وِئروبسَن نیزه دَه حُریتَه اِعلانیه قارداش
چُوخور یِردَه دوشوبسَن سَجدهء شُکرانیه قارداش
سَن ازَل گُونکه مِصباحِ الهُدای سِلک عشق اوُلدون
اَمین بیر عاشقیدون مَرزبانِ مُلکِ عشق اوُلدون
دلِ طوفاندا الحَق ناخدای فُلک عشق اوُلدون
وورانماز کیمسَه لَب سَن نُوش اِئدن پِیمانیَه قارداش
فَنا اوُلدون فَنا اِئتدون بُو چُولدَه اِهلِ بیدادی
گرکدی سَندَن اِنسانلار آلا سَر مَشقِ آزادی
یخلماز سَن قُویان بیر مَکتبُون عالمدَه بُنیادی
دوشَر شُوقیله غَربهِ جلوه سی هر ثانیه قارداش
ثَبوت اِئتدون حُسینیت مَرامی روحِ اِیمان دور
باش اَگمکدَن ستمگر مَردمَه باش وِئرمک آسان دور
بو نِهضَت بو آخان قان آبروی اَهلِ قرآندور
چراغِ مَعرفتدور عاقل و فَرزانیَه قارداش
سَنون عشقون مَنیم دینیمدی هُوشیارَم طریقمدَه
نقدر واری نَفس منده وارام رَسم و سلیقمدَه
مُریدِ عشقوم هر ساعتیمدَه هر دَقیقمدَه
حقیقتدور بو عشقیم اوُخشاماز اَفسانیَه قارداش
رَگ و ریشه سالوب عشقون عُروق و اُستخوانیمدَه
گُوزل فَرمان روا دور مُلکِ جسم و مَغز و جانیمدَه
او دور گرمیت آرتوقدی منیم هر قَطره قانیمدَه
او دور که صاحب اوُلدوم مَنطق پیرانیَه قارداش
اَسیرِ عشق اوُلان اوُلماز جَهاندا هِیچک سَه بندَه
بلادَن شکویه گلمِک دَگل عُشّاقه زیبندَه
بیلور سَن سن کیمی جام اَلستُون مَستیم مندَه
باجی قارداشه اوُخشار اوُخشاماز بیگانیَه قارداش
سَن اوُلدون کاروانِ راهِ عشق اللّهه مَشعلدار
من اوُلدوم دَربدر شُوریدَه سر اَطفالوه سَردار
سَن آزاد اوُلدون اَیّامُون غَمیندن ای شَهِ اَبرار
ولی من اوُخشارام بیر چارہ سیز زندانیَه قارداش
سَنون یارون ساغالماز گر طَبابَت اِیلسَه لُقمان
مَنیم اَحوالیمَه اَفسوس اِئدر هر سنگدِل اِنسان
سَنون گُل جِسمُوی شَمشیر اِئدوبدی شانه تَک شانشان
مَنیم گیسولَریم حَسرت قالوبدی شانیَه قارداش
مُسلمان دَفن اِئدر بو رَسمدور ئولسه مُسلمانی
اَل اوُسته حَمل اوُلار قَبره ئولَن گر اوُلسا رُوحانی
نه وار دور بیر مُسلمان دَفن اِئدَه بُو جِسمِ عُریانی
نه باخمُور کُوفه اَهلی رَهبرِ رُوحانیَه قارداش
سِهولتلَه اَلَه گلمَز جَهاندا گُوهرِ نا یاب
عَزا بابی اوُلور مَفتوح ئولَن وَقته اوُلو الألباب
بو دنیادَن که رِحلت اِیلدی هر صاحبِ مِحراب
عبادَت گاهی آغلار عالمِ رَبّانیَه قارداش
او عالم سَن سَنه اِیوانِ عَرشِ کِبریا مَنبَر
او عالم سَن سَنه عَلامه لَر شاگردی دور یکسر
آپاردی ظُلمیلَه سَجّاده وی کُوینَک سُویان لَشکر
بو ظُلمی اِیلمَز نصرانیلَر نصرانیَه قارداش
قَسم اوُلسون سَنه هِجروندَه دِلدَن چَکدیگیم آهه
قُولوم باغلانسادا یالوارمارام بُو قُومِ خود خواهه
اَیاقیم کُوفیه یِتسَه اُمیدیم واردی اللّهه
او شَهری تَنگ اِئدم من زادهء مَرجانیَه قارداش
دوگُولمَک مَشقنی زِینب آلوب صِدّیقه زَهرادَن
اوُنی قُنفذ مَنی شِمرِ ستمگر سالدی یارادَن
