زادهء ناپاکِ بُوسفیان شَقی و فتنه کار
عامل قتل و جنایت حاکم بی قید و عار
منشأ شَر و فَساد صحنه های روزگار
مُنکرِ آیات قرآن خَصمِ ختم الّانبیاء
دشمنِ سر سخت و خونخوار علی المُرتضی
مردمِ دنیائیله دنیا کیمی همرنگیدی
مکریده اَمرا عاصیدن پُر مَکر و پر نیرنگیدی
اتقیا سیر و سلوکندن اونون دل تنگیدی
نُطفه سی اَرذَل طلیقیدی نه که آزادیدی
مادرِ ناپاکی هندِ آکل الاکبادیدی
ثانی نون عصرینده اولدی شامِ شومه حُکمران
بال و پر وئردی او کَرکس سیرته اهلِ جهان
کامیاب ایتدی او رُوبه خصلتی دورِ زمان
یاره مقصودین آلوب آغوشی نه اجلالیله
قصر خضرانی ایدوب اِحداث بیت الَمالیله
قلبدن اوغلی یزیده بسکه خاطر خواه یدی
گر چه رفتار قَبیح یندن اونون آگاه یدی
بیر جوان هرزه و لایعقَل و گمراه یدی
سعی ایدوردی بیر بیله موجود و پست و ناتوان
کشورِ پهناورِ اِسلامه اولسون حُکمران
ناز و نعمتله یزید اولدی همیشه کامکار
عمرِ نحسیندن کچوب تا که ایگرمی بش بهار
قلبینی عشق اُرِینب ایلدی بی اختیار
زورقِ جسمی اولوب دریای عشقه ته نشین
پیچ و تابه سالدی اَعضاسین بو عشق آتشین
گوندوزی غم غصّه سیندن ایلدی عزمِ شکار
هر گیجه ترتیب وئردی مجلسِ رقص و قمار
صُبحه تک جام شرابیله اولوب دمساز و یار
ماه رویان دمشقین درک ایدوب دور وصلتین
مرز بیهوشیده تاپدی زندگینون لذّتین
اوغلونون گوردی معاویّه اولور فسقی عَلن
عشق آتش زا ائدوب قلبین گرفتارِ مُحن
نقش طرح ایتدی خلاص ائتسون اونی اندیشه دن
اعتراض ائتدی حسین هند اوغلونون اقدامی نه
قویمادی دوشسون حجاز آهوسی مَکرون دامنه
نقش برآب اولدی یکسر نقشهء دربارِ شام
دائما بو حادثه قیلدی یزیدی تلخ کام
نفسی تحریک ایلدی آلسُون حسیندن اِنتقام
سرورِ آزادهء احراری ناکام ایلسون
روزگاری آغلادوبدی تا اوزون رام ایلسون
هجرتون آتمش بیرینده عاشرِ شهرالَحرام
یُومِ حشر و رستخیزِ عترتِ خیرالانام
پاک قانلار کربلا صحراسین ائتدی لعل فام
زینتِ آغوشِ پیغمبر فروغ آسمان
جان وئروب جانانینه تاپدی حیاتِ جاویدان
ماجرای صحنه کُشتار دَشت نِینوا
یا شکست ظاهری پروردهء خیرالنّسا
ثبت اولوب تاریخده پیروزی بی اِنتها
رویدادیندن یزیدِ بی حیا مجذوب اوُلوب
ایله فکر ائتدی حسینِ فاطمه مَغلوب اولوب
ایستدی پاتخت نه جبراً پیمبر عترتین
اقتداریندن ایده حالی دمشقین ملتین
دل ملول ایتدی حریمِ کبریا جمعی یتین
یوردی بُرجِ ناقه ده بُرجِ شَرف اولدوز لارین
چکدی بازاره علیِّ المُرتضانون قزلارین
اوّل ماه صفرده کاروان کربلا
موکبِ حُزن آورِ پژمردهء آلعبا
وارد شام اولدی شامی ایلدی ماتم سرا
حس وجدان مردمون تَحریک اِیدوب افکارینی
قابل لعنت یزیدون بُلدیلر رفتارینی
مهد عشقی که دمشق آدیله وار آوازه سی
