هیچ کیم منیم تک آتشِ هجرانه یانمادی
پَروانه ده بو نوعیله اودا دایانمادی
مجنون اگرچه کُوه و بیابانی گزدی چوخ
صَحرای عشقی لیک، بو قدری دولانمادی
مندن علاوه بیر باجینون روزگارده
قارداش قانیله زلفِ سیاهی بویانمادی
چوخ پادشاه غالب و مَغلوب اوُلوب ولی
هیچ پادشاهون اَهل و عیالی تالانمادی
قارداش ئولونجه زینبی بو درد یاندیرار
گُل جسموی مَزاره بو بیکس قویانمادی
چوخ نسگل اولدی زینبوه بو غم و اَلم
سن جان ویرنده گوزلریوی باغلیانمادی
چوخلار بو عشق دایره سینده قَدم ویروب
امّا جداده گُون کیمی باشی دولانمادی
شام اهلی شامیده دئدیلر خارجی بیزه
آلِ پیمبروخ دئدوخ هیچ کیم اِینانمادی
شِمر و سَنان جفاسی تمام اولدی شامیده
امّا یزید جور جفادن اوسانمادی
آلدی سرِ مطّهرون اوُل سَنگدل اَله
یاندوردی قلب عالمی، بیر قلبی یانمادی
اوُل لبلری که بوسه گهِ مُصطفا ئیدی
ووردی آغاج او لبلره هرگز اوتانمادی
خوابِ بقایه گیتدی رقیّه خرابه ده
هر نه فغان و نالیه گلدوخ اویانمادی
تَحریر اِیدردی بَزمِ یزیدین مصائبین
سوز بیر یِره یتشدی (تائب) یازانمادی
*ذهنی زاده
ياددان چخاندی شام غمی کربلا غمین
نازلی رقیّه مُحنتِ شامه دایانمادی
بیر نَصف شب خرابهء شام خرابی ده
توپراق لار اوُسته اِيستدی یاتسون یاتانمادی
اُپدوم یوزین دِئدیم بالا يات راحت اوُل بير آز
عرض ايلدی يوخی گوزیمه یول تاپانمادی
اوّلده هوش آپاردی بابام گلدی یانی مه
ایستوب منی قوجاقينه آلسون آلانمادی
گوردی وجوديمی يارالى تازیانه دن
اَحواليمه قان آغلادی گیتدی دایانمادی
من اِیستديم قاچام داليجا قوی میام گيده
نيلوم قابار اَياقلاریم عمّه قاچانمادی
روحيم قوشی پَر ایستوب آچا دامنين دوتا
سینمیش قَفسده حِیف پَر و بال آچانمادی
صبحه تك آغليوب سوزين اوُلدوز لارا دِئدی
سایدی آخان کَواکبی دردین سایانمادی
گلدون اوزون او نصفِ شبی گوردون آغلوری
هر دل دِئدون قان آغلاماقندان اوسانمادی
ایستردی دردینی یوزینه اَشگیله یازا
زلفی دوشوب، سیلردی سرشگی، یازانمادی
قويدى يوزین یوزیوه دوداقين دوداقوه
ياندی نقدر سسلديم اَصلا اویانمادی
تعقيب ايدوبدی (سائلِ) درباری کسرینی
(تائب) يانان کیمی دیمه اودلاره یانمادی
شادروانان شیخ اسماعیل تائب و ذهنی زاده
- یکشنبه
- 28
- شهریور
- 1400
- ساعت
- 15:13
- نوشته شده توسط
- یوسف اکبری
ارسال دیدگاه