اِی مُجتبانین قَلبینون یاراسی قارداش
گَل تاپدی پایان عُمریمون طُغراسی قارداش
آز آغلا قویما آغلاسون مَظلومه زِینب
اِی آغلادان دنیانی عاشُوراسی قارداش
صَبر اِیله توکَمه گُل یوزه قان یاش آز آغلا
سن آغلاسان آغلار بوتون داغ داش آز آغلا
آغلار گُوزون قُربانیم قارداش آز آغلا
اِی خَوار اوُلان کَرب و بَلاده یاسی قارداش
گُورسه سنی گُوز یاشلی تاب اِئتمز پِیمبر
سن آغلاسان آغلار آنام زَهرای اَطهر
قارداشلاریم دا آغلاسُون قُویما برادر
آغلار گُورن مَز گُوزلریم عَبّاسی قارداش
عُمریم گَلوب باشه یِتوب دور وَقتِ رِحلت
جَدّیم اِئدوب دور رُوضهء رِضوانه دَعوت
اَگلش باشیم اوُسته سنه اِیلوم وَصیّت
کَافیدی گر چه بیر گُوزوم اِیماسی قارداش
مندَن صُورا اِی ماسَواللّه ین پَناهی
اَطفالی مون دامانُون اوُلسون تِکیه گاهی
سُولدورماسون گُل یوزلَرون رَنج و دواهی
اِی گُلشنِ دینون گُلِ زیباسی قارداش
اَطفالیمی تک تک سَنه قیلّام سفارش
قیل قاسم و عَبدالَّهه خاصّه نَوازش
کَلکِ مَشیّت اِیلیوب بِیله نِگارش
اوُلسون اوُلارین غَرقِ خون، اَعضاسی قارداش
آلِ اُمیّه چوخ منی مَحزون اِئدوب دور
گُوز یاشیمی رَشگِ شَط و جِیحون اِئدوب دور
پَرده به پَرده باغریمی پُر خون اِئدوب دور
هِندِ جِگر خَوار اوُغلونون اِیذاسی قارداش
من پای مَنبرده اوُتوردوم دیده گِریان
سَبّ اِئتدی مَنبرده شهِ مَردانی مَروان
دؤزدوم، منه چون صَبریدی دستُورِ یَزدان
من بی کَسین یوخ صَبرده هَمتاسی قارداش
دِل یاره سی بیر یاره دور یُوخ دور دواسی
هر گُون وورولدی قَلبی مه مین دِیل یاراسی
تَنگ اِئتدی دنیانی منه دشمن جَفاسی
اِیچ دوردی آخر سُودهء اَلماسی قارداش
قان باغلیوب دور غُنچه تک دِل خار اَلین دن
قورتولّام ئولَسم زَحمتِ اَشرار اَلیندن
قورتولماز اَمّا قادرِ قَهّار اَلیندن
آلِ رَسولین حَشرده اَعداسی قارداش
هر خون دِل عُمریم ده بو دورِ زَمانه
بو داغدیده دِلده اِئتمیشدی خَزانه
قِیتَرماقا زَهرِ جَفا اوُلدی بَهانه
طَشته توکُولدی قَلبی مُون کالاسی قارداش
جَدّیم یانیندا قُوی سالار تاپشور مَزاره
گر اوُل سالار مانِع آپار اوُردان کَناره
قویما بَنی هاشِم آچا اَل کارِ زارَه
وار دور اوُلارین مُوقعِ دَعواسی قارداش
کَرب و بَلا دَشتین سنه مَسکن یازوبلار
صَحن و رَواقُون صَحنهء گُلشن یازوبلار
اِمّا منه ویرانه بیر مَدفَن یازوبلار
مَرقوم اوُلان گُون هر کسین طُغراسی قارداش
صَحنون سَنون دائم اولار قارداش چِراغان
امّا منیم قَبریم قالار تاریک و ویران
نه شَمعِ روشن قَبریم اوُسته نه نِگهبان
سس چَکماقا نه بیر کسین یاراسی قارداش
اِی مُحنتی هر نَخلهء آلامه هَسته
یَثربده تا وارسان مُلول و دِل شکسته
گَل هر شبِ جُمعه منیم سن قَبریم اوُسته
یاسین اوخی وَالفَجرین اِی مَعناسی قارداش
قیلّام عَوض منده گُلِ عُمرون سُولان گُون
زَهرا آنام قلبی مَلالیله دُولان گُون
شِمر اِبنِ ذِی الجُوشن جَفاسی ندن اوُلان گُون
کَرب و بَلا صَحراسی قان دَریاسی قارداش
باشون اوُلاندا کُوفه دَه کُول اوُسته مِهمان
جَدّیم آتام زَهرا آنام، من دیده گریان
گلّوق سنه دوتماق لیقا شامِ غَریبان
آلِ عَبانین باشلانار شُوراسی قارداش
وار دور (حسینی) نَسبتی بیز خاندانه
قویما فشارِ دَهردن گَلسون فغانه
باخ گوشهء چشمیله (سعدیه زمانه)
قویما اوُجالسون آه و وا وِیلاسی قارداش
- یکشنبه
- 28
- شهریور
- 1400
- ساعت
- 17:36
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه