عاشورا حالات راز و نیاز سیدالشهدا ع
بلا دشتینده عاشورا گونی بیر انقلابیدی
قیامت عرصه سیندن گوییا که فتح بابیدی
یره گون نازل اولموشدی صعود ایلوردی اوت یردن
سبب بولمم نه عنواندی خشن چون افتابیدی
گلوردی العطش صوتی کنار و گوشه دن گوشه
حرارت هجمه سی بیریان مضافا قحط آبیدی
غرض جنگ عالمیدی گورسنوردی نیزه و شمشیر
زمین و آسمان غرق ملال و اضطرابیدی
قوشون ظلمیله بیر سمته قوغوردی خیردا قیزلاری
یانیردی خیمه لر بیر سمتیده چوخ التهابیدی
بو اثناده گوزوم دوشدی نه لر گوردوم چوخور یرده
نمایان بیر قوجا سید اسیر پیچ و تابیدی
یارالار خسته سی دوشموش یارالی قتلگاه ایچره
ساییلمازدی وجودینده یاراسی بی حسابیدی
زره اعلا کمر زرین وقاری وقر شاهانه
اگرچه زخمداریدی ولی عالی جنابیدی
سوروشدوم بیر نفردن تا بولم بو بینوا کیمدی
منه فاش ایلدی بولدوم عزیز بو ترابیدی
امام واجب الطاعه ایله گوداله دوشموشدی
بو وضع حالیدن حال عوالم لر خرابیدی
ولیکن حال ضعفیله دوروب راز و نیاز اوسته
بونون راز و نیازیندن دل خالق کبابیدی
لبینده هر گه و ناگه واریدی ذکر پنهانی
خیال ائتدیم کی قان ایچره سوزی حتما عتابیدی
یاخینلاشدیم گورم دیلده ندور ذکر ایلوری هردم
کی شاید دشمنه حقدن طلب امر عذابیدی
ولی یاللعجب گوردم دیلنده وار دعا لفظی
نوای بخشش امت خداونده خطابیدی
قصورین امتین یارب گذشت ایله منه خاطیر
دعاسی درگه حقه بلانون اجتنابیدی
اوجور کی سوز قلبیله حسین خلقی دعا ائتدی
یقین بولدوم بو مظلومین دعاسی مستجابیدی
خدایه شکر اولا طائر بئله اربابه نوکرسن
سنون تک دهریده کیمدور بو نوعی کامیابیدی
تقریر ۵ رمضان سال ۱۴۰۰
#طائراورنگی
- جمعه
- 19
- فروردین
- 1401
- ساعت
- 12:25
- نوشته شده توسط
- طائر
- شاعر:
-
طائر اورنگی
ارسال دیدگاه