ندن وصالی ساتیب قصد ترک جان ائلدون
گئدوب ربابی فراقینده باغری قان ائلدون
کوسوب گئدوبسن ای آغوشیمین صفاسی اوغول
عجیبه نوک جدایه چخوب مکان ائلدون
گئدوب سو فکریله اما سوسوز شهید اولدون
بوغازون حرمله نون تیرینه نشان ائلدون
خدنگ ظلم دگوب حلقیوه اخوبدی قانین
یاشیل لباسیوی اگنینده ارغوان ائلدون
شهیدلر آرا سن باشیمی اوجالدیبسان
اگر چه نار غمه قدیمی کمان ائلدون
سنی بو حالیده اصغر نه نوعی گورسون آنان
بو بی کسین ایشینی ناله و فغان ائلدون
جهاندا سنسیز آنان گولسه سن حلال ایلمه
گوزومده گوز یاشیمی سیل بی امان ائلدون
سنیله درک ایلمیشدیم بهار عمر ندور
بهار عمرومی ای نازنین خزان ائلدون
دالینجا نیزده عشقون سببدی گلماقیما
منیم جنونیمی سن عالمه عیان ائلدون
چکوبدی عشقون ایدوبدی منی جلای وطن
دیار کوفه و شامه منی روان ائلدون
غمیم قالارگی اولوب تا جهاندا عمروم وار
تمام غصه لری دلده جاودان ائلدون
بو طرزیله سن اوزون طائرا سوزی باغلا
ربابی درده سالیب گور نه نوحه خوان ائلدون
تقریر ۱۹ آذر سال ۹۹
- پنج شنبه
- 5
- اسفند
- 1400
- ساعت
- 5:22
- نوشته شده توسط
- طائر
- شاعر:
-
طائر اورنگی
ارسال دیدگاه