برار پِرس تِه مسافر بموعه
ته رقیه جانِ خبر بموعه
برار پرس ته خواخر دل کبابه
مره دلجویی هاکردن ثوابه
برار پرس خواخر نفس ندارنه
زینب غریبِ اینجه کَس ندارنه
خبر دارنی مره چیکار بکته؟
مره چیکار سرِ بازار بکته؟
خبر دارنی تماشایی بَهیمه؟
اسـیر غـم تنـهایی بَهـیمه؟
تِه چش روشن برار مره بزونه
من از یهودشه تن دارمه نشونه
برارجان مه سر ومه تن کبوده
هـمه نشـونیِ ظلـم یــهوده
ام کلـثوم و رباب و سکینه
بَوین چیجوری زَنِـنِه شه سینه
نَپِرسنی چه اَنّـه پیر بَهیمه؟
مه سر چی بمو زمین گیربَهیمه؟
خبر دارنی مه سر بلا وارسّـه؟
تِه کیـجاره مه جا کنیز بخواسه
برار دونّـی کجه من بَیمه بیتاب؟
مـره بَوردنه مجلس شراب
چهل روزه که دربدر بَهیمه
با حَرمله من همسفر بَهـیمه
حرمله اَمـه دلّـه خون دکرده
نانجیب هی رباب پیش او خرده
برار مره گمون اینجوری نَیّـه
هــمه ره بیــارم الا رقــیه
خبر دارنی رقیه چو بخرده؟
اَنّـه بـابـا بـابـا بَـوته بَمرده
برارجان بی ته زندگی نخوامه
گمون کمّه مه عُمر دیگه تمامه
دعا کمّه کـه تـه آمین بَهوویی
الهی آمین ره سنگین بَهوویی
امید دارمه ته حاجت ره بَهیرم
الهی که ته قبر سر بمیرم
مه سرگذشته «مداح» بنوشته
الهی که وِنه منزل بهـشته
- دوشنبه
- 7
- شهریور
- 1401
- ساعت
- 10:5
- نوشته شده توسط
- محدثه محمدی
- شاعر:
-
علی اکبر اسفندیار (مداح)
ارسال دیدگاه