یارانمییدی اگر نورِ حضرتِ زَهرا
نه آی اولوردی نه گون، نه بو پرتو دنیا
کیمون جهاندا یتر شأنی شأنِ زَهرایه
بونون تَفَوُّقی وار هاجریله سارایه
غلام دور بونا عیسی، کنیز دور مریم
حبیبه دور بو خانم ذّاتِ حَیَّ یکتایه
او گون که خالقِ عالم یاراتدی افلاکی
چکیلدی پردهء ظلمت سپهرِ مینایه
ملک لر ایلدیلر استغاثه معبوده
یتوبله نورِ بتولی له فیضِ عُظمایه
خدای خلق همان دمده نورِ زَهرانی
ایدوبدی عرشی نه قَندیل وار پیرایه
منوّر ایلدی افلاکی فاطمه نوری
دیولدی اسمی نه زَهرا همین بو معنایه
بشر غلطدی دیماق، نورِ مَحض دور بو خانم
گلوب بشر کیمی ظاهرده دارِ دنیایه
آناسینا آنا بطنینده اولدی هم صحبت
او دور مُحَدِّثه صدق اوُلدی بو دل آرایه
تولّدون دَه زنانِ قریش گَلمَدیلر
خدیجه نین اوجالوب آهی عرشِ اَعلایه
یر اوسته ایتدی خواتین دار خُلدِ نزول
اولوب لا قابله نورِ بتولِ عُذرایه
بهشت حلّه سینه ایلیوبله پیچیده
دوشه مباد او جسمِ لطیف اِیذایه
ایله لطیفیدی جسمی خیاطه دوشسیدی
سالوردی خطّ او گُلدن لطیف اعضایه
اَیا اِمامِ زَمان داد ظلمِ ثانی دَن
شهیده یولّادی زَهرانی دارِ عُقبایه
قاپی دالیندا قویوب یاندوراندا درگهینی
اوجاتدی ناله آنان فاطمه ثُریّایه
بویوردی فضّیه گل ظلمیله بالام ئولدی
دایانما تیز خبر ایله علیَّ اَعلایه
چخوب علی یخولوب گوردی حضرتِ زَهرا
گیدوب تحمّل و صبر و قراری یغمایه
عباسینی گوتوروب سالدی فاطمه اوُسته
گوگل بو یِرده دوشوب بیر ملالِ عُظمایه
دوریدی کاش علی قبریدن اَلینده عبا
گلیدی کرب و بلا دشتی نه تماشایه
سالیدی اوردا قیزی زینبین عبا باشینا
جمالِ عصمتی مستور اولیدی اَعدایه
آناندی چونکه (حسینی) شفیعهء محشر
غم ایتمه گیتسن اگر دست خالی عُقبایه
- سه شنبه
- 30
- شهریور
- 1400
- ساعت
- 20:42
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه