ای جعفری مَذهب لَرین آرامِ جانی
گیتدون عزادار اِیلدون اهلِ وِلانی
ای صادق آل عبا
اولسون سنه جانلار فدا
ای وای آقام وای
ای دللّره داغلار قویان ای وای آقام وای
امید اِئوین باغلار قویان ای وای آقام وای
ای شیعه نی آغلار قویان ای وای آقام وای
ای اِیلین ماتم زده پیر و جوانی
ای سینه سی گنجینۀ علمِ اِلهی
ای محضرِ درسی اولان دین پایگاهی
ای سایۀ قدسی اولان حق شاهراهی
مَذهب دَه روشن اِیلین اهلِ وِلانی
جسم بیانه ای ئوزی بیر روحِ ناطق
ای خالقِ فَضل و اَدب مَخلوقِ خالق
تعلیم اِئدن ای اهلِ صدقه فقهِ صادق
ای اوُستادِ مکتبِ علم و معانی
گمراه اِیدوبدی اُمّتی باطل یازنلار
حق علمینی مدفون اِیدوب مَدفن قازانلار
تاپمازدی یول سن اولماسی دون یول آزانلار
فقهی له آگاه اِیلدون کلَّ جهانی
سن آچماسی دون مکتبِ درس و دیانت
سن سالماسی دون عالمه نُورِ فقاهت
تاریک اولاردی عالمِ دین و شَریعت
سن زنده اِئتدون شَرعِ حُکمِ مُصطفانی
سن فقهی له دانانی جاهل دَن آیردون
سن علمی له نادانی عاقل دَن آیردون
چکدون ریاضت حقی باطل دَن آیردون
وار دور سنون فقه ونده روحِ جاودانی
مولا سنون اسلامی دَه چوخ خدمتون وار
هر بیر پریشان جَمع دَه جمعیتون وار
اهلِ تشیُّع گردنی ندَه منّتون وار
سن سن سرافراز اِیلین بو شیعیانی
سن حکمِ شرعِ ذاتِ بی چونی دیریت دون
عاشوردَه ناحق آخان قانی دیریت دون
قاندان حسین یازمیش او قانونی دیریت دون
دوتدون مَرامِ شَهسوارِ کربلانی
آچ دون سن اسلام اهلی نه راهِ سَعادت
منصور جانی اِئتدی بو اَمره حَسادت
آری اولار گُمراه اولان لاردا بو عادت
قصد اِئتدی خاموش اِیلسون نُورِ خدائی
اِئتمیشدی بسکه سست اونی جامِ غروری
حقی گورنده خیره اُولدی چشمِ کوری
حقّونده آرتوردی سنون هر ظلم و زوری
ظلمین دَه چخدی حَددَن اُول خَصمِ جانی
باخموب که سن دِلبندِ پاکِ مُصطفا سن
باخموب که سن فرزندِ شاهِ لافَتاسن
باخموب که سن صبرِ دلِ خیرالنسا سن
بُلدی روا حقونده هر جُور و جَفانی
باخموب که سن چشمِ چراغِ ماسواسن
باخموب که سن بیر یادگارِ مُجتبا سن
باخموب که نورِ چشمِ شاهِ کربلا سن
گتدی بلالی باشیوه هر بیر بلانی
ئوز کینه سین زَهرایه معلوم اِئتدی آخر
سن تک اُمید خلقی مَظلوم اِئتدی آخر
انگورِ مَسمومی له مَسموم اِئتدی اخر
سندَن او زَهر آلدی داخی تاب و توانی
آچدون گُوزون باخدون دوشنده اِحتضاره
گُوردون بالان موسا آلوب باشون کناره
جدّون حسین امّا دوشنده پاره پاره
گوردی باش اوسته زینبِ بی خانمانی
فرمایش اِئتدی ای منه جانانه زینب
شمعِ وفایه ای اولان پروانه زینب
بوردا دایانما بوردا وار بیگانه زینب
گئت خیمه گاهه باشه یغ آلِ عبانی
اَل آچسا ظلمه آلِ فرزندِ سُمیه
قویما وورا قزلاریمی آلِ اُمیّه
قویما خصوصاً آغلاسون نازلی رقیه
چوخ اِیسترم اوُل دخترِ شیرین زبانی
بیر کوچه مشگی نوحه خوان اِئتدی تقاضا
شوقیله (تائب) اِئتدی بیله نوحه اِنشا
اُمِیدیله روزِ جَزا خاتونی زَهرا
اوتدان قوتارسون شاعریله نوحه خوانی
- چهارشنبه
- 31
- شهریور
- 1400
- ساعت
- 13:18
- نوشته شده توسط
- یوسف اکبری
- شاعر:
-
صادق تائب
ارسال دیدگاه