ای سحر اولدوزی چوخ تیز نیه باتدون آناجان
گوزدن اشکون کیمی بو زینبی آتدون آناجان
نجه بو دهریده سنسیز آنا کامه چاتارام
تا وارام اودلی بو بیر محنتی باشدان آتارام
بستر نازه قویوب باش نجه راحت یاتارام
سن که قویدون یوزیوی توپراقا یاتدون آناجان
بوش یرون گون کیمی بو ایوده ز بس جلوه لنور
اودی باران کیمی گوزن یوزه اشکیم النور
دامنیم خون دله سیل سرشکه بلنور
قلبیمون قانینی گوزیاشیمه قاتدون آناجان
وار یری آغلاسا بو حاله ثریا و سمک
آیریلیق آتشینه ووردون آنا یاخشی اتک
سن گیدوب شوریله قویدون من بیچاره نی تک
آناوای نالمی افلاکه اوجاتدون آناجان
شاد اولوب بیرده بو عالمده نه نوعیله گولوم
غصّه مرگ ایلدی غملر سنی قربانون اولوم
هر نماز اوسته دعا ایلیوب ایستردون اُلوم
مستجاب اولدی دعا مقصده چاتدون آناجان
غصه لردن آنا دنیا سنه بیر زندانیدی
یوزده گوزیاشیوین هر قطره سی بیر مرجانیدی
اودلی قلبون دولی بیر جامیدی لخته قانیدی
تا اجل درک ایدوب اول جامی بوشاتدون آناجان
جان قویار حال حیاتنده جهاندا آنالار
یتورر شاخه ی امّیدیده غنچه بالالار
آنا اُلسه بالالار صرصر غمله سارالار
دورت گلی غنچه زمانینده ساراتدون آناجان
یتمیش اوچ گوندی هله سرور بطحا اُلومی
تازه لندی سنیله حضرت طاها اُلومی
نجه پوزماز قیزوی زهره ی زهرا اُلومی
مصطفی یاسینه اوز یاسیوی قاتدون آناجان
مرتضانون آنا قان ایلمیسن اشک ترین
بیرده سندن سورا بشّاش اولا دنیاده چتین
آز دگولدی اونا بو غم که اولوب خانه نشین
سن جوان اُلدون او مظلومی قوجاتدون آناجان
(نجمی) بو غمده چوخ آغلار آنا چوخ داده گَلَر
بزم ماتمده سنق نی کیمی فریاده گلر
سن کیمی غمزده بیرده دیمه ایجاده گلر
چوخ بیوک غملره آز عمرده باتدون آناجان
- سه شنبه
- ۱۳
- مهر
- ۱۴۰۰
- ساعت
- ۱۵:۶
- نوشته شده توسط
- یوسف اکبری
- شاعر:
-
مرحوم نجمی تبریزی
ارسال دیدگاه