عقلی مات ائتمشدی تزئیناتنون اندازه سی
چوخ بزنمشدی ولی ساعت اولان دروازه سی
مرد و زن صوتِ دَف و طنبوریله دَم سازیدی
رقص و آوازون سسی شهره طنین اَندازیدی
کوچه و بازاره نصب اولموشدی زیبا پرده لر
شادکام و خرمِ خندانی دی افسرده لر
یوز ایگرمی پرچمیله جنگجو سرکرده لر
جنگجویانِ عراقی پیشواز ائتمشدیلر
خولی و شمر و سَنانون دیدنه گئتمشدیلر
آز قالوردی ظهر اولا دوتدی هوانی گرد و خاک
آسمانِ شهریده خورشید اولوب اَندوه ناک
سینهء گرد و غباری کاروان ایلوبدی چاک
طبل و شیپورین صداسی شهری سالدی لرزیه
هیبت مخصوص یله لشگر چاتوب دروازیه
زینبون ناگه عیان اولدی پَریشان دسته سی
گلشن حقّون بیر عده طایر پَر بسته سی
اِفتخارِ کایناتون آهوان خسته سی
زُهره زَهرا بتولون صاحب عِصمت قزلّاری
گویدن اَنمیشدی یِره گویا گویون اوُلدوز لاری
بیر اوجا نِیده سرِ آزاد مردِ روزگار
عشقبازِ صادق و جان پَرور پَرودگار
عصرونون یحیاسی دور گویا قزل طَشت آختارار
یوز گوزی تپراق مَحاسن مولری خُونباری دور
کاوران عشقه شَخصاً کاروان سالاری دور
دشمنِ شیرِ خدا بیر شخص ابراهیم نام
دوستدارِ آلِ بُوسفانیدی فاسِق مَرام
جَنگ خونینی جَملدن اولمیشدی تلخ کام
آتشِ بُغض و عنادیله قزشدی سینه سی
اِنتقامه سوق ایدوب دور کینهء دیرینه سی
ناقۀ زین العباده ایلدی نزدیک اوزون
هرزه قُؤلرتک آچوب دور آغزینی یومدی گوزین
ریشخندیله تکلم قیلدی بی معنی سوزون
بیر سُوال ایتدی سُوالون متنی نامطلوب دور
سؤیله کیم یابن الحسن غالبدی کیم مَغلوب دور
حضرت سجاد هُمای رَحمت و عرش آشیان
قلبنون اَعماقنه یوز ویردی بو سوزدن تکان
قیلدی فرمایش دایان ویرسون مؤذنلر اذان
اَحمد و مَحمود آدی آفاقه سالسون طَنطَنه
غالب و مغلوب همین ساعت ثَبوت اوُلسون سنه
راضیوق روزِ ازلدن خلقتون تقدیری نه
دلخوشوق دامِ وِلانون نالهء شبگیری نه
نه حقاتله باخورسان بوینمون زنجیری نه
رَهروانِ راهِ حقوخ سیز ولی اهلِ مَجاز
سیزده هر قَدری ستم وار بیزده وار آغوشِ باز
مطلبی درک اِیت تعمّق ایله ای نازک خلیم
اهلِ مَعناسن تفکر عالمینده ور قدم
نقطه نقطه مجلسین عکسین نشان وِرسین قَلم
عصر وقتیده یولون یورقونلاری شُوریده حال
قصرِ خَضرایه قولی باغلی تاپوپ دور اِنتقال
وهلهء اوّل یزیدون سال نظر درباری نه
قصرِ خَضرانون تماشا قیل در و دیواری نه
داخلِ قصر اوُل ورود اِیله بیوک تالاری نه
مَسند و قالیله تالارون کَفی الوان دور
چِلچراغِ شُعله وَر سَقفندن آویزان دور
مُختلف شخص یله تالارون دولوب سر تا سری
اَجنبی دولت لرون برجسته شخصیت لری
اَلّیدن آرتوق رِجالِ لشگری و کشوری
سر شناسانِ قَبایل سرکِشان و باج گیر
بیر نچه نصرانیِ آگه دل و روشن ضَمیر