او گِیتدی قُول سنق پَهلو شِکسته دارِ دُنیادَن
فَلک اِیستُور مَنی چَکسُون هَلَه ویرانیَه قارداش
شَرارِ شَمعِ سُوزانه یانا، پَروانه لَر خوشدی
گَلون هِجریندَه یانسا بلبلِ مَستانه لَر خوشدی
ریاضَت کِشلَره مَسکن اوُلا ویرانَه لَر خوشدی
که وِئرمز پاره خِشتین مَحفلِ شاهانیَه قارداش
اَنیسیم اللّی اِیل دور دَرد و رَنجِ روزگاریلَه
کشاکِش اِئتمیشم دائم سِپهرِ کَجمَداریلَه
گِچوب عُمریم آغارتدیم زُلفیمی من آه و زاریلَه
کُول اوُلدوم اوُخشادوم سَنسَیز یانان پَروانیَه قارداش
خیالیمدَه قالور درگاهیمیز جَبراً اَلولاندى
آنام زَهرانی ووردی ثانی اَمّا ووردیقین داندی
نه شَرم اِئتدی ووراندا قاتلون نه حالیمَه یاندی
مُعلم دور جَفادَه شِمرِ ظالم ثانیَه قارداش
کِچَن شَب دؤزمُوشَم قَلبِ خَلایق دؤز مین دَردَه
ئوزون بُلدون نه حالیلَه صَباح اِئتدوم قُوری یِرده
کبوتَر تَک پَریشان قزلارون باش زیرِ شَهپردَه
سخلدی صبح اولونجا بیر پَریشان لانیَه قارداش
باجیلار غَم پَیامین قَتلگهدَه قارداشا وِئردی
دیزی اوُستندَه یِر مَخیمدَه یُولداش یُولداشا وِئردی
بالالار بیر سُوری آهو مِثالی باش باشا وئردی
سزیلداشدی باخاندا مَحو اوُلان کاشانیَه قارداش
غُبار آلود اوُلار یِل تُند اَسندَه چهرهء آفاق
سینار گُل شاخه سی صَحنِ گُلستانی دوتار یاپراق
دوشَن یاپراقلاری جان تَک قُوجاخلار گیزلدر تُپراق
گلور غَم باخدوقیجا بلبلِ مَستانیَه قارداش
خَزانِ ظُلمی دَرک اِئتمیش گُلِ پَرپَردی بو اَعضا
آلوب خاکِ شَفا آغُوشینَه قان آغلیور زَهرا
رقّیون عَندلیبی پَر شکستَه نِیلسُون آیا
دانیشدیر جان دی بُو جاندان دوشَن جانانیه قارداش
مَنه تاپشُوردوقون قز دور سَنون آرام جانُون دور
دوشوب دِلدَن اگر چه بلبلِ شیرین زَبانون دور
قاباقلار ناز اِئدوردی اِیندی اَمّا نوحه خوانُون دور
بلَه بیر نُوحه خوان گَلمُوب جَهانِ فانیه قارداش
عزیزیدی بالام دنیا یُوزوندَه غم پَرست اوُلدی
آتا آغُوشینَه حَسرت قالوب قَلبی شِکست اوُلدی
اِسارَت جامه سی اَگنیندَه شمرَه زیر دَست اوُلدی
چتیندی زیر دَست اوُلماق بِیلَه بیر جانیه قارداش
غم اِئتمه قویمارام بُنیادِ جِسمین سیلِ غم یخسُون
اِسارَت مَنجَنیقی قَلبینی بیر ثانیه سخسُون
گُوزومدَن بو قزی قُویسام کناره من گُوزوم چخمسون
نه گُوز قرباندی بو گُوزلُر بِیله دُردانیه قارداش
آدیم دور قَهرمانِ کربلا صَبریم مدالیم دور
عَلاقم چوخدى بو طفلَه اوُرکدَه الله عالم دور
قُوجاقیمدَه دولاندیرّام سَفیرِ خُردسالیم دور
یتورّم اِحترامیله سِفارَت خانیه قارداش
همیشه ساغرِ طُبعون سَنون لَبریز دور #انور
کلامون بزمِ ماتمدَه بُکا اَنگیز دور #انور
او که صاحب اَدب دور صاحبِ تَمیّز دور #انور
سوزی یاخشی تانور دلتنگسن آیا نیه قارداش
- شنبه
- 14
- مرداد
- 1402
- ساعت
- 22:22
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه