از بس گول آچدی گلشن مقصود یاره دن
دویماز اوغول بو منظر جشمیم نظاره دن
اهل دل اولسا حالیمی آنلار اشاره دن
ال چکمیشم سنین کیمی بیر ماه پاره دن
کام آلمیشام عجب بو تن پاره پاره دن
عرشه عبث اوجاتمامیشام شوروشیونی
بیر داغ دل ویریب منه بو فرقه ی دنی
حاشا گوره بو داغی اوغول لاله خرمنی
(سانسیز بو قدر یاره اگر ئولدوروب سنی)
(لیلا ئولر اوره کده کی بیر داغلی یاره دن)
سنسیز حیاتین ئولسون آنان یوخدی ارزشی
بختینده منله اولمادی بوچولده سازشی
گوردون نجیدی اهل عراقین نوازشی!
(بیرداغدور اورکده کی یاره ن کی سوزشی)
(دونیانی یاندیرا یئری واردور شراره دن)
حسرت اودوندا هرکیم اوغول یاندیریب منی
من تک سولا اونون دا گوروم باغ و گلشنی
سنسیز بو بیکسین پوزولار دارالایمنی
(سن کی جانیمدان آرتیقیدون وئرمیشم سنی)
(گردون نه ایستیری داها بو بختی قاره دن)
باشه قویوب یارادن اوغول تیغ عشق تاج
بازار عشق تاپدی بوچولده عجب رواج
راه وفاده آغلاماقا یوخدی احتیاج
(سن دردیوه شهادتیلن ایلدون علاج)
( آسوده سن جهاندا غم بی شماره دن)
شرح حدیث عشقی وئریم یاره،بولمورم؟
یا کی یازیم سرشکیله رخساره،بولمورم؟
قویدی فلک ندن منی آواره،بولمورم؟
(بیچاره من کی دردیمه بیر چاره بولمورم)
(عالم لر عاجز اولدولا بو درده چاره دن)
وئرسه امان بوچولده اگر قوم کینه جو
مژگانمیله یاره لرون ایلرم رفو
چوخ مایلم سنیله اولام گرم گفتگو
(من سندن آیریلانمیرام اما عجب دی بو)
(روح آیریلیب نئجه بو تن پاره پاره دن)
هر اوخ کی ویردی پیکریوه بوسپاه کین
داغلی اورکده آلدی همان اوخ اوغول یئرین
بو قلبیمین یاراسی ساغالسین منیم چتین
(ئوللم،قویاللا قبره،ولی قورخورام یقین)
(قبریم یانا اورکده کی سونمز شراره دن)
(نادم) آلیب دی خامه معجز نگار آله
تضمین یازیب سروده ی مرحوم سائله
صدشکر یازمییب قلمیم شعر باطله
سوز سخن بو نوعی کی تاثیر ائدر دله
آرام آلار دل اولسا اگر سنگ خاره دن
- سه شنبه
- 6
- مهر
- 1400
- ساعت
- 18:51
- نوشته شده توسط
- یوسف اکبری
- شاعر:
-
حمید محرمی نادم تبریزی
ارسال دیدگاه