشی ئولوب قَلبی یانوب
اَل گُوتور بُو أوغلی قارداشى ئولَن دِل زاردَن
قَتلِ زِینَبدَن اُولوب ظاهردَه گر چه مُنصَرِف
باطناً اَل چَکمَه دَی اُول بی حَیا آزاردَن
صادر اِئتدی قَتلِ فَخرِ الساجِدین فَرمانینی
ضَجّه و شیون اُوجالدی عِترتِ اَطهاردَن
آج سُوسُوز یُورقون اُوشاقلار شُوریلَه آغلاشدیلار
دولدی مَجلس سَربسَر فَریادِ آه و زاردَن
عالَمِ مَعنادُه بُو اَحوالَه یِر گُوی آغلادی
وا اِماما نالَه سی گَلدی دَر و دِیواردَن
دَوزمَدی زَهرا قزی زِینَب دُوروب بی اِختیار
اِئتدی اِعلانِ حِمایَت عابدِ بیماردَن
زِینَبیلَه اِتحاد اِئتدی عَزالی اَهلِ بِیت
دوردولار بیردَن اَیاقه بِینِ قُومِ خَواردَن
هَمصدا سَسلَندیلَر با هم که ای شُوم و دَنی
بَسدى اَل چَک بیر مَریضِ خَسته و تَبداردَن
وِئردیلَر اِبنِ زیاده اِتحادیلَه شکست
قالدى ناچار اِیلدی صَرفِ نَظر اِصراردَن
ئوزگه بیر ظلَم اِیلَدی توضیحی نَه شَرم اِیلورم
اِیلیون صَرفِ نَظر سیزدَه بُو اِستِن شاردَن
اُولدی داخل مَجلسه بیر نأر چُوخ چُوخ هُولناک
وَحشته دوشدی هامی بُو وَحشتِ بِسیاردَن
مَجلسی تَرک اِیلدی حَتی قاچوب اِبنِ زیاد
تا خِلاص اِئتسُون ئوزون نارِ هَلاکت باردَن
ناگهان سُلطان مَظلومان باشی گَلدی دِیلَه
بو صَدا گُویا اُوجالدی لَعلِ گُوهَر باردَن
یابنَ مَرجانه اِیدور سَن نارِ دنیادَن فَرار
قُورتولانمازسان قیامَتدَه یَقین اِئت ناردَن
سُود اَمر اَصغر آناسی یَعنی مَظلومَه رُیاب
گُوردی خالی اُولدی مَجلس سَر به سر أَغیاردَن
فُرصَتی فُوت اِئتمدی گُوتدی حُسینون باشینی
باسدی جان تَک باغرینا ئوپدی رُخِ گُلناردَن
عَرض اِیدوب هَر قدَر أولا عُمروم غَموندَه آغلارام
سالمارام بیر دَم آدون اِی عِزّتیم تَذكاردَن
جان وِئروب سَن گُون اِئویندَه سُو یانندا تَشنه کام
سُو وِئرن اُولموب سَنه هَشتاد مین کُفّاردَن
گُون قَباقیندَه اُوتورّام دِلدَه آهِ آتَشین
حالوه یانّام گِید نجَه مَن بُو فانی داردَن
اِیچمَرَم بیرَده سَرین سُو کُولَگهَ دَه اَگلشمُرم
یاد قیلّام سَن کیمی عَطشان ئولَن بی یاردَن
مین بَهار اُولسا گُوله مین لَرلَه گُل گُولمَز یُوزوم
دوشسَه اَحیاناً گُذاریم صَحنهء گُلزاردَن
هاردا گُورسَم شاخهء گُلدَه سنُوب غُنچَه سُولوب
آد آپارّام اَصغریمدَن سَن گُلِ بی خاردَن
من یِتش میشدِیم سَنُون سایُوندَه اُوجِ عِزّتَه
دوشمُوشَم سَندَن صُورا چُوخ اَرزِش و مِقداردَن
من هارا بُو گُون هارا بِیلَه أَسیر اُولماق هارا
دویمُوشام سَندَن صُورا دنیای کَج رَفتاردَن
- شنبه
- 14
- مرداد
- 1402
- ساعت
- 22:25
- نوشته شده توسط
- یوسف اکبری
- شاعر:
-
صادق تائب
ارسال دیدگاه