ای قارداشیمون قولسوز علمداری ابوالفضل
پیشواز ایله بو غصه لی زوّاری ابوالفضل


عشق حاجیلری کعبۀ آمالینه چاتدی
سالک نجه کی رتبۀ اجلالینه چاتدی
قیزلار پر آچوب منزل اقبالینه چاتدی
دور قارداشوین بو چوله زوّاری یتیشدی
اللرده ئولن شاهون عزاداری یتیشدی


یغدیم باشیما جمع دل افکاری گتیردیم
یورقون یارالی خرداجا قیزلاری گتیردیم
هجران ایلیوب عمرلرین یاری گتیردیم
قلبینده بو آواره لرون چوخ سوزی واردی
هر تک تکینون سنده ابوالفضل گوزی واردی


یولّاردا گوزوندن ایراق ای کان کرامت
دشمن آتاسیز قیزلاری چوخ ایتدی اذیّت
نه شمر و سنان شرم ایلیوب چکدی خجالت
نه رحم ایلدی قیزلارا پیغمبره خاطر
وردی آتاسیز قیزلاری بیر معجره خاطر


بیکس بالالارون یوزه گوز یاشی آخیردی
هر قیز که ییوب سیلی سنی داده چاغیردی
سسلوردی عمو شمرون الی داشدان آغیردی
حق نورینی ایستور بودنی سوندوره تز گل
چوللرده حسین قیزلارینی ئولدوره تز گل


تا سن واریدون ای مه زیبا و خجسته
ال کیمسه آچانمازدی گلیلن قیزلارین اوسته
سندن صورا ظلمیله اولوب اللری بسته
سایون که جفائیله کسیلدی باشیمیزدان
دشمن بیزی مأیوس ایلدی قارداشیمیزدان


تا سن واریدون ای ائلیمون محکم حصاری
دلده واردی قیزلاریمون صبر و قراری
چپ کیمسه باخانمازدی اخا قیزلارا ساری
یورقون بالالار ماتم و اندوهه بَلَندی
سندن صورا قارداش باشیما کوللر اَلندی


یاتجاق علمون بیکس حسینون پری سیندی
گنجینه اجلالیمیزون گوهری سیندی
بو خرداجا قیزلارون اخا شهپری سیندی
بیلدی دوشجک تک تکی چولدن چوله قارداش
شاید نچه سی قمچی لر آلتدائوله قارداش


هر قیز که دچار اولدی اخا زجر سنانه
ال باشه قویوب گلدی او دم آه و فغانه
سسلندی ابوالفضل سنی داده یانا یانه
دشمن لجاجتله عناد اوسته دوراردی
کیم آدوی دوتسیدی اونا قمچی ویراردی


کوچ ایتدوق او گونکه بیزی بو لشگر آپاردی
فکر ایلمه بو لشکر کین پرور آپاردی
یوخ یوخ بیزی سر نیزه ده کی دلبر آپاردی
دوشدوک یارالی باشلارا خاطر چوله قارداش
آز قالدی بو قیزلار چوخی یولدائوله قارداش


شاهددی بیزیم حالیمزه گنبد نیلی
آغلاتدی آی ئولدوزلاری سوز دل لیلی
اوچ یاشدا قیزا فکر ایله بیردن دگه سیلی
او طفل حزینون ایله آرامینی آلدی
بش بارماقینون یوزده گویرمیش یری قالدی


سندن صورا امنیتیمیز گور نه یوخ اولدی
دل یاره لری سینمیزه اوچ پر اوخ اولدی
شامون محنی کرب و بلادنده چوخ اولدی
اوّلده بیزی چکدی عدو بزم شرابه
اولدی صورادان منزلیمیز کُنج خرابه


نه سقفی واریدی نه اونون فرش و چراغی
نه یاتماقا بیر بستر و بالشنه اطاقی
مسکن بیزه اولمیشدی او ویرانه بوجاقی
گرچه گیجه سی ظلمیله قارداش سحر اولدی
گوندوزلری امّا گیجه سیندن بتر اولدی


شامون یغشوب قیزلاری دیداره گلردی
مین محنت و غم اوندا بو خونباره گلردی
چوخ نخوتیلن بعضی سی گفتاره گلردی
بعضیلری چوخ بغض و عناد اوسته دوراردی
بعضی سی بیزه دل یاراسی گونده وراردی


گورجک اولاری دیده خونبار رقیّه
فوراً پوزولاردی دل و افکار رقیّه
اوندا من اولاردیم گنه غمخوار رقیّه
آهسته باخوب تای توشونا اشگین اَلَردی
بوینون قویوب ئوز چیگنینه حسرتله ملردی


بعضی سینون امّا اورگی حالینه یاندی
آهسته گلوب منزل ویراندا دایاندی
یولداشلارونون ایتدیگی اعماله اوتاندی
گلدی دله عرض ایلدی ای ماه مدینه
سن اکبره خاطر بیزی عفو ایله رقیّه


سن طوطی پر بسته شاه شهدا سن
هر بیکس و مظلومیه غمخوار و رجا سن
دردی اولانون دردینه عالمده دوا سن
«فرهاده» خانم بیر نظر ایله الی بوشدی
دنیاده بیلورسن که سنون عشقوه خوشدی