گَل ای مُرآتِ عِفت آخرين ديدار دور زينب
چاتوب هِجران باشا هنگامِ وَصلِ يار دور زينب
مُحبتدَن اِئدوب دَعوت حَريمِ عشقه جانانيم
زهی اِقباليمه، وَصلَه مُبدّل اُولدی هِجرانيم
بونون شُكرانه سيندَه پيشكش عُنوانينه جانيم
نثارِ پيشگاهِ حضرتِ دلدار دور زينب
ماُی جان آچوبدور بال و پَر وَجد و نَشاطيمدَن
اُولوب مَحو اِنقباضِ دل كمالِ اِنبِساطيمدَن
اِئدوب شُوقِ لَقا، آسودَه خاطر هر بَساطيمدَن
بو بَحث و فَحص دَن عُمدَه نَظر، ديدار دور زينب
گرک باشدان گِئچم كوی مُحبّتدَه بو دور عَهديم
اگرچه واقفم آخر اُولار اُوز مَقتليم مَهديم
اُولام ثابت قَدم عشقيمدَه وار جِديّت و جَهديم
كه عشقينِ اوّلين شَرطی نه چون اِيثار دور زينب
مُنظم دور نِظامِ كُون و اِمكان اِنتظاميمدان
قَتيل اُولام وَلِيكَن چَكمرم اَل اُوز مَراميمدَان
گرک عالمدُه اُولسون زنده قَد قامت قياميمدَان
جَهاندا اَهلِ اِسلامه بو بير هُشدار دور زينب
حسين اِبنِ علی عالمدَه اِستكباره اَگمز باش
گِئچر باشدان ولی اربابِ اِستعماره اَگمز باش
جَهاندا آز ياشار، آزاد ياشار كُفاره اَگمز باش
حسينون آرامانيندا باش اَگيماق عار دور زينب
گرک دنيا يُوزوندَن كُفر و اِستكبار پاک اُولسون
قياميمدان بو دور فكريم كه ظالم لَر هَلاک اُولسون
منيم بو آرمانيم اَهلِ دنيايه مِلاک اُولسون
كه ظلمين ريشه سين كَسماق گُوزل اَفكار دور زينب
اگر تُوش اُولسا سينه م يوخ غَميم شَمشيرِ ظُلاّمه
بو چولدَه دوزموشَم عِلّت بو دور هر رَنج و آلامَه
كه لَطمه ويرماسُون بيگانه لَر فَرهَنگِ اِسلامه
غَرض فكريم جهاندان مَحوِ اِستثمار دور زينب
هَراسيم يُوخ بو لَشگردَن مَنم شيرِ خدا اُوغلی
جَهان خَصم اُولسا باک اِئتمز ولیّ كِبريا اُوغلی
باش اَگمز قُومِ ظُلاّمَه علیّ المُرتضی اُوغلی
آتام مُولی المَوالی حيدرِ كرّار دور زينب
بو چُولدَه سُود اَمردَن دولتِ اِيثاريدَن گِئچديم
ابُوالفضليم كيمي صُولتلی پَرچَمداريدَن گِئچديم
جَبيب اِبنِ مَظاهر تَك قُوجا سَرداريدَن گِئچديم
كه دين اُولسون جَوان، چون دين مَنه مِعيار دور زينب
باجی سن بُو بياباندا مَنيم نايب مَنابيم سَن
شَياطينِ زَمانين رَجمينه تيرِ شَهابيم سَن
عَلمدارِ قياميم سَن شَريکِ اِنقلابيم سَن
سَبب نَشرِ قيامَه عُمدَه پَرچَمدار دور زينب
منی جُور و جَفادَن ئولدورر بو قُومِ سَنگين دل
اُولار اَمرين بو صَحرادَه سَنون مَندَن صُورا مُشگل
تَحمل اِئت اَسير اِئدسَه جَفادَن فُرقهء باطل
شَهادتدَه اِسارت وار بو بير اَسرار دور زينب
دايان سِيلِ بَلادَه داغ كيمی بُو قانلی صَحرادَه
تَحمُل اِئت مَنيم قَتليمدَه گَلمه شيون و دادَه
اَسير اُولساندا اَل چَكمه حَقيقتدَن كه، آزادَه
هميشه كُفريلَه آمادهء پِيكار دور زينب
اگر من ئولمَسَم عَدلِ اِلهی پايدار اُولماز
بنای شَرعِ پِيغمبر جَهاندا اُستوار اُولماز
شَريعت پايدار اُولمازحَقيقت آشكاراُولماز
حسين ئولسُون، ديريل سُون دينِ حقّ ناچار دور زينب
سَنه تاپشيردويم ای زَهرايه مَظهر آلِ اَطهاري
بُو سَن بُو اَهلِ بيتيم ای كَمندِ غَم، گرفتاری
اُوزوندَن جِد و جَهد اِيله رضا اِئت حَیّ قَهّاری
پَرستار اُول بالام سَجادَه، چون بيمار دور زينب
بو چُولدَن كُوچ اِئدندَه اهلِ بِيتيم شامه كَف بَسته
سَوار اِيله اُوزون مَحمل لَره آهسته آهسته
عَداوتدَن عَدو بُولمز كه بُو اَطفالِ دل خَسته
علی اُولادی، آلِ اَحمدِ مُختار دور زينب
مُواظب اُول اُوشاقلاردان سَنه هر چَند زَحمت دور
خُصوصاً بو رقيه مدَن كه مُحتاجِ مُحبّت دور
يَتيمين كُونلون آلماق حَشردَه پاداشی جَنّت دور
بو فِيضه واقفَم نايل اُولان اَخيار دور زينب
باجی هر چند اَلف قَدين اُولار بارِ مُحندَن دال
تَلاش اِئت قيزلارين بير بير ولی بو چُولدَه كُونلون آل
جَوان داغی گُورنلَر باشينا ظِلِ مُحبّت سال
يورولما، سَن مَنه، حَقده سَنه غَمخوار دور زينب
اگر چه عاشقِ #شبخيز غرقِ بَحرِ عُصياندی
وَلی نادِم دی اُوز خَبط و خَطا سندان پَشيماندی
اَليندَه تُوشه سی آزدی، قيامَتدَن هَراساندی
اُميدی حَشره مَقبول اُولسا بو اَشعار دور زينب
دعا اِيله خدا گِئچسُون قيامَتدَه گُناهندان
پَشيمان دور نچون اَعمالِ زِشت و اِشتباهندان
پناهندَه اُولوب درباريوه، قوغ ما پناهيندان
مَنه خاطر كه دَربارين بُيوك دَربار دور زينب
- شنبه
- 14
- مرداد
- 1402
- ساعت
- 22:33
- نوشته شده توسط
- یوسف اکبری
ارسال دیدگاه