صدرِ تالاره قُویوبلار کُرسی گُوهر نشان
تکیه ایلوب دور او تخته سُرخ صورت بیر جوان
آبله آثاری درک ایلر یوزی نه هر باخان
قد بلند و جُثه نخوت قلب ایوی تاریک دور
غرقهء غرقاب نخوت قلب اِئوی تاریک دور
سبز رنگ عَمامه سی باشدا خلافت مظهری
جامه زربفتله مستور اولوب دور پیکری
کتفده آبی رَدا بیلده مُرصع خنجری
فاقدِ وَقر و اُبهت فکر و عقلی ناتوان
مارتک دوشمش اَلینده پیچ و تا به خِیزران
پشتِ تختنده ایکی جانی غلامِ روسیاه
هر بیری گیمش لباس ابریشمی و راه راه
مَجلسون اَعضاسی نه هیبتله اِیلولر نگاه
اللّرینده قبضه شمشیر جُوهر دار و تیز
ساکت و صامت دوربلار ایلمولر جَست و خیز
تخته نزدیک اَگلشوب دور بیر نچه صاحب کلام
اهل ذُوق و شاعرانِ ویژهء دربارِ شام
جمله سینده اَخطلِ میخواره و فاسق مَرام
شاعرِ هَزیان سرا و هرزهء شهر حَلب
هم پیالیدی یزیدیله بو عِده روز و شب
اگلشوب بیرعِده فکریله بیر عِده شادمان
انظباط مجلسی پوزدی هَیا هُو ناگهان
ضمن تعظیمی یزیدون حاجبی اِیتدی بیان
گتدیلر قصره کَسلمش باشلاری سر نیزده
دخترانِ مُرتضای دِل مَلول و غَمزده
یوز ویروب قلبِ یزیده شادی بی اِنتها
صادرِ فَرمان نامعقول اِیدوب اوُل بی حَیا
صحنده قالسون رِئوس کُشتگان کربلا
سرخوشام آمالیمون پیمانه سین سرشار اِیدون
اَهل بیتیله حسینی وارد تالار اِیدون
مجلسه قویدی قَدم ناگه ایکی خدمتگزار
اَلده زر سینی گتورمش اوّلی تصویر کار
دوّمی اَلده کَسوک باش یوز گوزون دوتمش غُبار
زلف نامیزانی تک اَفکار نامیزان اِیدوب
ظلم اَلی گویا گُلِ آویزی آویزان اِیدوب
حامل سینی قویوب دور سینینی اوّل یِره
دوّمی اوندا مکان وِیردی او رَأس اَطهره
مجلسه حُکم سُکوت اوُلدی بو غَملی مَنظره
لرزیه دوشدی بَدنلرده ستونِ مُهره لر
سینه لر گرم آهیله دولدی دوتولدی چِهره لر
وارد اولدی تازه دَن بَزمه ایکی شمشیر دار
زِشت رو و سُرخ مو نامرد مَردِ روزگار
عُنصر صورت سیاه و ناقواره نابِکار
بو ایکی خون خواریله سولمشدی زَهرا گللّری
شمر دور خولی حسینون قان تُوکَن قاتللّری
سینینون صاق و صُولوندا دور دولار مَسرور حال
صحنهء تالاریده خاموشیدی یکسر رِجال
گوزلری اما کَسوک باشه باخوردی اِتصال
تختون اوستنده یزیده اَل ویروب شُور نِشاط
عَصر فرعونین جَری اِیتدی او فرعونی بساط
گلشنِ عصرِ حریفین درک اِیدوب دور ریشه کَن
باده نوش اِیتدی نچه پیمانه اوُل پیمان شِکن
مغزینه تأثیر اِیدوب گرم اوُلدی سرتاسر بدن
دزدِ ناموس و تَجاوز کاریدی اوُل بی حَیا
مَصدرِ اِسلامیده اِسلامه ووردی پشت پا
مظهر شَهوت اوتوز اوُچ سنده فاسق جوان
منعکس اولدی خیالینده اونون کچمش زمان
قلبی نه عشق اُرِینَب غفلتاً وِیردی تکان
سینی زَرده رَقیبین درک اِیدوب آشفته مو
