حسین مُصیبتی دَریادی یوخدی پایانی
او دور که اِیمدیدَه جوش اِیلَر اِیل بَه اِیل قانی
بُلَنمُورَم بو نه غَمدور عُقول حیران دور
فَلک مَلک بو مَصیبتدَه اَشگ ریزان دور
قَتیل العَبرَه دی مَقتول اُولوب سُو اُوسته سُوسُوز
او دور سَبب بو شَهه عَرش و فَرش گِریان دور
دویُونجا عِترتینی قویمیوبلار آغلاماقا
بُو غُصّه مایهء فَریاد و داد و اَفغان دور
کَسُوبلَه باشینی عُریان قُویوبلا گُل بدَنین
یارالی جِسمی قُوری یِردَه قانه غلطان دور
گَلوب جَنازَه سی اُوسته مُخدّراتِ حَرم
گُوروبلَه مِصرَعی دریا کیمی دُولی قان دور
توکُولدولَر دَوَه لَردَن تَمام عُورت اُوشاق
بُولوبلَه وَصل یِتُور باشه وَقتِ هِجران دور
قُوروبَلا حَلقهء ماتَم او نَعشِ پاک اُوسته
حَرملَرین گُوزی گُویا بیر اَبرِ نِیسان دور
او بیر گُله واریدی قرخ شِکستَه پَر بُلبل
وَ لِیک بیر دِلیلَه هر بیری نَوا خوان دور
دوتوب او قانی خانیملار یاخاردی ساچلارینا
دِیردیلَر بو مِنای وَفادَه قُربان دور
اُولوب او دَم مُتوجّه علی قیزی زِینَب
عَلیل اِمامی گُوروب حالی چوخ پَریشان دور
جَهازسیز دَوَه اُوستوندَه قولّاری باغلی
باخُور او مَجمَعه آغلار گُوزیلَه نالان دور
اَیاقی باغلیدی مُمکن دَگُل پیادَه اُولا
طَناب و قِیدیلَه مَغلولِ قُومِ عُدوان دور
دوشوب گُوزی دَوَرانَه یاخوندی جان وِیرسُون
غَریقِ بَحرِ مُصیبت او شاهِ دوران دور
او قَدَر قالمُوری جِسمیندَن آیریلا رُوحی
قُوای جان مُتزَلزلدی چوخ هَراسان دور
دِئدی ئولنلریمُون یادگاری صَبر اِیلَه
سَنون قُوری نَفسُون حَرزِ آلِ عُمران دور
ئولنلَر ئولدی قالانلار سَنه تیکُوب گُوزینی
بُو حال سَندَه نَه حالتدی کی نَمایان دور؟
جَواب وِیردی نِجَه عَمّه صَبر اِیدوم دایانُوم
مگر تَحمّل و طاقت بُو ظُلمَه آسان دور؟
شَهیدلَر بدَنی بی کَفن قالوب یِردَه
بو پارَه پارَه بدَنلَر یِریلَه یِکسان دور
نه بیر کَفن گَتورَن وار نَه بیر جَه دَفن اِیلین
تاپُولمُوری دِیَن آخر بُولار مُسلمان دور
کانّهُ که مُسلمان دَگُولّه بُو شُهدا
قُوری یِر اُوسته بُو باشسیز بدَنلَر عُریان دور
بابام جَنازَه سینه اُول قَدَر یارا وُورولوب
بِسانِ شانهء گیسُو وِجودی شان شان دور
نَه باشی وار نَه اَلی نَه لباسی جِسمیندَه
بنای عُنصُرِ تُوحید گُور نه ویران دور
یارالاریندان آخان قانی غُسلی دور بابامُون
حَنوط توپراقی دور حُقّ یُولوندا قربان دور
کَلامِ ناطقین اُوراق اِیدوبلَه اَعضاسین
وَرق وَرق داغلوب صَفحه صَفحه قرآن دور
آناسی فاطمه نین قَلبینی اِیدوبلَه کَباب
بُو جُور و ظُلملَره شاد آلِ سُفیان دور
فَدا او پِیکره نَسج الرّیاحی دور کَفنی
جَنازه سی خَس و خاشاک اِیچیندَه پِنهان دور
کَسُوبلَه باشینی قانیلَه اِیسلانوب توپراق
تَمام دَردَه بو قانلی تُراب دَرمان دور
#حسینی فَخر اِیلمه سَعدیّ زَمانَم من
حسین آدیلَه سَنون عزّتُون فَراوان دور
آدون #حسینی یازیلسا بو فَخر بَسدی سنَه
بُو آستانه دَه چون جَبرئیل دَربان دور
- شنبه
- 14
- مرداد
- 1402
- ساعت
- 22:20
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه