قویدی دنیایه قَدم شاهِ خُراسان بَه بَه
صحنۀ عالم اوُلوب صحنِ گُلستان بَه بَه
جلوۀ لَم یَزلى عالمِ اِمکانی دوتوب
زَحمتِ ذاتِ اَحد گُنبدِ مینانی دوتوب
نورِ یَزدان نجه گُور مُلکِ خراسانی دوتوب
اِیدوب آفاقی خدا روضۀ رضوان به به
بودی سلطانِ سلاطین بودی دریای وَفا
گلشنِ دینِ خداونده صفا آدی رضا
لیک مشهوری دی دللّردَه غَریب الغربا
غربایه اِیدر اؤز لطفنی اِحسان به به
حُجتِ ذاتِ اِلهی دی بو سلطانِ اَنام
بونون آدیله تاپوب رونقِ کامل اِسلام
آپار ای بادِ صبا بیزدن او مُولایه سلام
که او دور اُمّتِ پیغمبره سلطان به به
هر کیمون اوُلسا مُهم اَمرى او سلطانه دییَر
قالسا مُشگل دَه بیری اوُل شَهِ دورانه دییَر
شیعه لر دردِ دلین شاهِ خراسانه دییَر
لطفیله اِیلر هامو درده او دَرمان به به
نا اُمید اِیلمیوب بیر کسی عالم دَه بو شاه
اِیدر او زائری نه لطف و مُحبّت له نگاه
سُویله لاحَولَ وَ لا قُوَّةَ اِلّا بِالله
بوندا اوز قدرتین حق اِیتدی نمایان به به
بیله فرمایش اِیدوب بو سوزی بیر گُون طاها
یعنی پیغمبرِ اَکرم او شَهِ اَرض و سَما
دَفن اولار مُلکِ خراسان دا بالام آدی رضا
جگریم پاره سیدی اوُل شَهِ دوران به به
یِرده هر کیم سه زیارت اِیلیه اوُل شاهی
گُویده گُویا که زیارت اِیلیوب اللّهی
هر کسین اوُلسا طوافین دَه دلِ آگاهی
گُورر اوُل بُقعَه دَه وار رَحمتِ یَزدان به به
گر چه اَیامِ خزاندی هره بیر دِیل چاغورور
گلشنِ عشقدی اوُز بلبلنی گُل چاغورور
مَجلسه اِیله نظر بلبلی بلبل چاغورور
دوتوب هر بیر طرفی ماُدِحِ خوش خوان به به
سسلری هر کس او سلطان وِلانین آدینی
مَشق اِیدوب دور اوزینه خلق رضانین آدینی
بیزده بوردان او غَریب الغربانین آدینی
دییروخ خوش دِلیله هر دَم و هر آن به به
ایّها الناس بیلون خسروِ اَمجَد دی رضا
اؤزی دریای کرم سَرورِ سَرمد دی رضا
جانِ زَهرا و علی روحِ محمّد دی رضا
سَببِ دینِ خدا رُونقِ قرآن به به
مُشکله دوش سه بو دنیاده بیری خوار اوُلسا
چاره سیز قالسا بیوک درده گرفتار اوُلسا
یِتر آماله بونون قبری نه زوّار اولسا
اِیلمز بیر کسی مأیوس بو سلطان به به
آچیلوب ملّتِ اِسلامه بو رحمت قاپوسی
باغلیوب بابِ خُرافاتی حَقیقت قاپوسی
قَسم اللّهه بودی خَلقه شَفاعت قاپوسی
حشردَه قویماز اوُلا خلق پریشان به به
غم دوتاندا هامونین قلبنی روزِ عَرصات
وِیره جاق شیعه لره غصّه و غم دَن بو نَجات
بیله بیر سروره هر یِرده دِیولسه صلوات
اؤزی حاضردی اِیدر لطفِ نمایان به به
بو دور عالم دَه وِئرن مکتبِ اِسلامه شَرف
بودی دریای محبّت دَه دُرِ دینه صَدف
بیزه عالم دَه بودی مَقصد و مَنظور و هدف
تاپوب عزّت بونیله ملّتِ ایران به به
#شالچی_یانین ائوی، بو شعری (علومی) اوخودی
مَجلسِ جشن دَی سوز مُشتری سی چوخ چوخودی
لیک صد حیف اوُلا #فَرسادی بو پرده یوخودی
او دیردی بیله اَشعاره فَراوان به به
- چهارشنبه
- 31
- شهریور
- 1400
- ساعت
- 17:41
- نوشته شده توسط
- یوسف اکبری
- شاعر:
-
علومی تبریزی
ارسال دیدگاه