ویردیلر زَهرِ عَداوت اولدى باغریم قان اوُغول گل
گوشهء غربتده وِیرم حسرتیله جان اوُغول گل
باشیم اوستونده تَلاوت ائتماقا قرآن اوُغول گل
واقفم ایستر منی چوخ قلبِ زار و بی قرارون
شایقم منده زیارت ایلیم بیر گُل جمالون
گُورماقا مظلوم آتاوی سال خراسانه گذارون
گر چه چوخ زحمتدی وِیرسون اَجریوی یزدان اوُغول گل
زَهر کینه ویردی مأمون بو غَریب و دل فگاره
یاندی اودلاندی وجودیم قَلبیم اوُلدی پاره پاره
گُوزده اشگیم دلده یاره دعوتیم وار بزمِ یاره
من نگاره میهمانم سن منه مهمان اوُغول گل
بیر غریبم غربتیم ده قیدی مه هرگز قالان یوخ
دوشموشم ایل دَن آرالی بیر نفر یاده سالان یوخ
دلده دردیم چوخدی اَمّا دردیمی دلدن آلان یوخ
اولماقا محنت شریکی ای منه جانان اوُغول گل
هر قضایه صبر قیلام شاهِ اقلیمِ رضایم
اوز آدیم گر چه علی دور من مُلقب بر رضایم
دین یولوندا هر مُصیبت ویرسه یوز دلدَن رضایم
بو رضانین باشی اوُسته ای گُل رضوان اوُغول گل
دوشموشم نچه زمان دور ای اوُغول سندن کناره
آتشِ هجرانویله واردی قلبیم دَه شَراره
حسرت دیداروام گل باشمى بیر آل کناره
گُوزلریمی قویما یولدا ای عزیزِ جان اوُغول گل
بیر بلالی باغبانم دوشموشم آیری گُلیم دَن
بیر غریب باغری قانم اطلاع یم یوخ ایلیم دَن
مهربانیم یوخدی اولسون با خبر دردِ دلیم دَن
دردیمی آلماقه دلدن دردی مه درمان اوُغول گل
بیر یانا هر درد و غصّم بیر یانا دردِ فَراقون
آختارور وصلون بو گُوگلوم باشدا شورِ اشتیاقون
آخر عمریم دَه گل بیر قوی دوداقی مه دوداقون
ایتماقا صحبت منیله صون نفس سن آن اوُغول گل
قلبیم اوُدلانماز بو قدری حالی مه اوُلسا یانانیم
اسکیلر حسرت اورگدن دردیمی اولسا آلانیم
بیرده گلسه باشیم اوُسته سن کیمی بیر مهربانیم
اُوندا جان ویرماق بو زاره چوخ اوُلار آسان اوُغول گل
خوش دوشر اللّهه گلسن گُوگلیمی آل سان جوادیم
بو غریب و دل فگارین قیدی نه قال سان جوادیم
قولّارین بیر رأفتیله بوینوما سال سان جوادیم
مهر فرزند و آتالیق ایتماقا اعلان اوُغول گل
گل اوُغول گل باشم اوُسته قوی ما حسرتله قالوم من
بوینوا چوخ رأفتیله قوللّاریمی بیر سالوم من
بیر اؤپوم گُل تک یوزوندن بیر گُوزل عطرون آلوم من
اوُل گوزل عطره فدا بو خستهء هِجران اوُغول گل
بو مریضِ عشقوم من وار دلیم دَه دردِ هجران
بسکه داغلی حسرتیم وار لاله تک باغریم اوُلوب قان
بیله اودلی دردِ عشقه وصلون اِیلر یاخشی درمان
ای منیم حاذِق طبیبیم دردی مه درمان اوُغول گل
اِی گُوزوم نوری جوادیم جان وئرور بو زار و خَسته
چوخ سُور قرآن صداوی بو غریب و دِل شکسته
گل او لحن یله قَرائت ایله قرآن باشیم اوُسته
فیض آلوم قرآن سسُون دن لحنی وه قربان اوُغول گل
من غریب ئولسم اوُرکده حسرتیم وار دور فراوان
کیم غریبه سینه داغلار کیم ایدر چاکِ گریبان
کیم عزیز ایلر عزاسین کیم دوتار شامِ غریبان
دوتماقا شامِ غریبان اوُلماقا گریان اوُغول گل
طوس دن بیر لاله گُل دَر یثربه بوردان گیدنده
داغ بَر دل لاله نی سن وئر نشان خلقه وطنده
لاله نی گُورجاق بوللَّر وار نه داغِ سینه منده
ایتماقا بو امری جاری ای شه خوبان اوُغول گل
جان ویرنده باشیم اوُسته کاش معصومه گلیدی
نه بلا واردی باشیم دا بیر او مظلومه بولِیدی
گُوگلیمی باری آلیدی دردیمی دلدن سیلیدی
تاپمیوب بوللّم او نالان گلماقا امکان اوُغول گل
باجیلارقارداش ئولنده گُوزلرین گُوز یاشلی باغلار
چوخ پوزار اطرافیانی شیونیله سینه داغلار
دوزدی آغلار هامّی امّا باجی چوخ نسگللی آغلار
باشیم اوُسته او گلنموب ایتماقا افغان اوُغول گل
واقفم شوقِ وصالیم صبرینی الدن آلوب دور
ایلیوب ایل دن وطن دن کُوه و صحرایه سالوب دور
قورتولوب عمری یول اوُسته قم دیارینده قالوب دور
گلمیوب ایتسون رضایه نوحه اوُل نالان اوُغول گل
دوندروب آفت خزانه عمرینین بوللّم بھارین
جان کیمی آغوشه چکموش قم یِری جسمِ نزارین
گیت اوُغول ایله زیارت سن اونون پوزقون مزارین
آل او توزلی مدفیندن نکهتِ ریحان اوُغول گل
درسینی زینب بی بیم دن اوّل آلمیشدی او خَسته
نامه می جان اوُسته آلدی سینیه اوُل دل شکسته
لیک عمَّم جان ویرردی قانلو کُوینک سینه اوُسته
هر ایکی عمَّن غمینده نالیه هر آن اوُغول گل
اوُلدی معصومه دیارِ قم دا مدفون عزّتیله
ویردی زینب لیک عمرین باشه دردِ غربت یله
تاپشورولدى قبره ایل سیز غُربتیله حسرتیله
حسرتین سن سال خیاله اشگون ایله قان اوُغول گل
(تائبا) آغلا امامِ هشت مه آغلار گُوزیله
رابطه سال بو امامِ مهربانین سن اوُزیله
دم آل اوندان مجلسه سال شور بو شیرین سوزیله
ویردیلر زَهرِ عداوت اولدى باغریم قان اوغول گل
- دوشنبه
- 29
- شهریور
- 1400
- ساعت
- 14:45
- نوشته شده توسط
- یوسف اکبری
- شاعر:
-
صادق تائب
ارسال دیدگاه