گچر که فصلِ زمستان، دمِ بهار گلور
سولان گیاه و گُله بیر دم آشکار گلور
ترابِ تیره گیاه و گلیله خوش بزنور
قبای سبزیله سردارِ افتخار گلور
گلور ترانيه بلبل چمن هواسیله
خیالینه نه خزان نه جفای خار گلور
نسیمِ صبح ویرور عندلیبه گُل خبرین
فراق رنجی گئیدور وَصله اعتبار گلور
ولیک یوخ خبری یاسمن باتوب ياسه
بسانِ طرّهء غمدیده تار مار گلور
بنفشه قاره گیوب باش قویوبدی غم دیزینه
دیمه یوزونده کی شبنمدی اشکبار گلور
او غنچه که گوروسن آچمیوب دولی قاندی
حیا ایدور آچیلا بولمورم نه عار گلور
نه حقّی واردی آچوب لاله قان پیاله سی تک
ایدوبدی سینه سینی غصّه داغدار گلور
یقین دیارِ بلادن صبا خبر گتیروب
خيامه اکبرِ شهزاده زخمدار گلور
بدن یارالی، اوزی خسته، لبلری تشنه
یارالاریندان آخور قانی چشمه سار گلور
علم یاتیردوب، عدو ئولدوروب، جگر یانوری
آتاسی ایلیه سیراب امیدوار گلور
بیلور پیاده گرک شه حضوری نه گلسین
ولى يارالیدی یوخ طاقتی، سوار گلور
آتاسی خيمه قباقینده بوینی چگننده
تیکوبدی گوز یولا نه صبر و نه قرار گلور
نه گوردی توز آراسندان جوان اوغول چیخدی
معاینه که على اَلده ذُوالفقار گلور
نجه گلور بويانوب قانه قرمزی گُل تک
یوزین، گوزین، سرِ زلفين دوتوب غبار گلور
يتشدی دوشدی آتندان ایدوب اَدای سلام
آتانی غملو گوروب گور نه غمگسار گلور
قولون آتا بالا بیر آچدی قول بويون أولدی
او حاله ایمدیده زَهرادن آه و زار گلور
سو ایستدی آتاسیندان سو اولمادی ممکن
فرات او گوندن اولوب خوار و شَرمسار گلور
آتا دیسون من اوزومده اوغول علی یانیرام
صراحتاً دیماقی گوردی ناگوار گلور
آلوب اَموب دلینی بو دلیله آندیردی
که یعنی گور جگریمدن منیمده نار گلور
دالی دالی چکیلوب شاهزاده چکدی فغان
گوروب آتا نفسی اوُد وِیرور شرار گلور
دِئدی سنون عطشون چوخدی ای بابا مندن
اگرچه اشکِ ترون مثلِ جویبار گلور
ایله اَدبلی اوغول ایله مهربان بیر آتا
نه روزگاره گلور نه او روزگار گلور
دِئدی قایت علی فیضِ شهادتی درک اِیت
غم ایلمه که دالونجا بو دل فکار گلور
بله گمان ایدرم شام اولونجا جدّيم اوزی
سنه سو ویرماقا دلده مین اضطرار گلور
او شاهزاده قایتدی گوروب که اهلِ جفا
ایدوبدی شبهِ نبی قصدِ کار زار گلور
قلج چکن اوخ آتان بیربیرین ایدوب ترغیب
گَلون دِیر دیلا بر زخملی شکار گلور
ازون ویروب قوشونا باخمادی او تشنه جوان
ياغش کیمی یاغوری تیرِ آبدار گلور
پوزوپ صفوفی یاتیردوب علملری یکسر
وروب یخوب قباقا هانسی نابکار گلور
هزار حیف که مَنقذ قلجلادی باشینی
دیمه که یر یوزونه ایله کين شعار گلور
باشندان آخدی قزيل قانی گوزلری دولدی
آت استه دور ممقا گوردی اقتدار گلور
ایکی قولون آتینون بوینونا حَمایل ایدوب
گوروب که قان گیدیری ضعفِ اِنزجار گلور
عنان مركبینی دوندروب خيامه طرف
آتا یوزون گوره بیرده او گلعذار گلور
او حینده اوجالوب طبلِ جشن هریاندان
صدای هل هله فریادِ گیر و دار گلور
عقاب رم یدی یوز قویدی دسته لر ایچینه
یارالی صید اوزی صیّادی نه دچار گلور
آلوب آراليقا صفلر، چکوب قلجلارینی
اَلنده حربه ورور هانسی کینه کار گلور
او گیر و داريده يعقوب آدینلی بیر کافر