خیزرانیله پریشان زُلفین اِیتدی زیر و رو
اِی حسین اِبن علی گوردون نجه تقدیری سن
قویمادون تحصیل وَصلت اِیلیم عشقیمله من
اِیلدوم اَما سنی عالمده مَحروم هر ندن
اوغلووی قارداشوی بیر بیر اَلوندن آلمشام
گزدیرب اَطفالوی چوللّرده جاندان سالمشام
چاتمادی عالمده اِقبالون منیم اِقبالی مه
دائما سن رَشک آپاردون قصریمه اِجلالی مه
اگلشوب دوردون تَعرض اِیلدون اَعمالی مه
حَمد اولا مَعبودی مه اولدی تفاقون زیر و رو
من آپاردوم جاه و عَزت سن آپاردون آرزو
یاوه گولر تک بیر عِده یاوه سوز اِتدی بیان
غیظیله مظلوم اِمامون لبلّرین قیلدی نشان
نَحس اَلنده قُوزانوب اَندی فَنر تک خیزران
کامین آلدوقجا اِیدوردی زَمزَمه اوُل زِشت خو
آلِ بُو سفیانه تُوهین اِیلین لبلّردی بو
خیزران تعظیم اِیدوب اوُپدی لبِ خون باریدن
یارینه سس ویردی یاری مجلس اَغیاریدن
یاندیران بیر سس اوجالدی گوشه تالاریدن
اِی مِنا و مَکه نون اوُغلی عزیزیم جان حسین
سرگذشتون اِیلدی یَحیالری حِیران حسین
بانوی والّامَقام و قَهرمانِ کربلا
ساحتِ ذاتِ خدایه اِیلدی اوّل ثَنا
روحِ پاکِ جدّینی تقدیس اِیدوب اوُندان صورا
زینتِ تاریخ اوُلان نِطقون اِیدوب دور چوخ مَتین
صحبت اِیلوردی اوزی گُویا اَمیرالَمُومنین
اِی یزید اِی عُنصری که فَلسفه مَشهود سن
جامِ پیروزی سنی سر مَست اِیدوب مَسرور سن
بادِ نخوتله دَماغون یِلنوب مَغرور سن
باطل اَندیشی له تَخت اوُستنده اِیلور سن گمان
مُلکِ جاویدان تاپوبسان یا حیاتِ جاودان
غاصب اَجدادون کیمی قرآنیله اِیتدون نبرد
رَهنمایانِ بشر تاپدی شَهادت فرد فرد
سن کیمی خونخوار چوخ گورمش سِپهرِ لاجَوَرد
خشک تَشریفات یله بیهوده اوُلما کامکار
خوش گونون کُوتاه و کَم دور قدرتون ناپایدار
تنگ و تاریک اِیتموسن دنیانی آلِ حیدره
چَکموسن اَفسرده چشم اَنداز نامحرم لره
طایرانِ ماتمی باغلان دُروب سان پَر پَره
یورقونوق دامِ اِسارتده حِقارت بُل مَروک
وَرطهء غمده طلای ناب تک اَسکل مَروک
آسمانِ عزتین اوُلدوزلارین اِیتدون فَنا
پرپر اوُلدی ظلمیله ریحانهء خیرالنساء
کُشتگان جَنگِ بَدری سسلوسن اِی بی حیا
میر اَبرارون گورورسن باشینی بیر پارچا قان
مَست و مَستانه اوُتان مورسان ورورسان خیزران
مَنطق زِینب یزیدون تیترَدوب تالارینی
اِنقلابه سُوق اِیدوب دور مَجلسون حُضارینی
چوخلاری تقبیح اِیدوب اوُل ظالمون رفتارینی
فکر دریاسینده اوُلدی آلِ بُوسفیان غریق
مجلسه گلدی همان اَثناده ناگه جاثلیق
یوز دوتوب اِیتدی یزید شُومه قَهریله خطاب
اِی دَنی فطرت بو نه عیش و شراب
سالموسان قَتل حسینیله جهانه اِنقلّاب
من کِچن شب خوابیده قَصرونده طُوفان گورمشم
صاحبِ تُورات موسانی پَریشان گورمشم
نُور اِسلام یله روشن قلبمون کاشانه سی
