آچ گوزون ای غمکش دوران آنا یافاطمه
زینبین جانی سنه قربان آنا یافاطمه
قویدون اول گون که قدم بو عالم ایجاده سن
روز و شب اولدون آنا هر محنته آماده سن
گورمدون بیر لحظه خوش گون بو فنا دنیاده سن
قالدی آغلار گوزلرون هر آن آنا یافاطمه
وقت رحلتده سنی تاپشوردی جدّیم مصطفی
امّته قویدی امانت مصدر قُل اِنَّما
قویمادی اوچ گون سنه دنیاده حرمت اشقیا
ظلمیله گوزیاشون اولدی قان آنا یافاطمه
حق طریقیندن چخوب بدعت اساسین قوردولار
جور و ظلمیله جهانی سربسر دولدوردولار
یاندیروب عالملری درگاهیوی یاندوردولار
بیعتی الده ایدوب عنوان آنا یافاطمه
محسنون اُلدی، در و دیوار آرا قالدون اوزون
اوج ایدوب افلاکه آهون، دولدی اشکیله گوزون
باغری قان اولدون او گون دست ستمله سن اوزون
اولدی بو عالم سنه زندان آنا یافاطمه
اولدی دنیاده سنون اون سگّیز ایل عمرون آنا
چکدون آز عمریله بیحد محنت و درد و بلا
هر بلایه دل ویروب هر بیر غمه اولدون رضا
قلبون ایتدی نار غم سوزان آنا یافاطمه
بار محنتدن بوکولدی سروه بنزر قامتون
ساچلارون غمدن آغاردی، سولدی گل تک صورتون
گون به گون ساعت به ساعت اولدی افزون محنتون
یتمسون کامه گوروم عدوان آنا یافاطمه
بسکه چکدون درد و محنت دوشدی طاقتدن وجود
دمبدم فریاد و آهون ایلدی عرشه صعود
روزگار ایتدی سنی آخِرده مزدور یهود
کارون اولدی ناله و افغان آنا یافاطمه
سن بو گون ترک ایلسن دنیانی ای کان حیا
اولمارام سندنصورا دنیاده من راحت آنا
باشیمون وار چوخ بلاسی ثبت ایدوب کلک قضا
سینه سوزان دیده سی گریان آنا یافاطمه
بولمورم آیا سنون بو حالیوه قان آغلیوم
یا حسینه ایلیوم فریاد و افغان آغلیوم
وار یری عمریمجه من هر لحظه هر آن آغلیوم
سالسون اشکیم عالمه طوفان آنا یافاطمه
بیر حسینی که آنا بیر عمر چکدون زحمتین
ایلدون شام و سحر جان و دلیله خدمتین
کربلا دشتینده گل گور بیر حیاسین امّتین
سو یانیندا جان ویرور عطشان آنا یافاطمه
اوچ گجه گوندوز قالور گونلر ایوینده پیکری
نیزه ده گون تک اولور مشهور راس انوری
حشره تک آغلار قویار بو زینب غم پروری
حالیمه سنده او گون باخ یان آنا یافاطمه
واردی (صحّافین) نچه ایل لردی دلده حسرتی
بیر رفیق مهربانیله زیارت نیّتی
بو گلن وقفه حسینین قبری اولسا قسمتی
قالماز آمالینده بیر نقصان آنا یافاطمه
- پنج شنبه
- 15
- مهر
- 1400
- ساعت
- 13:56
- نوشته شده توسط
- یوسف اکبری
- شاعر:
-
مرحوم صحاف تبریزی
ارسال دیدگاه