ز بس امت جفاسندن یتوبدور جانه پیغمبر
ویروب جان اوز رضاسیله بوگون جانانه پیغمبر


وجودی علت غائی اولان افلاکه خلقتده
قویان اوز حسن خلقوندان های امکانی حیرتده
ایله بدخلق لیق گوردی وفاسیز بیر جماعتده
گوتوردی ال حیاتیندن دوزوب هجرانه پیغمبر


سکوت محضیدی امر قضایه حضرت یاسین
اوخوردی باشی اوستونده و صی سی سورۀ یاسین
باخوب هر یانه دورینده گورردی یار و ارخاسین
گینه حسرتله ایلردی نظر هر یانه پیغمبر


او ساعت محضر حقدن یتشدی پیک رحمانی
یتوردی قابض الأرواح ادبله امر سبحانی
دیدی مشتاق وصلوندور حواریین رضوانی
تیکوبلر گوز قدم رنجه قیلا ، رضوانه پیغمبر


مطیع امریوم هر نه بویورسان ایلیوم طاعت
دیسن آل روحیمی، آلّام بویورسان گیت به جان منّت
بیوردی دویموشام جانه رضایم تیز اولام راحت
ولی مشتاق مهلتدور بو نچه آنه پیغمبر


امین روح أولا نازل گورم بو حال رحلتده
ویره بیر مژده امّتدن منه بو نچّه ساعتده
ویرم جان امّت عاصی غمینده استراحتده
بولورسن امّتین دردین آلوب بو جانه پیغمبر


گوروب بو عالمی زهرا گوتوردی اوزلقندان ال
آچوب باشین یولوب زلفین لباسین چاک ایدوب اوّل
او ساعت گوزلرین آچدی بویوردی احمد مرسل
قیزیم صبر ایت رضا اولما دوتوب اود ، یانه ، پیغمبر


بو ساعت جان ویرور جدّون یانندا قوم و قارداشی
آچوب باش باشی اوستونده تمام اوز یار و یولداشی
حسین تک نیزه باشیندا اوجالموب گون کیمی باشی
کول اوسته میهمان اولموب قیزیم عدوانه پیغمبر


حسینی نیله سن گورسن قالوب صد پاره اعضاسی
قوم أوسته گون قباقینده کفنسیز جسم رعناسی
قلجدور نیزه دور اوخدور سراپا قدّ زیباسی
یارالی پیکری اوسته گلوب افغانه پیغمبر


حسینون شعلۀ آهی یاخار اودلار ، نُه طاقی
یارالی اوچ گیجه اوچ گون قوری یرلرده قالماقی
نه ال نه باش نه پیراهن نه الده خوردا بارماقی
روادور اود دوتا دلدن بو حاله یانه پیغمبر


گرکدور قتلگاه ایچره دوتام شام غریبانین
یاخام من خطّیمه سنده پریشان زلفوه قانین
گلنده ساربان اولماز کسه بیر کیمسنه یانین
او ظالم ایلین ظلمه گرک اودلانه پیغمبر


بو قدری ایلمه «وافی» سوال حشردن وحشت
یتر فریادوه روز جزا پیغمبر رحمت
او قدری سعی ایله یازسون که کُتّاب حق أمّت
یقین اؤز امّتین قویماز یانا نیرانه پیغمبر