دل دوشوب پیچ و خمه دلبره آخر گجه دور
یاندی جان رشته سی جان پروره آخر گجه دور
آز قالور یاتسون عدالت علمی عالمده
دوز قضاوت ایلین داوره آخر گجه دور
ایتوروب قافلهء راه، سعادت یولونی
رهنمالیق ایلین رهبره آخر گجه دور
لیلیهء بیست و یکم دور سحری صبحِ عزا
یخلوب شیرِ خدا بستره آخر گجه دور
آز قالوب تاجینی باشدان گوتوره روح الامین
عمری باشه یتشوب حیدره آخر گجه دور
ضربتِ زادهء ملجم ایلیوب مغزه اثر
یوخ توانا او قوی پیکره آخر گجه دور
ایشیدور ناله سسین شیرِ خدا طاقتی یوخ
سس وِیره زِینبِ غم پروره آخر گجه دور
ایستیور تکیه قیلوب بالشینه صحبت ایده
زَهریلی جسمی دوشسور لنگره آخر گجه دور
گاهی غَش ایلیوری گاهی آچور گوزلرینی
ایستیور تزتز حسینی گوره آخر گجه دور
مختصر حاله گلوب عترتینه سالدی نظر
باغبان باخدی سولان گوللّره آخر گجه دور
گوشِ مولایه اوزاقدان یتشوب ناله سسی
دوزمدی نالهء حزن آوره آخر گجه دور
دِئدی کیمدور گتورور قلبیمی دردِه دِئدیلَر
اوغلون عَبّاس آچوب منظره آخر گجه دور
قیلدی فرمایش حسن قارداشوزی رام ایلیون
چاغرون گلسون اونی محضره آخر گجه دور
گلدی عَبّاس یساریندَه علی وِئردی مکان
باخدی صَرّاف او گوزل گوزلره آخر گجه دور
الینی آلدی اَله قویدی حُسینون اَلینه
دِئدی اوُغلوم بو گجه حِیدَره آخر گجه دور
سنه من اوُغلوم ابُوالفضلیمی نُوکر وِئریرم
ثَبت ایله نُوکر آدین دَفترَه آخر گجه دور
دئدی عَبّاسه دَه طاهادن امانتدی حسین
گورسون هر وقت بو بی یاوره آخر گجه دور
قوشونی گتسُه دَه تَک قالسادا سَن گُیتمیَه سُن
او گجه زادهء پیغمبره آخر گجه دور
کچدی ایللّر دولانوب اولدی شَبِ عاشورا
چخدی شاهِ شُهدا مَنبَرَه آخر گجه دور
دِئدی گئتسون بو چوله کیم طمع ماله گلوب
حاجتیم یوخدی ایله لشگره آخر گجه دور
هَوَسِ سَلطنطیلَه بو یِرَه گلمه میشم
گلمیشم بیر هدف دیگره آخر گجه دور
و
ایستورم دهرده قرآنِ مُبین زنده قالا
ویرمرم بیعت اَلین کافره آخر گجه دور
من سحر ئولملیم گر کمکیم اولماسادا
قانعم اوغلوم علی اَصغره آخر گجه دور
ایلیون مشعلی خاموش گیدنلر گیتسون
ایدورم مطلبیمی یکسره آخر گجه دور
فکر امواله گلن دوردی یریندن ایاقا
گیدیگون سویلدیلر بیربیره آخر گجه دور
سعی ایدون جانیمیزی مهلکه دن تیز قوتاراق
الیمیز یتمدی سیم و زره آخر گجه دور
بش بش اون اون داغلوب اولدی پراکنده قُوشُون
بلی ظلمتده اوچان شب پرَه آخر گجه دور
یاندی مشعل شهِ دین باخدی سنان لشگرینه
دئدی سیزده داغلون چوللّره آخر گجه دور
اوغول اکبر گوتورب لِیلینی عزم ائت وَطنه
قویما سالسون قره، آغ معجره آخر گجه دور
آغلادی عرض ایلدی من گیده بُللم هایانا
ایاقون آلتدا یاتان اکبره آخر گجه دور
قاسمه دوتدی یوزون ایلدی فرمایش امام
عمون ایستور سنه یول گوستَره آخر گجه دور
بودی فکری آنووی قارداشووی حاضر ایده
سیزی سالم وَطنه گوندره آخر گجه دور
فرق قویما منیله اکبره عرض ائتدی عمو
قیل توجه بو شکسته پَره آخر گجه دور
منده اکبر کیمی بو چولده شَهادت گزورم
مُژدَه وِیر بو دل خوش باوره آخر گجه دور
دِئدی عَبّاسینه یغ باشیوه قارداشلارووی
قویما محنت سیزه یوز دوندره آخر گجه دور
آنوزون گوزلری یولدا قالا انصاف دَگُول
ائتمیون توش اوزوزی خنجره آخر گجه دور
عرض قیلدی قاپودان نُوکریوی قووما آقا
شَبِ عاشور آقیا نُوکرَه آخر گجه دور
غیرتیمدن چوخ اوُزاقدور قاپُووی ترک ایلیم
درگهوندن گیدم آیری دره آخر گجه دور
اِذن ویر باشیوه قارداشلاریملا دولاناق
عوُن و عَبّاسیویلَه جَعفرَه آخر گجه دور
آتامون خاطرینه لطف ایله سندیرما منی
باخ بو گوز یاشی توکن گوزلره آخر گجه دور
دِیمُورم سَن منی سرلشگر اِیله لَشگریوَه
بسدی سَقا آدی بو مُضطره آخر گجه دور
من گرک قلبی یانان قزلاریوا سُو گتورم
کربلا دشتی دونوب مَحشَره آخر گجه دور
قوی گیدوم نَهره سَوسُوزلار سَسی ئولدوردی منی
گتورم سُو بو علی بَنذَره آخر گجه دور
بستر مرگیدَه هر شب منی درک اِئتسه اَجل
یا حسین داده یِتیش #انوره آخر گجه دور
- شنبه
- 14
- مرداد
- 1402
- ساعت
- 22:45
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه