اِمامِ عسکری رِحلت اِیدوب دور شیعیان آغلار
دِیر اِیوای بابام اِیوای اِمامِ اِنس و جان آغلار
فَلک آغلار مَلک آغلار زَمین آغلار زَمان آغلار
یانار آغلار دِیر اَلدن اِمامِ مُمتحن گِیتدی
اولان خلقی حسن خلقی حسن آدی حسن گِیتدی
حقوقیندن جفائیله اولوب مَحروم ئولن گِیتدی
دوشنده یاده بو محنت زمین آغلار زمان آغلار
دِیر اِی ظلم اَلیله چوخ اولان مظلوم ئولن اِیوای
اولان اَجدادی تک درد آشنا مَغموم ئولن اِیوای
گورن آز عمریله چوخ جوخ جفا مَسموم ئولن اِیوای
اِیدر بو سوزلری تکرار اِمامِ اِنس و جان آغلار
گورن سان سیز جفا و ظلم لر هر دور دوران دا
وِئرن عمرِ شریفین باشه گاهی کُنج زندان دا
چکن دائم شکنجه قیدِ ظلمِ قُومِ عدوان دا
بو مطلب ذِکر اولاندا هم زمین و هم زمان آغلار
گه اَمر مُعتمد له حُجَتِ حقّ دستگیر اولدی
گهی زندان دا زندانبانِ بی رَحمه اَسیر اولدی
مکانی گه مکان بیر نچه دَرّنده شیر اولدی
گوروبلر شیر اونا پابوس اولوب اَشگی روان آغلار
صفاسی نچه شیرین اِیله دوتدی فرد بر فردین
سیلردی حُجَت اللّهین لباسینده اولان گردین
دِیردی ئوز دِیلیله هر بیری دِلده اولان دردین
بلی درد اَهلی مولایه اِدَر دردین بیان آغلار
بلی درنده لر گورجاق تانولار حُجَت اللّهی
ولیکن مُعتمد درنده لر تک تاپموب آگاهی
اونی اِئتمیشدی اِیله کُور باطن سلطنت جاهی
که قویدی اَهلِ بیتِ دینی اوُل شومِ جهان آغلار
بله اِعجازی گوردی مُعتمد لیک اولمادی بیدار
اِمامین قتلی نه بِل باغلادی اول مُرتدِ خونخوار
اِمامی اِیلدی مسموم پنهانی او بَد کِردار
اِیدنده یاد بو ظلمی اِمامِ عصر قان آغلار
یانار آغلار آتاسین یاد اِیدر سرگشته بیداده
گهی جدّی حسینه دَمبدَم آغلار گلر داده
دِیر اِیکاش اولیدیم منده سنله قانلو صحراده
دِیر یا کربلا هر دَم اِیدر محشر عیان آغلار
هزار اَفسوس جدّا اولمادیم اول قانلی صحراده
سنی یالقیزلینده کوفیان صحنِ غم اَفزاده
دینده یالقیزام الله گلیدیم اوندا اِمداده
همان اَحوالوه سبّوحیان و قدوسیان آغلار
دِیدون هَل مِن مُعین اَطرافون آلدی فرقهء اَعدا
اوجالدی های هو غوغا گرانِ شام اِیدوب غوغا
اولار یوزمین نفر خون خواریدی سن یکه و تنها
اِیدنده یاد او حالی گوزلریم هر دَم هر آن آغلار
چخا حاشا یادیمدان یاندی قلبون اِحتراقیله
باخوب نَهره دِیردون العطش عطشان دوداقیله
سنه اَهل جفا یاره ووراردی اِتفاقیله
او اَحوالون سالوب یاده هامی کَروبیان آغلار
یخیلدون اِئتدی رنگین ذُوالجناحون کاکلین قانه
خیامِ طاهراته یوز قویوب قاچدی یانا یانه
دِیلینده الظلیمه الظلیمه گلدی اَفغانه
او خونین صَحنیه عمه مّ گوزی تا وار جهان آغلار
زبانِ خامه (تائب) بیر بیوک غوغایه گویادی
دیور قان قتلگاهیندن بیانی محنت اَفزادی
سوزی چکمه اورا قاندان دولی پُر موج دریادی
نی ده غرق اِیدر هم غرق اِیده هم غرق اولان آغلار
- دوشنبه
- 29
- شهریور
- 1400
- ساعت
- 15:16
- نوشته شده توسط
- یوسف اکبری
- شاعر:
-
صادق تائب
ارسال دیدگاه