اَلینده خنجر ایده ظلمون آشکار گلور
نه ظلم ایدوب ديمرم شاهزاده زین اوسته
دورانمادی داخی توپراقه جان نثار گلور
یِره دوشن کیمی نقش اولدی یرده چون تصویر
نه ایله صورت اولور نه ایله نگار گلور
همین بو قدر نفس گلدی سسلدی آتاسين
اوغول سسین آتا آلدی که زار زار گلور
ادب یولیله دیور ای بابا خدا حافظ
اجل گلوب گیدیرم پیکِ وصل یار گلور
بابا غم ایتمه، منى جدّیم ایلدی سیراب
نه بیرده رنجِ عطش بیرده نه فشار گلور
علاوه بر دولی جام الده منتظر دی سنه
تکوبدی گوز يولا فریادِ انتظار گلور
جوان اوغول سسین آلدی دئدی اوغول گلدیم
بولنمورم نجه اول شاهِ تاجدار گلور
باخان دیردی قوری ببر قفسدی روحی چیخوب
دوتوب وجودینی بالمرّه انکسار گلور
اوزون سالوب يِره نچه قدم قالاندا اِمام
او آز یولی نجه گور سِیر با وقار گلور
دورانمادی ایاق استه دیزی دیزی سورنوب
جوان اوغول يانینا گور نه خاکسار گلور
یتوب دوشندی او خندان گُل اوسته بلبل تک
گوروب نه گُل گوزه باخدیجا نوکِ خار گلور
نه حالدیدی حسین بولمورم خدا بولوری
اله تصوّر ایدنده بئله عیار گلور
گوزی باخوردی ولکن باخان دیردی ئولوب
نفس اگر چه گلور مثلِ احتضار گلور
توکوب سرشکینی سسلندی آه وا ولدا
گوز آچ اوغول گوزمه غصّدن غبار گلور
گوتوردی باشینی یِردن آلوب دیزی اوسته
نه گوز گورور، نه دانش دیرسین اختیار گلور
آتا باخور بالا قان ایچره اَل ایاق چالوری
سرشکِ چشمِ تری موجه چون بهار گلور
اوغلول اولنده آتانی یانندا قویمازلار
قبیله اِیل ایله بیر وقته هر نه وار گلور
اَلین دوتوب آپارولاّر کناره رسمدی بو
تسلی ویرماقا بیر جمعِ سوگوار گلور
ولی حسینون اَلیندن دوتوب کناره چکه
نه بیر نفر تاپیلور، بیر نفس نه یار گلور
باشی دیزینده، یوزی گُل یوزونده جان ویردی
خیاله گور ایله بیر صاحب اصطبار گلور؟
گلور که نعشین آپارسین خیامه اَل دوتمور
او یِرده قویسون اَلیندن خدا نه وار گلور
آپارماسين اوزی گیتسون قویوب گیده بولمور
بولور آپارماسا ليلا جنون وار گلور
اوزی آپاردی و یا بولمورم بنی هاشم
سوزون صریحی بودی نظمه اختصار گلور
همین بو قدر شبیهِ پیمبرین نَعشی
خیامِ طاهره ده تاپدی اشتهار گلور
اياق يالين باشی آچوخ بانوانِ پَرده نشین
تصوّر اِئت نجه گور خیمدن کنار گلور
خیامدن چخان اکبر جنازه سین که گورور
ساچین یولا یولا بی معجر و خمار گلور
نجه جنازه؟ قزیل گُلدی بیر عبا دولوسی
گَلن گلور که باخور شوره چون هَزار گلور
ورولدی حلقهء ماتم جنازه دوره سینه
عجبدی دوره گینه چرخِ کَجمدار گلور
گون اوزلولر سرِ زلفين آچوب یوزه توکدی
دوتولدی گُون يوزی گویا که لیلِ تار گلور
دولوب بَلا چولی واکبرا صداسیندن
فغانی ايمديده ليلانون آشکار گلور
ایاق طرفده قویوب یوز اوغول قدم لرینه
دوزلماقا نه توان و نه اِقتدار گلور
سُوور اوغول اَیاقی آتدا جان اِيده تسليم
نچاره نه ملک الموتِ کردگار گلور
(شهاب) اگرچه سوزون اختیاری سنده دگل
نظامیلن اوزی چون دُرّ شاهوار گلور
بس ایله سن، بو مصیبت او گُون تمامه يتر
که حُجّة ابن الحسن اَلده ذوالفقار گلور
- سه شنبه
- 30
- شهریور
- 1400
- ساعت
- 19:21
- نوشته شده توسط
- یوسف اکبری
ارسال دیدگاه