مِی قُربِ یاریله مست اولان وطن آیرسی، وطن ایستمز
کفنِ شهیدِ رهِ وفا، خس و خار اولار کفن ایستمز
هر او عاشقی که الستیده اولا یار الیله پیاله نوش
غم و دردِ عشقِ نگاریله هامی عمرونی دولانار خموش
که حریرِ خونیله تا اولا، تنِ چاک چاکیله حُلّه پوش
او حریرِ پیرهنین گئیر، داخی اوزگه پیرهن ایستمز
وطن آیرسی اولان عاشقین، وطنی دیارِ نگاریدی
کفنِ شهیدِ رهِ وفا، سرِ کوی یار غباریدی
گَله هر بلا گوره هر جفا، هاموسی عنایتِ یاریدی
گِله ایلمز ، غمِ دل یمز، کفن ایستمز، وطن ایستمز
من اگر چه بزمِ الستیده، مِی جامِ عشقیله مستیدیم
هامی اشتیاقیله مایلِ قدحِ شرابِ الستیدیم
هوسِ شرابِ الستیله، من ازلده باده پرستیدیم
او قدحِ شرابنی نوش ایدن، داخی بادهء کهن ایستمز
من ازلده محفلِ عشقیده غمِ یار، حلقه بگوشی یم
هامی کوه و دشتی دولانمیشام، رهِ دوست خانه بدوشی یم
دل و جان زباندی ولی اوزوم، غمِ عشقِ یارِ خموشی یم
ایله جان هوای لقاده دور که حریمِ جان و تن ایستمز
هامی گوشِ هوشیله طالبِ نغماتِ وصلِ سروش اولان
هامی عمرونی رهِ عشقیده غمِ یاره حلقه بگوش اولان
هوسِ دیارِ نگاریله هامی یولدا خانه بدوش اولان
سرِ کوی دلبری آختارار، گُل و گُلشن و چمن ایستمز
من او عاشقم که نگاردن یتیشوب ازلده نویدِ عشق
او نویدِ عشقیله عشقیمه، ایدوب اهلِ عشقی مریدِ عشق
هامی شهرِ عشقی دولاندیروب گتوروب ایدوبدی شَهیدِ عشق
او شهادتیله ووروب رقم که شَهید اوُلان کفن ایستمز
هامی کُون غرقدی حیرته، بیله عشقدن بیله شوردن
آلوب انعکاسِ فروغِ حقّ، دل و دیده، جلوهء طوردن
دولوب آبگینهء صافِ دل رشحاتِ بادهء نوردن
پُر اولا اگر چه شرابدن، بو پیاله خُم شکن ایستمز
من او دُرد نوشم اَلستیده منی یار ایدوب اوزی مِی فروش
مِی وَحدتیم هوسینده دور هامی مِی پرستِ پیاله نوش
بو شرابدن او که نوش ایدوب، ایله مست اولوب که دوشوب خموش
که قیامِ حشره کیمی داخی مِی، لعلِ فام دَن ایستمز
نه اولار منیم کیمی مِی فروش، نه اولار اولار کیمی باده نوش
نه اولار منیم کیمی دُردکش، نه اولار اولار کیمی تیزهوش
نه اولار منیم کیمی پیرِ عشق، نه اولار اولار کیمی خرقه پوش
که بو جمع انجمنین گورن، داخی اوزگه انجمن ایستنمز
دولالی مِی خُمِ وصلیله، بو بلا چولونده پیاله لر
چمنِ محبّتی سر به سر بَزیوبدی مشعلِ لاله لر
دوزولوبدی لاله لر اوستونه نَسَقیله قرمزی ژاله لر
که عقیقِ سرخِ یمن یقین، بیله ژاله لر گورن ایستمز
نه گوروبدی چرخِ کُهن گوزی بیله لاله لر، بیله ژاله لر
نه بیله لبالب اولوب مِیِ خُمِ وحدتیله پیاله لر
نه سحر صبا اَلینه دوشوب بیله سرخ فام کَلاله لر
بو کَلاله لر بیله ژاله لر، گُلِ سوری و سمن ایستمز
نه اولوب جهان اولالی جهان، بیله گلشن و بیله لاله زار
نه اولوب بهارِ اَلستیدن بو گونه کیمی بیله نو بهار
نه گوروب بهاری بو لطفله، نه خزان بو دردیله روزگار
بیله بیر بهار و خزان یقین، داخی گردشِ زمن ایستمز
نه اولار بو جمعِ ستوده تک، بیری آشنای غمِ نگار
نه جهاندا اهلِ محبّتده یتوشر بولار کیمی لطفِ یار
نه اولار داخی رهِ عشقیده بولار اشتیاقیده جان نثار
که متاعِ جانینی دلبره، هامی بَذل ایدوب ثَمَن ایستمز
پَر آچوبدی مرغِ دل ایستوری، ایده ترکِ کنجِ قفس گیده
داخی کاروانِ حیاتیدن کسیله صدای جرس گیده
یِری وار فضاده ولی قالا، هامی عالَمِینه بو سس گیده
که سلوکِ راهِ وفا ایدن، رهِ دیو و اهرمن ایستمز
من او مستِ جامِ محبّتم، غمِ عشقِ یاریدی دولتیم
که محبّت اهلینی حشره تک ایده جاقدی جذب، محبّتیم
هامی اهلِ عشق و محبّته یته جاقدی لطف و عنایتیم
اودی گوز تیکوب منه (معتکف) غمه چاره اوزگه دَن ایستمز
- دوشنبه
- 29
- شهریور
- 1400
- ساعت
- 16:42
- نوشته شده توسط
- یوسف اکبری
- شاعر:
-
علی اصغر زاهدی(معتکف)
ارسال دیدگاه