محرمین ایکیسی، پنجشنبه نون سحری
دوشوب بلا چولونه والی الولا گذری
اولاندا دشت بلا میر عالمه مقدم
گلوردی حرده شاه غریبیله توام
قاباقدا بیر عرب اولدی پدید، ناقه سوار
گلور شتابیله، چگنینده بیر کمانیده وار
گلوب برابره تا یتدی حره ویردی سلام
امامه ایلمدی اعتنا او شر لئام
انوب یره دوه دن ویردی حره بیر نامه
آلوب مطالعه ایتدی یتوردی اتمامه
دئدی بو حکم گلوب یا حسین امیریمدن
که ال گوتورمیم ئولسمده ده دستگیریمدن
منه بو امری ویروبدور امیر با شوکت
حسینی قویما داخی بیر قدم ایده حرکت
سنیله رسم مدارا داخی دگل منظور
گرک بو یرده نزول ایتدیریم سنی، مجبور
امام گوردی تعدیسین آرتریر دشمن
مصمم اولدی همان یرده ایلسون مسکن
علاوه عالمیدی عین قصد ایدن یردور
بولوردی جدی آتاسی خبر ویرن یردور
او دمده یوز دوتوب عباسه شاه مظلومان
بویوردی ویر آتام اوغلی سپاهیمه فرمان
بو دشتدن دئ داخی گیچمسون بیری، دورسون
نزول ایدوب هامی بو یرده خیمه سین قورسون
بو یردی مقصدیم ای صاحب وفا قارداش
منی همین بو یره سوق ایدوب قضا قارداش
گرک بو یرده ویرم دل قضای عشقیمه من
بو یر قضاسی منی ایلیوب جلای وطن
سوءله بو یرده دوشه هم عنانلاریم قارداش
قطاری ساخلیالار ساربانلاریم قارداش
بو یر بو ناقه لرین سر به سر یاتان یریدور
هامی جوانلاریمون قاننه باتان یریدور
بو یرده غارت اولور ظلمیله خیام حرم
شهید ایدر بیزی بد سرزمینده اهل ستم
بو یرده آند اولا آللهه ذبح اولور اطفال
بیزی زیارت ایدر بوردا صاحب آمال
همین بو تپراقی جدیم خبر ویروبدی منه
که یعنی بو یری مدفن ویروبله بو بدنه
حجاز قافله سی ایلدی عراقه نزول
کجاوه لردن انوب اهل بیت زار و ملول
ووریلدی امر شه دینیله سراپرده
ولی قورولدی خیام حرم چوخور یرده
باخوب بو نکتیه زینب گلوب دلی درده
گلوب حضور امامه دوروب برابرده
ایشتمیشم دئدی قارداش که هر سفرده آتام
همیشه چوخ اوجا یرلرده قوردوروردی خیام
اونون مراسمنون سنده عکسینی گورورم
دوزنمیرم اوزومه هر چه تسلیت ویریرم
نه سری وار منی آگاه قیل بو مطلبدن
نیه خیامی چوخور یرده قوردورورسان سن؟
کمال یاسیله گلدی او شاه گقتاره
بویوردی ای باجی سن محرمیم سن اسراره
آتام علی که علو خیامه طالبیدی
همیشه دشمنه دعوالرینده غالبیدی
ولی بو عرصه ده مغلوب ایدر منی دشمن
گرک خیامی چوخور یرده قوردورام باجی من
او دم جوانلارینی یقدی باشه میر انام
مخدرات طهارتده دوره ووردی تمام
باخوب حسین اولارا یاس بی نهایتیله
اولاردا شاه غریبه باخاردی حسرتیله
حسین جوانلاری اهل حرم، صغار و کبار
توکردیلر هامی رخساره اشگ حسرت بار
شرار محنتیله صاف سینه داغلادیلار
صدا صدایه ویروب بیر دویونجا آغلادیلار
دوروب گیدوب هره اوز خیمه سینده دوتدی قرار
ولی توکردیله گوز یاشلارین چو ابر بهار
غمیله بسکه دل شاه نینوایه دولدی
شکسته حالیله دریای فکره غرق اولدی
مدینه یادینه دوشدی اله آلوب خامه
یازوب محمده نسگل مقاله بیر نامه
بیان حالینی بش کلمه ده آندیردی
نکات رمزیله پیش آمدینده قاندیردی
فقط بو مختصری یازدی یا اخا گویا
که بو جهان یوخوموش، لایزالیدور عقبا
اسیر قوش کیمی یعنی قفسدیم قارداش
یاخونلاشوب اجلیم صون نفسدیم قارداش
منه اگر چه برادر محبتون چوخودی
غم ایتمه، بیله گمان ائت، حسینون هیچ یوخودی...
- سه شنبه
- 27
- تیر
- 1402
- ساعت
- 16:44
- نوشته شده توسط
- یوسف اکبری
- شاعر:
-
استاد مرحوم ذهنی
ارسال دیدگاه