دوتوب دور ماتَمون کُون و مَکانی یارَسول الله
اِیدوب ماتَم نِشین خِیرالنِسانی یا رَسول الله
گِیدنده اُمّته اَهل و عَیالون تاپشورور دون سن
عَلینین باغلیوب دور قولارین سَندن صُورا دشمن
اُلوب دور مُحسنی سیندی قُولی زَهرا اِیدوب شیون
قاپوسین یاندوروب فِرعُون ثانی یارَسول الله
نِجه شیرِ خدایه تاپدی اَل دشمن سرِ فرصت
ثانی تیغ جَفا اَلده دیوب قیل یا علی بِیعت
چَکُوبلر مَسجده سندنصُورا بو بی وفا اُمّت
جَفائیله علی المُرتضانی یا رَسول الله
شَهادت اِرث اوُلوب آلِ خلیل اوّل گِیچوب سَردن
بیری مَسموم زَهریله بیری مَقتول خَنجر دَن
حسنده سُوده اَلماسی نوش اِیتدی او ساغر دَن
اِیدوب مَسموم جَعده مُجتبانی یا رَسول الله
بوگُون زَهرین شَراری مُجتبانین سینه سین داغلار
یوزی قارداش یوزینده کَربلانی یاد اِیدوب آغلار
دِیدی قارداش بو اللّر حِیف دور قارداش گُوزین باغلار
اوُلار بیر گُون کَسر اُوز ساربانی یا رَسول الله
دِیردی زینبیم گَلسون قَرا اُوستن قَرا سالسُون
آنام زَهرا کیمی گلسون باشیم آغوشی نه آلسون
باشیندان آچماموش قارداش قَراسین بیر قَرا سالسون
گُورونجه خولی و شِمر و سِنانی یا رَسول الله
اَگر مَشغول اوُلوبسان ماتمِ شاهِ شَهیدانه
گُذر قیل کَربلادن لطف اِیله گل بیر خُراسانه
باتوب زَهرِ جَفادن بَرگ گُل تک لَبلَری قانه
غریب اُلدور دولر اوُغلون رِضانی یا رَسول الله
خداوندا بو زینب تک کیمین دنیاسی سَخت اوُلدی
گَلن گُوندن بو دنیایه همیشه تیره بَخت اوُلدی
چیخوب ویرانه مَسجد دَن مَقامی پای تَخت اوُلدی
گُوروب قارداش لَبی نده خِیزرانی یا رَسول الله
گُوروب دور یِدی قارداش داغینی اُلمز نَدَن زینب
سالوب شِبه پیمبر قَدینه آخر کَفن زینب
گُورنده اَکبری صد پاره چیخدی خِیمدن زینب
فضای مَحشر اِیتدی کَربلانی یا رَسول الله
حسین الله یُولوندا شُوقیله پیر و جوان وِیردی
بویوردی اَصغریم چوخ تشنه دور قُومه نِشان وِیردی
وِیروبلر سُو یِرینه اوخ اَلی اُستنده جان وِیردی
او شاهین اَصغرِ شیرین زَبانی یا رَسول الله
اوُلوب دور گُلشن ماتم ده (واقف) اَشکبار آغلار
چَمن اَطرافینی سیراب اِیدر اَبرِ بَهار آغلار
سُولان بیر غُنچه گُل عشقین ده (بیخود) زار زار آغلار
اوُلوب ذِکری حَسن وِرد زَبانی یا رَسول الله
- یکشنبه
- 28
- شهریور
- 1400
- ساعت
- 17:42
- نوشته شده توسط
- یوسف اکبری
- شاعر:
-
مرحوم بیخود سرابی
ارسال دیدگاه