قارداش علی بیر آز دایان گیتمه بیله شتابیله
باخ بو غریب آناما یان سنده او التهابیله
گر چه اؤزی سالوب سنون بوینوا ذُوقی له کَفن
لیک گنه دوزنموری تیتروری دیز اَسور بَدَن
عمّه لَریم باخور یانور حالی نه بالخصوص من
لَرزه یه دوشموشم بیله اوندا کی اِضطرابیله
بیله آلوب لا دوره وی باجی لار عمّه لر سنون
بعضی دوشر اَیاقیوه بعضی اَلون اؤپر سنون
بعضی دوتار قباقوی بعضی یولون کَسَر سنون
یوخدی مَگر قایت ماقون واضح اِیله جوابیله
سسلر آنام کناردَن بیرجه بو ناله دَن دویون
سیز چکلون کناره بیر اکبریله منی قویون
تا بیر اولاخ بو آخرین ساعتِ وََصل قول بویون
وَصل دَه کامیاب اُولوم منده او کامیابیله
شُوقدَن آغلوسان بیله عارضه گُوز یاشون آخور
یا آنامون بو غربتی قَلبوی یاندیر یاخور
گَل گُوزیوین یاشین سیلوم غصّه لَنور آنام باخور
بیله دولوب دی گُورموسون گُوزلرون اشکِ نابیله
سن رهِ حقّ فداسی سن واردی غریبه زینتون
خوش بزیوب بو آغ کفن سَرو مثال قامتون
توک یوزه اَبرِ زلفوی حفظ اِیله ماه صورتون
رَدّ اُولا شرَّ نظر بلکه همان حجابیله
وار علی برگِ گُل کیمی صورتوین لَطافتی
حیف طراوتین آلوب سوزِ عطش حَرارتی
بسدی سنه بو شدّتِ تشنه لقین اَذیّتی
یانماسون عارضون داخی تابشِ آفتابیله
ایمدی که چرخِ دُون منی توش اِیلدی فراقی وه
یوخدی لیاقتیم قویام بیر جه دوداق دوداقی وه
باری اِجازه وِیر گلوم بیر دوشنوم اَیاقی وِه
فخر اِیلیوم تُراب تک شبهِ اَبُو تُرابیله
هر باجی نون بو رَسم دور قارداشی اِیلیه سفر
آئینه و کلامِ حقّ حاضر اِیدوب روان اِیدر
بلکه خصوصی یاتی وار بیرده دالنجا سو سَپر
یوخدی یولوم او اَمره بو شدّتِ قَحطِ آبیله
گر چه دالون جا سَپماقا سُو باجون اِعتذاری وار
علّت او اِعتذاری دور بیر بیله آه و زاری وار
لیک یوزوم دَه اَشک مون چشمه کیمی گُذاری وار
سو سَپَرم دالون جا بو گُوزدَن آخان گلابیله
جدّی میزه دِیللّه چون آئینۀ تَمام حقّ
سن دَه اوُنون شَبیهی سن سن دَه دَه وار بو نامِ حق
جمع اُولوب وجودیوه جمله جَهت کلامِ حق
نچّه دلیل خاصّیله نچّه گُوزل خطابیله
یاده دوشور او کُوچ اِیدن ساعتی میز مَدینه دَن
شُعلۀ آهیم اُوج اِیدیر سُوزِ دَرونِ سینه دَن
نولدی سبب بو نوعی تئز دویدون علی سکینه دَن
قطع اِیلدون عَلاقه وی اِیمدی بو دل کبابیله
گُوگلوم عَلاقه باغلیوب غالیه تارِ زلفوه
رشتۀ جان و دل او دور باغلیدی تارِ زلفوه
نیلر آنام گُوره قونوب گرد و غُبار زلفوه
شانه اِیدوبدی تِل به تِل عَنبر و مُشکِ نابیله
ایمدی تَدارک اِیلیوب فاطمه عیش اَساسی وی
حاضر اِیدوبدی ساخلیوب بوخ جادا طوی لباسی وی
یَثربه یتسه بو خبر دوتسالا خلق یاسی وی
نیلر او وقتده باجون بو غمِ بی حسابیله
واردی یادیم دا یولدا کی اِیلدی قون مراقبت
حُرّ کسنده یول بیزه اِیتدون اُوزون مُواظبت
وَحشته قویمادون دوشه نازلی سکینه عاقبت
منقلب اُولمادوخ او گُون اِیله بیر اِنقلابی له
اُولسا نگاه بان منه زَجریله شَمرِ بَد شیَم
گاه بو دشمنِ نَبی گاه او خَصمِ ذُوالکرم
گاه بو قمچیِ جفا گاه او سیلیِ ستم
زَجر وورار جفائیله شمر دوگر عَتابیله
(شأنی) توجه اِیتمه سه شاعره نوحه صاحبی
نوحه دَه دَرج اِیدر نجه بیله گُوزل مطالبی
وار نفسی ندَه بیر اَثر اِیله دعا او (کاتبی)
اِیستدی هانسی نوحه نی نَظم اِیلدون شتابیله
- چهارشنبه
- 31
- شهریور
- 1400
- ساعت
- 17:22
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه