باجی بوردا جلوه ایلر حسن یار
واربو یرده وعده وصل نگار
بو زمین کربلادور جای عشق
وار بو یرده هر نه وار غوغای عشق
هر کسون باشین دا وار سودای عشق
باش ویروب سوداسین ایلر آشکار
وقت اولوب ظاهر اولا عهد الست
ایستدیم ویرسون فنا بو جانه هست
ساخلاماز جان هر کس اولسا حق پرست
من کیمی جان ویرماق ایلر اختیار
بیزلره همدم اولوب جانانه لر
آیریلور عشاقیدن بیگانه لر
شمع سیز حیران گزر پروانه لر
یاری یاریندن فلک ایلر کنار
چون وورار باجی بلا دریاسی موج
دشمن آرتار دسته دسته فوج فوج
صیر ایله فریادیوه چوخ ویرمه اوج
چون اولار بیتابلوق عشّاقه عار
بوردا لیلا باده محنت ایچر
جانیدن مرجان تک اوغلوندان گیچر
اوز الیله اکبره خلعت بیچر
گوندرر جانانه اولسون جان نثار
هر بلا گلسه واریمدی حوصله
اصغرین قنداقینی آلّام اَله
اوخلیوب مقصوده یتسون حرمله
قوی اودا بو یرده ایتسون بیر شکار
آتش ظلمه وورار دشمن اَتَک
اُلدورللر قاسمی میداندا تک
قان بزر جسمین حنا خونچاسی تک
چون حنا تاپماز الینه قان یاخار
بوردا عباسین یوزی گل تک سولار
باشی اوسته باجیسی زلفین یولار
سویرینه مشکینه القان دولار
او سکینمدن اولار چوخ شرمسار
باش آچار سینمده یاره گل کیمی
اوخ اوخا پیوند اولی سنبل کیمی
سنده باجی شئره گَل بلبل کیمی
صد هزاران ناله ایله چون هزار
اهل کینه ظلمدن دویماز باجی
بیر جفا یرده قالا قویماز باجی
رختیمی دشمن دیمه سویماز باجی
هم سویار هم نعشیم اوسته آت چاپار
وورماسون بوردا قدم اهل مجاز
من گرک بوردا قورام بیر بزم راز
باشیم ایتسون نیزه باشین سرفراز
شامه دین بیرباش آپارسون نیزه دار
واردی عشقیله منیم باشیمده شور
باش وورور بو دشتدن آیات نور
گاه نیزه گه کلیسا گه تنور
هر بلا باشدان منیم باشیمده وار
گاه مطبخده کول اوستونده یاتار
ماسواللّهی بوتون گوزدن آتار
گه بو لعل لب قیزیل قانه باتار
خیزران اوپدوقجا ایلر زخمدار
چکدی #هندی دلدن آه آتشین
هر نه یازدی دلدن اولدی دلنشین
ایلیوبدور آغلاماخ از بس ایشین
آب چشم اشعارین ایتمیش آبدار
- سه شنبه
- 27
- تیر
- 1402
- ساعت
- 16:40
- نوشته شده توسط
- یوسف اکبری
- شاعر:
-
مرحوم هندی تبریزی
ارسال دیدگاه