گؤزوم قالیب‌دی سخاوت‌لی اَللرون‌ده علی
غلامِ حلقه به گوشم سنون درون‌ده علی
دیلیم‌ده ازبر اولوبدور گؤزل آدین مولا
آدیم یازیلدی محبت‌له دفترون‌ده علی
همیشه ذِکر علی‌دن ایشیقلانیر اوره‌ییم
منه آقا‌دی سنین مالک‌اشترون‌ده علی
منیم وجودیمه مالک سن ای ولیِّ خدا
آقام‌دی بلکه غلام‌آدلی قنبرون‌ده علی
چوخو خیال ائلییر آبِ کوثر ایسته‌ییرم
نظر یوخوم‌دی سنین حوضِ کوثرون‌ده علی
من اؤز جمالووه مشتاقم ای شهنشه دین
دورام محبت‌ایلن بیر برابرون‌ده علی
باخام او صورت وجه‌ُاللّهه بسیم‌دی منیم
گؤرم اؤز عکسیمی بیر لحظه گؤزلرون‌ده علی
بو افتخار کفایتدی هر ایکی دنیا
عزیز ساخلایاسان زیر شهپرون‌ده علی
اؤزون عنایت ائله عشق‌ایله محبت‌ایله
«قیزیل‌قلم»دولانا حولِ محورون‌ده علی
- چهارشنبه
- 7
- مهر
- 1400
- ساعت
- 20:17
- نوشته شده توسط
- یوسف اکبری
- شاعر:
-
اکبر ستاری
ارسال دیدگاه