سوزمون اولی حمد حق منان اولسون
صورا دفترده اورک سوزلری عنوان اولسون
اوکه دنیانی ایدوب خلق بو انسانه گوره
کل مخلوق گرک شاکر سبحان اولسون
جن و انسی یارادوب تا که عبادت ایلسون
بشر البته گرک طابع فرمان اولسون
منحرف اولسا یولوندان دوشجک دردسره
اجر و مزدی بودی تا داخل نیران اولسون
توبه قاپلاری آچیخدی بشر ایله عجله
عمروین قیمتی قویما بله ارزان اولسون
قیل نمازون یادا سال قبر و قیامت گونونی
تنگ و تاریک یرون بلکه چراغان اولسون
اوزون ئوز فکروی ایله دمه وقت چوخدی هله
شاید عمرون ایله بو لحظه ده پایان اولسون
فرصتین وار هله یالوار گوزون یاشینی توک
روز محشر سنه شافع شه مردان اولسون
اوزوی سال در مولایه اگر دردین وار
قوی او خیبر کن علی دردیوه درمان اولسون
شیعه سین قویماز علی اودتا یانا شرطی بودور
کیم علی شیعه سیدی پیرو قرآن اولسون
حق دیدی یرمی بش ایل اولدی علی خانه نشین
شیعه لر حقی گیدن رهبره قربان اولسون
گجه لر هامی یاتانان صورا یول باشلاردی
کوچه به کوچه گزوب یار یتیمان اولسون
وردیلار درگهینه اوت آلشوب قلب علی
صبر ایدوب تا که رضا حضرت سبحان اولسون
اولمادی بیر کس علی حالینی تا درک ایلسون
پشت درده یری وار فاطمه نالان اولسون
ایله تک قالادی علی اولمادی بیر دادرسی
حقی وار شیعه لرین گوزلری گریان اولسون
وقت او وقت اولدی گیجه یاری او مولای زمن
هجر اوتوندا اورگی شعلهء سوزان اولسون
غسل ویردی اوزی مولا بورودی آق کفنه
دیدی زهرایه غم اوغلون سنه قربان اولسون
نه یامان گونده منی قویدون آدامسیز زهرا
ایسته اللهدان علیده سنه مهمان اولسون
گدوسن یوخدی سوزوم هر گلن آخر گیدجک
گیجه یاری نیه بس، علتی اعلان اولسون
نه اولوبدی سنه من بیلممیشم زهرا جان
سعی ایدوبسن که ملالون منه پنهان اولسون
ایندی بیلدوم نیه ایستیردون ئولوم اللهدان
قاپیمی یاندیرانین خانه سی ویران اولسون
منه خاطر سنه چوخ صدمه دیوب فاطمه جان
بیرده سندن صورا کیم دردیمه درمان اولسون
باشین اوستونده حسین آز قالوب اولدورسون اوزون
قویما آغلار بو قدر شاه شهیدان اولسون
رحم ایله زینب و کلثومی نجه رام ایلیوم
ملر آهولاریوی قویما اورک قان اولسون
الغرض قویدی او یورقون بدنی تابوته
دیدی سن یات فدکین گللری الوان اولسون
نیلورم فاطمه سندن صورا من دنیانی
دودمانیم یری وار بی سرو سامان اولسون
گیجه گیچدی یاریدان (ماه پری)اولدی سحر
قیل نمازون قوی اورک ملکی فروزان اولسون
- شنبه
- 17
- تیر
- 1402
- ساعت
- 17:26
- نوشته شده توسط
- یوسف اکبری
- شاعر:
-
رضا ماه پری زنجانی
ارسال دیدگاه