حیرتدیم بیان ایلیم غم مطالبین
شرح ایلیوم نه طرزیله زهرا مصائبین
تاب ایلیوب جهاندا او قدری مصیبه
قورتا میان بلاسی سالور فکری حیرته
فکر ایلدوگجه عقل دوشور پیچ و خم یولا
عقلیم چتین مصائبنه بس محیط اولا
امر محاله ایلمرم وقتمی هدر
شرح ایلورم مصیبتنی بیلدیگیم قدر
اّول گرک عریضه ویرم شأن و شوکتین
امّ الائمه عصمت کبری جلالین
چوخدور نجه مصائب و اندوه محنتی
او ندا ندا چوخ علاوه دی اجلال و عز ّتی
مرضیه و عفیفه و عین نجیبه دی
شمسی حیا و ذات خدایه حبیبه دی
کنز حقیقتون گهر پر بها سیدور
پیغمبرون امیدی حسینون آنا سیدور
مغلوب ایدور جلالی زبان محرّفی
الله اوزی اولوبدی بتولون معرفی
وار مدرکیم قویدی کلام خدایه باخ
گرایسته سن جلالین حدیث کسایه باخ
زهرا نجه خانمدی بلور کردگار اوزی
بو وصفلن جهاندا ولی گولمدی یوزی
گوز یاشینی جگر قانما قاتدی روزگار
گولدیرمه دی آز عمریده آغلاتدی روزگار
پیغمبر خدا ایله که رحلت ایلدی
زهرانون آرتدی دردوغمی شدت ایلدی
باب امیدی دست جفا چکدی باغلادی
دولت سراسین ایتدی عزا خانه آغلادی
فرش سکوتی بزم عزاده سالانمدی
حقندن او تری هریره گتدی آلانمدی
هر قدر ظلم ایدوبله دیمه قانع اولدیلار
دوتسون عزا ایوینده گلوب مانع اولدیلار
قویمادیلار انسیه حوراده اختیار
بزم عزانی دایر ایدوب شهردن کنار
شعله چکوبدی مجمر غم سینه داغلادی
قویمادیلار ایوینده گیدوب چولده آغلادی
هر گون خانم گیدردی ایکی نورعینلن
مسموم اولان حسنلن عزیزی حسینلن
بر نخل سایه سین ایلیردی پناهگاه
جاری ایدوب سرشکنی دلدن چکردی آه
ظلمی یتشدی بیریره قوم منافقین
پیغمبری ایدوبله مزارینده دلغمین
ظلم ایتدوگجه ظلم ایلسونلر تلسدیلر
بر گون گلوب او خرما آغاجندا کسدیلر
جام ستم یتشدی ستملن لبالبه
بسدور سوزون مقدمه سی آغلا مطلبه
کام بتوله گرچه بو دوران دولانمادی
ثانی نقدری ظلم ایلیوبدور اوتانمادی
شدت ویروبدی فاطمه نون سوز آهنه
اود وردی تا که درگه عالم پناهنه
ظلمون اودی ایدوب غلبه باب اقدسه
یاندی قاپی آچلدی گلوب فاطمه سسه
مسمار باتدی سینه سینی ایتدی زخمدار
سندی قابور قاسی یخلوب گتدی اختیار
صدمه یتوب وجودینه سقط اولدی محسنی
گل غنچه سنده آچمادی تز سولدی محسنی
ضعف حالتنده مهر وجودین نفسلدی
ناچار اولو بدی فضه نی امداده سسلدی
زهرا چاقوردی فضه نی امداده یوخ سوزوم
بر نکته وار خیاله دوشور آغلیور گوزوم
تاب ایلمز بو محنته کیم اولسا معنوی
اولدی قزی بلاگونی زهرایه پیروی
اشک تریله ریشة اندوهی بسلدی
کرب بلاده فضه نی زینبده سسلدی
هانسی زماندا یوم بلاگون باتان زمان
مقصودینه او شمر ستمگر چانان زمان
سعد اوغلی ایستیوردی یانان قلب لر یانا
امرایتمشیدی نعش شهیدان ایاقلانا
زینب گلوب گلونی گلستاندا گورمسون
لیلا گزنده اوغلنی میداندا گورمسون
مشکل اولوب بو محنتی امّ المصائبه
احضار ایدو بدی فضّه نی زهرایه نائبه
دردین دیوب کنیزینه ایتدی مشاوره
سرعتله گیت آماندی گمانون گلن یره
آزقالدی غم بو زینبی سالسون ثباتیدن
زهرا قزینا ایسته کومک جنگلاتیدن
تاب ایلمرم بو ظلمه جفا اهلی ال تاپا
اوراق اولان جنازه لرون لر اوسته آت چاپا
غم گلشنی بو چولده آچا آیری منظره
صدمه یته چمنده پراکنده گللره
علیاجنابی فضه گوروبدور فغانیده
بر شیر واردی عرض ایلدی نیستانیده
ای فاطمه عزیزه سی بانوی محترم
ویرسون اجازه من اونی امداده سسلرم
ایتدوم سوزی خلاصه گله مطلبیم اله
آلدی اجازه سرعتلن قاچدی جنگله
نحالیله قاچوردی مجسّم ایله حالین
اللر باشندا قلبی اسردی ایاق یالین
سرعتله تایتشدی نیستانه سسلدی
بو دللریله شیری یانا یا نه سسلدی
مشکل گشا قزینی سالوب شمر مشکله
ا ّمیدینون سفینه سی مغروقیدور گله
بیکس قالوب کومک لیکه اول بی پناهه گل
ترک ایلیوب مقاموی دور قتلگاهه گل
فضه سوزین ایشتجک او حیوان بی نظیر
شیر خدا قزینا حمایت ایدو بدی شیر
گلدی منایه قاچدی صاقا گه قاچوب چپه
گوداله یتدی باشینه تپراق سپه سپه
در ولایتون دیمه قدرینی بیلمدی
باشسیزقالان جنازه نی مقتلده ایگلدی
هر ایلدوکجه نعره چکوب اوپدی یاره سین
گچدوم سوزی ولی سوزیمون آل اشاره سین
واردوریری حسین آناسی فخر بانوان
شیری ایدوب مخاطب ایده بو سوزی بیان
ایله کومک حسینه حسین وای دیه دیه
آهسته اوپ یارالارینی قویما اینجیه
اوراق ایدوبدی پیکرینی تیغ جانستان
شمر اینجیدوبدی سینه سی اوسته چخان زمان
سایسیز یارا دگوبدی بو جسم مقدسه
زحمت ویروبدی قاتلی باشین کسه کسه
(انور) مصیبته بوقدرآچما منظره
یازدوقجاسوز سوزی چکه جک آتشین یره
- شنبه
- 3
- مهر
- 1400
- ساعت
- 20:3
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه