ای طلعتی موسانی ایدن طوریده مدهوش
دور یاتما کول اوستونده بیله خسته و خاموش
زهرادی گلوب سینه سی اوسته باشون آلسون
فرش ایلسون اوز زلفینی خاکستره سالسون
کیم قویدی حسین بو سرِ مجروحی تنوره؟
مین موسی عمرانی گتوردی بیله شوره
لایقدی بو یر طعنه اگر ایلسه طوره
چون طوره بو مطبخ بو گئجه سایه سالوبدی
زهرا بالاسین جان کیمی آغوشه آلوبدی
ایمدی بولورم یاتمادی موسا نیه اوددا
بو سرّی بولر عشقه او کس که اولا دارا
چون عشقِ حسین سینهء موساده دوتوب جا
فکر ایتدی تنور ایچره تاپا شاه ِشهیدی
چون روز ِازلدن بونا بسته ایدی امیدی
بو مطبخه ای کاش گَله موسیِ عمران
کول اوسته گوره تا که یاتوب شاه ِشهیدان
اولسون بو محندن اورگی لاله صفت قان
آرام ِدلی کوللرین اوستونده یاتوبدی
زهرانیده دنیا کیمی بو گوزدن آتوبدی
بیر شه که ویروب خضره لبی آبِ بقانی
بیر شه که توکولدی یره ناحق یره قانی
بیر شه که سالوب نظمه بو اوضاعِ جهانی
علّت ندی بس تیر جفایه هدف اولدی
گُل تک سارالوب رنگ ِرخی عارضی سولدی
بیر شه که اولوب حقه جمال ِحقی مرآت
بیر شه که ملقّب اولونوب پیرِ خرابات
ایلَلّه خراباتیلر اول پیره مباهات
چون راه خراباتیده قویموب قالا نقصان
خولی ایوینه گلدی اولوب بیر گئجه مهمان
بیر شه که اونیله حق اولوب ایمدی هویدا
بیر شه که نگاهینده واریدی دمِ عیسی
بیر شه که اولار بارماقی مینلر یدِ بیضا
بولمم نیه غارت او الی اهرمن ایتدی
انگشتریله بارماقیدا غارته گیتدی
خولی بونا یاخشی ایلیوب بو گئجه حرمت
کول اوسته تنور ایچره سالوب بسترِ راحت
بولدی که باشیندان ویریلوب چوخلی جراحت
سالدی کولیله یاره لری اوستونه مرهم
ایلوب بو جسارتله جهان نظمینی برهم
بولموب که ولی فاطمه نون زلفیدی برهم
او زلفین اودور یاره سی اوسته سالا مرهم
عرض ایلر اَیا شافع و ای شاهِ دو عالَم
عطرونله دولوب خوابگهون بو گئجه بولدوم
کول یوخدی گوزونده، آغاران زلفیله سیلدیم
آچ قانه دولان گوزلرون ای شاهِ شهیدان
زهرا نجه گور ایلور اوغول ناله و افغان
رخسارینه غربالِ گوزوندن اَلوری قان
ای دینِ حق اوسته بویانان قانه حسینیم
قوی سینه مه بو باشیوی دُردانه حسینیم
- شنبه
- 20
- شهریور
- 1400
- ساعت
- 16:5
- نوشته شده توسط
- یوسف اکبری
- شاعر:
-
مرحوم هادی تبریزی
ارسال دیدگاه