ای کفن پوشان عاشورا سلام اوُلسون سیزه
جان نثارانِ رَه مَعنا سلام اوُلسون سیزه
پیروی اولسون گرکدور عالمِ امکان سیزه
رهبر اولدی راهِ حقده جلوهء جانان سیزه
حجّت ابن العسکری سویلر آتام قربان سیزه
شأنوزه الحّق او دور دار السلام اولسون سیزه
ای طرفدارانِ احکامِ خدای ذُوالجلال
یازماقا اوصافوزی عاجزدی هر صاحب کمال
ساحتِ قرب الهی دَه عجب تاپدوز وصال
گلمیوب گلمز سیزه همتا سلام اولسون سیزه
دعوی حقّ ایلدوز ناحقّی یخ دوز آشکار
مکتبِ قرآنه آرتوردوز جهاندا افتخار
قویمادوز آیینهء اسلامی اولسون لکّه دار
ایلدوز اوز عهدوزه ایفا سلام اولسون سیزه
اهلِ لاهوته ثبوت اِیت دوز که قادر دور بشر
معنوی نیروئیله اولسون ملکدن فوق تر
علویان ناسوتیانه غبطه ایتسون سر بسر
مدرکیم قرآندا پا بر جا سلام اولسون سیزه
ای حسین ای فاطمه دلبندی روحِ مرتضی
مهجهء قلبِ پیمبر خامسِ اهلِ کَسا
ویردی سنله ال اله هیجاده یتمش بر فدا
بیر بیریندن هر بیری اَعلا سلام اولسون سیزه
ای بقای دین اوچون جاری اولان اَل قان لاری
ای منای کربلانون شیر دل قربان لاری
ای خانیم اُمّ البنینون نامدار اوغلان لاری
قهرمانانِ صفِ هیجا سلام اولسون سیزه
ای علی اکبر قتیلِ اوّل کوی وفا
آلتی گوشه قبره دنیاده مسبّب مه لقا
وی سو اوستنده بوغازی اوخلانان دیلسز بالا
فدیه گاهِ حضرتِ زَهرا سلام اولسون سیزه
ای موثر تر دلِ آفاقه دردِ دل لری
لوحِ محنتده سرِ لوحه اولان نسگل لری
ای جناب زینبون خوش عطر و زیبا گول لری
گل رُخانِ گل سِتان آرا سلام اولسون سیزه
ای او کس لر که کنارِ کوفه دَن چخ دوز گجه
خانمانوزدن اوزوز بیل دوز که آیر یلدوز نجه
ای حبیبِ با وفا وی مسلم ابن عوسجه
کشتگانِ حقّ و حق بینا سلام اولسون سیزه
ای ایکی نورس جوانِ خوش نهاد و با وقار
محنتوز آلدی حسین ابن علیدن اختیار
قاسمِ شهزاده عبدالله طفلِ جان نثار
نوجوانانِ ملک سیما سلام اولسون سیزه
ای طبیبِ عیسوی اسلامه یول تاپدون عجب
ای عقیلون صف شکن اوغلانلاری والا نسب
ای زُهیر ای حرّ خوشخو ای بُریر و ای وَهب
ناصرانِ سرور بطحا سلام اولسون سیزه
باشیوه ای نو عروسی که فلک سالدی قرا
ای او بانولر که اولدوز شاهدِ درد و بلا
اُمّ کلثوم و سریّه لیلیِ عصمت لقا
ای رباب ای زینب کبری سلام اولسون سیزه
ای ایکی لب تشنه قیز که حالوز اولدی درد ناک
لبلروز اولدی سوسوز لوق شدّتیندن چاک چاک
سینوزی قوی دوز قوم اوسته ایستیدن اولدوز هلاک
نطقدن سالدی سیزی گرما سلام اولسون سیزه
ای ایکی غم کش باجی بر قارداشون جان داده سی
شمعِ رخسارِ علیّ اکبرون پروانه سی
اولدی اکبر سیز سیزه دنیا بلا کاشانه سی
ای رقیّه ای خانم صغرا سلام اولسون سیزه
(انورا) پر شور اولور مغزون یارل دوق جان کلام
بو مطالب دَن نقدری شرح اولا اولماز تمام
ویر جنابِ مسلمه اوغلان لارینا بیر سلام
اِئت خلوصی له صورا اِنشا سلام اولسون سیزه
- سه شنبه
- 30
- شهریور
- 1400
- ساعت
- 19:31
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه