ای پرده ی غیبتده گوز یاشی دونن قانه
جان وئردی آنان زهرا گل شام غریبانه
ایوای آنا وای سویله اشكون یوزیوه باغلا
آغلور حَسَنِین، سنده سس وئر اولارا آغلا
نه حالیله شرح ایلوم كیفیّت زهرانی
هر محنته دنیاده دوزدی او بلا كانی
اُلموب اوزی معناده، اُلدوردی اونی ثانی
واضح دیمورم هرگز زهرایه نه ظلم ایتدی
دنیادن آنان امّا آخِر یارالی گیتدی
بیر دُرّدی مرضیّه گنجینه ی عصمتده
بیر گُلدی اونا هیچ گُل چاتمازدی لطافتده
مشكلدی اولا بیر گُل بو عطر و طراوتده
افسوس او رعنا گُل خاریله یارالاندی
ظلمیله خزان اولدی گُلشندن آرالاندی
عالملر اولا گلشن زهرا كیمی گُل اولماز
گورسِیدی اونی هر كیم، سویلردی بو گُل اولماز
سولدوردولا ظلمیله، گوز اشكیله گور دولماز
ریحانه ی پیغمبر دنیادن ایله دویدی
گتدی ولی اطفالین، چون آهو مَلَر قویدی
بو غمده علی اشكین خونِ دلینه قاتدی
ایستوردی ویره غسلین بیر اوزگه غمه باتدی
بو ضصّه او صبریله شاهَنشَهی آغلاتدی
گویا كه وجودینده نیلی یرینی گوردی
گلبرگ جمالینده سیلی یرینی گوردی
غسلندن اولوب فارغ گوز یاشلی نجف شاهی
رخساره توكوب اشكین عرشه اوجالوب آهی
بو غمده علی دوزدی، دوزمز بیری واللهی
ناگه حَسَنین گلدی بیر محشر اولوب بر پا
سویلَردیله شوریله ایوای آنا یا زهرا
سالدی اوزینی گُللر، اول جسم كفن پوشه
سویلردیله دور بیرده آل گُللرون آغوشه
چوخ آغلادیلار گَلدی مهری آنانون جوشه
آخِرده كفن ایچره زهرا قولینی آچدی
بیر گَل، ایكی تَر غنچه، اول دمده قوجاقلاشدی
سس گلدی علی قویما گَلسون حَسَنین داده
آغلور ملكوت اهلی بو عالم بالاده
آغلاتدیلا دنیانی گور بو ایكی شهزاده
بو منظره مولانین آرامین آلوب الدن
بلبللری گوز یاشلی آخِر آیروب گلدن
القصّه علی صبرین الدن بو مُحن آلدی
زهرانی سولان گُللر اشكیله یولا سالدی
آهویِ حرم گیتدی، اطفالی مَلَر قالدی
سویلردیله دنیاده ایوای آناسیز قالدوخ
اولدوخ عجب افتاده، ایوای آناسیز قولدوخ
دولدوردی نجف شاهی قان یاشیله گوز ابرین
دفن ایلدی اوز روحین، گور بیر او شهین صبرین
وار علّتی زهرانون ایتگین ایلدی قبرین
فكر ایتدی جفا اهلی ظلمونده ایدر طغیان
گنجینه ی آمالی اغیاره اولا پنهان
زهرانی قویوب قبره اَشكی یوزینه آخدی
بلبل گُلی ترك ایتمز، حسرتله دوروب باخدی
بیر آه چكوب كُونی یاندیردی او دم یاخدی
وار حقّی دیسم اَشكی بارانی خجل ایلر
زهرادن علی آیا آیریلسا گورون نیلر
آخِرده گلوب جوشه دریای مُحَن داشدی
بلبل او زمان گلدی حسرتله اوزاقلاشدی
گلدی حَسَنینیلن منزلده بیر آغلاشدی
سویلَری اولون آرام، چوخ ایلمیون افغان
بو گوز یاشوزا آخِر عالملر اولا قربان
ای نازلی حُسینیم سن گلمه بیله فریاده
بو گوز یاشی بو شیون زهرانی سالور یاده
باخدوقجا سنه یانّام، من بو غم عظماده
دیواره یوزون قویما گرد اَلَمه باتما
توكمه یوزه گوز یاشون گَل زینبی آغلاتما
سن شیونه گلدوقجا فریاده گلور زینب
اشكون یوزه آخدوقجا گوز یاشون اَلور زینب
باخ گور نجه آهو تك حسرتله مَلور زینب
آرامیمی سلب ایلور بو زینبون افغانی
فریادی سالور یاده اول دشت غم افزانی
گوز جامی بو ماتمده اشكیله نجه دولماز
عالمده آنا چوخدور، زهرا تك آنا اولماز
گلشن پوزولا آیا گُللر سارالوب سولماز
گلشن پوزولوب گتدی، گُللر سارالوب سولدی
كلثوم و خانم زینب عالمده یتیم اولدی
بیر یاندا حسن اشكین گُل عارضینه باغلار
بیر یاندا حسین اِیله حسرتله باخار آغلار
سوزِ دلی دنیانی، معناده اونون داغلار
بیر یاندا خانم كلثون نِی تك گلور افغانه
بیر یاندا توكَر زینب گوز دُرّینی دامانه
آی دوره سین اولدوزلار آلمشدیلا چون هاله
پوزقون گوروب اولدوزلار اول ماهی ایدوب ناله
اودوزلار آرا بولمم آی قالدی نه احواله
اشكیله یداللهین گوز كاسه ی دولموشدی
اطفالنه بو غمده سر خیل اوزی اولموشدی
ای اعظمی بو غمده گَل ناله و فریاده
بیهوده یِره عُمرون صرف ایلمه دنیاده
یاز نوحه خانم زهرا اجرون ویرر عقباده
نوكر خانما تحفه گوندَرسه قبول ایتمز
محبوبه ی عالمدی محشرده ملول ایتمز
- سه شنبه
- 13
- مهر
- 1400
- ساعت
- 14:58
- نوشته شده توسط
- یوسف اکبری
ارسال دیدگاه