اوُلمشام دِلدن حسینون عاشق مَستانه سی
والهم سرشار اوُلوب دور عشقمون پیمانه سی
شاهدِ جانبازی مه مفتون و جانباز عاشیقم
مَجلس اَغیاریده یاره سرافراز عاشیقم
جدّی پیغمبر دوروب اَلده بِهشتی پیرهن
بیر اَلینده نوریدن بیر تاج وار پَرتُو فِکن
عالمِ مَعناده فرمایش اِیدور اوُل مؤتمن
گل یوبانما اِنتظارم گوزلورم الّان سنی
اِیتمشم حاضر سنه بو تاج و بو پیراهنی
مَجلسِ عیش یزید اولدی اوگون غم مَجلسی
قوزانوب پَرده دالندا هنده نون ناگه سسی
تختدن اَندیردی اوُل صِیحه یَزید ناکسی
یوز قویوب مَحرم سرایه غایت تعجیل یله
حالِ بی هوشیدن آخر هنده نی گتدی دیله
باخدی نفرتله یَزیده اِیلدی اَشگین رَوان
بیر سُوال اِیتدی او بانوی عَفیف و نُکته دان
حضرت زَهرا بَهارین سن نیه اِیتدون خَزان
رحموی وِجدانوی نابود اِیدوب دور نخوتون
صفر اَندر صفرمش مِقیاس اِنسانیّ تون
سَنگ دل صیادلر گر چه شکاره آغلاماز
صیدینی آهن قفسده ساخلّاسا دل داغلاماز
هر قَدر بی عاطفه اوُلسا قَنادین باغلاماز
قلبمی تیرِ ستم تالاره باخدوق جا دَلوب
خوردا قزلاری او حالدا گورموشم رحمیم گلوب
هنده غَش اِئتدی دوباره قَصر اوُلوب ماتم سرا
مَجلسون حُضاری گتدی تک قالوب آلِ عَبا
حُکم اِیدوب فوراً رَییس شَحنهء مهدِ جفا
اَهل بیتِ مُصطفانی گتدیلر ویرانیه
یورقون آهولر یتشدی غُصه لی کاشانیه
ریسمان ظلمدن آزاد اوُلوب آزاده لر
مَنزلِ ظلمتده آرامش تاپوب اُفتاده لر
اوز قولون بالش اِیدوب اوز باشی نه شَهزاده لر
سَقفی سیز یِرده قَرا تُپراقون اوُسته یاتدیلار
یاتدیلار اَما گُویون اوُلدوزلارین آغلاتدیلار
گوردی زِینب یوخدی اِمکانی لَحاف و بَستره
روزگار آئینه نی مُحتاج اِیدوب خاکِستره
یوخلیوب دور نازنین قزلار توکُوب زلفین یِره
تازه گیسولر قَرا تُپراقه نَقشِ غَم سالور
قاره یِللّر قاره بَخت اَطفالی نه لایلای چالور
مُرغِ روحی پَر ووروب شَمع غمه پَروانه تک
یاندی قلبی شُعلیه فرمایش اِیتدی اِی فَلک
اِحترامی له اوُپَردی آستانم دَن مَلک
دست یَغما گور نجه اِجلالیمی اِیتدی فنا
بیر چراغیم قالمیوب ویرانده یاندیر ماقا
من عَزا طاووسیم چَتریمدو قاره مَعجریم
کوه پیکر مُحنته تاب اِیلیوب دور پیکریم
فَتحِ شامه گلمشم یورقوندی اَمّا لشگریم
واردی بیر آن نَطقله آه شرر باریم منیم
بو قوجاقیمده یاتان قز دور عَلمداریم منیم
(انورا) نظم اِیلدون زَحمتله بو زیبا سوزی
دوشدون آرامشدن اوُن بِش گون گجیله گوندوزی
گُوستروز بَزم یزیدون عکسینی نَظمین اوُزی
اولسا هر بیر نَظم شیوا مُنعکس اَفکاریده
قابلِ تَحسین اوُلّار بَزمّ اوُلوالَابصاریده
- یکشنبه
- 28
- شهریور
- 1400
- ساعت
- 15:15
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه